بصفتى دكتورة صيدلانية ( ع الورق ) اسمحولى أكلمكم النهاردة عن الانتظار كعلاج بيلجأ إليه البعض

أولاً : خواص الانتظار .. الانتظار مضاد لليأس ، يلجأ إليه المريض لما يبقى عنده أمل فى حاجة غالباً فشنك فيقرر بدل ما يسيبها و يمشى و يكتئب يقعد يستناها تحصل ، و هو عبارة عن كبسولة من برة مسكرة بس من جوه مُرة أووووووووى

ثانياً : تأثيره العلاجى .. لا يتميز بالثبات الكيميائى و لا يذوب فى الماء ، تمللى هتلاقيه واقف فى زورك ، يُمتص جيداً عند أخذه عضل إذ ينتشر فى الجسم انتشار النار فى الهشيم

ثالثاً : دواعى الاستعمال .. التهابات المرارة ، ضعف الأعصاب ، صعوبة ف التنفس ، خلل ف عضلة القلب ، و لكن فى مقولة أخرى : و الله ما فى داعى يا جماعة ، إنتم بس اللى مُصرين تعملوا تكليف

رابعاً : نواهى الاستعمال .. ممنوع منعاً باتاً لأصحاب القلوب الضعيفة و المبالغين فى ردود الأفعال

خامساً : احتياطات .. لا يُنصح به للسيدات

سادساً : الاستعمال أثناء الحمل و الرضاعة .. لا يُنصح بالانتظار أثناء الحمل و الرضاعة

سابعاً : تحذيرات .. لما تقرر تستنى متحطش فى دماغك إن الأزمة هتعدى بسرعة ، و هاتلك تموين أكل و شرب و انتظر الفرج بعيد المدى .. ده لو جِه

ثامناً : الأعراض الجانبية

نغز فى القلب ، يموّت الروح م الوجع

الريق طول الوقت ناشف ، مهما تشرب و لا الهوا ، البعض بيضطر يشرب من دم أى حد عشان يعوّض نقص السوايل فى جسمه ، و ممكن مع الوقت – فى الحالات المستعصية –يتم التحّول لفامبير بيمص دم الخلق من غير ما ياخدوا بالهم

ضغط وااااااطى للناس اللى أصلاً ضغطها واطى ، أو ضغط عاااااااااااااااالى للناس اللى أصلاً ضغطها عالى ، المهم إنك مش هتلاقيه مستقر و حالتك هتدهور و السلام

رغبة فى التدخين بتبدأ بسيجارة فرط من حد من زمايلك تحت شعار ما تجيب سيجارة حاسس إنى عايز أحرق اى حاجة بدل ما اولّع فى نفسى ، و قد تنتهى بالإدمان ربنا ما يوريك

تنميل بسيط فى أطراف الأصابع ، يخليك فاقد إحساسك بأى شئ / شخص تتواصل معاه

تٌقل فى الرجلين ، لا يبقى ليك نِفس و لا قدرة ع الحركة فتقعد يا حاطط اللاب توب فى حجرك و قاعد ع الفيس بوك ، يا معاك ريموت التليفزيون عمّال تقلّب ف المحطات بدون هدف

فقدان تام للشهية للناس الرفيعين أمال إنت فاكرهم مبيتخنوش إزاى يعنى ؟ أو زيادة الرغبة ف الأكل للناس التُخان و الله المستعان

للسيدات المتزوجات : غممان نِفس ، مع دوخة ( راجع فقرة الضغط الواطى ) و تأخير فى الدورة الشهرية فطبعاً تفتكرى نفسك حامل و تعيشى الوهم

للآنسات : مغص فى الجزء الأسفل من البطن مع انتفاخ ، محتمل صداع ، مع عصبية حادة و ده بيدى إنذار كاذب على إنها الدورة الشهرية مع إنها كانت لسه خلصانة من عندك الإسبوع اللى فات

للنساء عموماً اضطراب فى الدورة الشهرية سواء فى الميعاد أو فى الكمية

تلف فى بعض الأعصاب ، فعلاً و مجازاً

بعض أعراض الاكتئاب تتراوح ما بين الرغبة فى الانعزال و تناول لمهدئات حتى محاولة الانتحار بإنك تحاول تقنع نفسك بإن لسه عندك أمل و هتفضل مستنّى ، ربنا معاك يا وَحش

تاسعاً : الجرعة الزائدة .. فى بعض حالات الجرعة الزائدة قد يحدث تلف فى خلايا المخ ، فشل لوظائف القلب ، فى الحالات الحرجة قد يحدث بلادة تؤدى إلى جنوووووووووون

عاشراً : العبوة .. بها عدد واحد كبسولة أو واحد أمبول بس إيه بقى ممتد المفعووووول ما أقولكش

ملحوظة : لا يجوز البدء فى الانتظار دون استشارة طبيب ، يُفضّل يكون بتاع كُله

**

و أخيراً .. أحب أقول للناس اللى بتحب الانتظار زى عينيها إن كتر الانتظار بيخلى الحاجة حتى لو جت فقدت أهميتها و قدرتها على إسعاد صاحبها ، مع الوقت الانتظار بيصيب صاحبه ببلادة ( لو مجتلوش يا هيكتئب يا هيتجنن ) و اللى بالتبعية بتُفقد الشئ / الشخص المُنتَظر كل الحاجات الحلوة اللى كانت فيه