Sunday, October 28, 2007
My First Book ..

.

.

Coming SO SO SoooN

 
posted by Yasmine Adel Fouad at 1:49 PM | Permalink |
Thursday, October 25, 2007
تُــرقُــص !!!!

افتح شبابيك الحلم
افتح طريق لبكرة
و أى شئ بقى علم
ما هو كان فى الأصل فكرة

Close ur eyes , Make a WISH .. and Believe ..
تعرف تحلم ؟
تعرف تقلل أزمة ثقتك فى بكرة ؟
تعرف تبتسم و تقول نجرّب ؟
لو ما بتعرفش مش عيب ، اللى مبيعرفش يعرف ،الموضوع مش معضل نهائى ، خايف تتشملل و تقول أحلى بكرة لينا و بعد نصف ساعة تلاقى الدنيا لاطشاك على قفاك ؟ عادى جدا ، حقك يا معلّم ، بتحاول تصدق و مش عارف ؟ بتحصل فى كل العائلات ، مش قادر تغصب على نفسك ؟ و إحنا من إمتى كنا من أنصار الديكتاتورية ؟ لاقى نفسك ساعة تصدق و تبقى ابن ناس و ساعة تقفل و تشوف الدنيا بنت كلب مش هنختلف . المهم ساعة الحلم تيجى

يــــــــــــــا
يا هل ترى مسموح
افتح عيونى
افتح عيونى و أبوح ؟

طبعاً أنا مش بطبيعتى بنى آدمة واثقة فى اللى بكرة شايله على كتافه ليا و بعانى أزمة ثقة بنت لذينة بس ده ما يمنعش انى قررت أسيب ايدى و أقول و ماله خليك وراء الكداب لحد باب الدار بس طبعا فى حاجات مينفعش أسيب ايدى فيها ، فى خطوات ما فى مستقبلى العملى أو الجوانى محدش يقدر يحطنى فى طريقها غيرى لكن فى حاجات تانيه الواحد لازم يكشكشها فيها ما يعرضهاش و لو الحاجات دى راحت ما جاتش ده ما يكسرنيش و لا ينقصنى دراع أو حتى شعرة لإن ببساطة مطلقة

و إيه نعطش نهون
أو ع الطريق نتعثّر
ماحناش فراش هيموت
ولا إزاز يتكسّر

مش عارفه مش شرط يبقى منطقى انى اكتب البوست دى ، و حالتى مش بالضرورة فى بطنها بطيخه صيفى خصوصا بعد كل المبيدات المتسرطنة بتوع اخواننا اللى هيتشوا ان شاء الله لكن ببساطة مطلقة فى حالة ارتياح جوايا و هدوء و رغبة فى انى اسيب الحبل للدنيا و أقول على فين يا بكرة مودينا انما برضه اكيد بحدود :)


و لو ف يوم راح تنكسر
لازم تقوم
واقف كما
النخل باصص للسما
و لا انهزام
و لا انكسار
و لا خوف
ولا حلم نابت فى الخلا
*
*
علّى صوتك بالغنا
لسه الأغانى
مُمكنة
________

شكر خاص لمحمد منير
 
posted by Yasmine Adel Fouad at 9:47 AM | Permalink |
Monday, October 22, 2007
حين تصبح الكتابة فعل غصب

قالوا لى :-
إن خذلتك الحياة
امنحى بعضاً من تنازلات
تقربى من الألهة
قدمى قلبك ذا الجناحات
قُُرباناً رمزياً
اسكبى ما تبقى من روحك
فوقه
دون أن تنتظرى المقابل
***

قالوا لى :-
الدنيا طفلة صغيرة
إن تمنحينها قليلاً من الحلوى
تُطيعك طويلاً

***

قالوا لى كثيراً
لكنهم
أبداً
لم ينتظروا
منى
الرد
 
posted by Yasmine Adel Fouad at 12:14 PM | Permalink |
Thursday, October 18, 2007
مشروع بوست \ رُبمــا رشــوة
يتغيّر الزمان
يتغيّر المكان
تتغيّر الفصول
يتغيّر الإنسان
يتغيّر الميعاد
يتغيّر الجماد
إلا
البداية
و
النهاية
و
الحقيقة
و
الميلاد ..
*
*
بقالى كتير أوى مكتبتش حاجة شخصية بحتة ، مع ان فى حاجات كتير ممكن تكون بتحصللى و حاجات أكتر ما بتحصليش . بس خلاص مبقيتش اعرف استنى .. يوم بعد يوم أزمة الثقة بتروح من جوايا و تزيد فى اتجاه اللى مش بايدى اتعلمت م الدنيا ما أثقش فى الاحلام غير اللى بإيدى احققها الأحلام المزدوجة صعب اتمسك بيها ..أحلامى فردية علشان أقدر عليها حتى لو مكانتش هتكفينى يمكن لإنى اتعلمت إن أنا الحقيقة الثابتة اللى فى حياتى بس أكيد بحتاج ساعات حد يحلملى و أسيب أنا إيدى. و أنا مش مبكتبش فى البلوج علشان ربنا يكفينى شر الفضيحة مثلا لان انا مبيفرقش معايا حاجة و اعمالى مش خطيرة أوى يعنى لكن مفيش نفس أو مفيش وقت أو مش حاسة انى عايزة اكتبنى بصورة مُلحة . بس الإحساس اللى متملكنى بقاله فترة ان البلوج وحشنى أو يمكن صورتى جوه مرايا قدامى مكتوبة محتاجاه . من فترة كنت حاسة انى محتاجة اوى حد يكتب حاجة عنى تبهرنى مع ان فى ناس من صحابى كتبوا عنى قبل كده و ده أسعدنى بس مش عارفة الاحساس نفسه فاكرة انه كان عندى من فترة قريبة اوى محتاجة الدنيا تفاجئنى بأى شكل و لو بسيط طماعة بس ده أنا . اما الإحساس اللى عندى دلوقتى انى أنا عايزة اكتبنى أو اكتب الموود الغريب الناعم اللى فيه حبة شجن الموود أبو حبة انوثة و حبة دلع مع لمحة سكوت و أمل الأمل بقالى كتير مكتبتش للأسف و طبعا عفريت الكتابة مش تحت تصرفى أى وقت . انما محتاجة اوى ابتسم و عينيا تلمع لمعة فخر و لمعة دموع لما أقرانى على ورقة مطبوعة بين ايديا . اعتقد ان البوست دى ممكن أوى تتصنف رشوة لجنى الكتابة علشان يجيلى شوية بعد ما سابنى كتير أو رشوة للبلوج علشان كنت بعيدة عنه فوحشته شويتين و هو وحشنى أوى و يزيد أو رشوة ليا أنا نفسى علشان أأقلل إحساسى إنى متاخدة من حاجة مش عارفاها . أو ربما رشوة لإحساس غريب بالأنوثة مالينى . حاسة إنى واحدة أنثى مش هيفهم ده غير لو بنت عديت م النواحيدى . ممكن حد يسألنى و قبل كده كنت حاسة بأيه كنت حاسة إنى بنى آدمة لكن دلوقتى حاسة إنى واحدة و معنديش تفسير للأمر لإنه يتحس ما يتشرحش .. لكن ده لا يُقلل من حقيقة إنى مؤخراً بغض النظر عن كل الكلام اللى فوق أهدا كتير مؤمنة بأحلامى و جاهزة لطموحاتى و سعادتى مش هقول فوق الوصف انما محسوسة و موجودة نحمد الرب
*
*
بتخلص الحاجات
و
بتتولد حاجات
دوامة الآلام
بتدور مع الأيام
الفرح
و
الدموع
الوهم
و
الأحلام
*
*
على الهامش
شكر خاص ل
" حتحور "
اللى ما خذلتنيش بهديتها ليا فى عيد ميلادى

 
posted by Yasmine Adel Fouad at 8:54 AM | Permalink |
Monday, October 08, 2007
23


اللى يعرفنى كويس هيعرف انى مش بتاعة رمضان جه فكل سنة و انتو طيبين و العيد جه فالعيد فرحة يا سلام بس بما ان السنة دى سنة مميزة و لان أول يوم العيد الموافق 13/ 10 موافق يوم عيد ميلادى و ده عاملى حالة نشوة و بهججة زيادة فلازم احتفل لنفسى بالمناسبة دى .
رغم عدم استيعاب الكثيرات من سعادتى بتقدمى فى السن الا انى مليش دعوة انا فرحانة و خلاص .
أولاً
ساعة ما كملت 21 سنة انبسطت لانى حسيت ساعتها ان دى نقطة الصفر للبداية الحقيقية
ثانياً
يوم ما كملت 22 سنة كنت أسعد لانى حسيت ان مرحلة الصفر الكبير انتهت و ان انا وصلت لسن بدء التنفيذ الحقيقى و بالفعل فخورة بانجازاتى خلال السنة اللى فاتت دى و اللى باقى عليها كام يوم وعلى سبيل المثال لا الحصر :
حصلت على شهادة تخرجى بمعنى الورقة اللى تثبت انى فعلا اتحررت من ضجر و عفونة العالم الصيدلى ، قصيت شعرى و دى كانت خطوة مش سهلة و المدهش انى كررتها 4 مرات بعد كده كانت آخرهم امبارح و قصيته أوى جدا من غير ما آخد إذن حد ، كورس اليوجا اللى أخدته ثلاثة شهور متتالية ، قرارى بانى اشتغل فى مجال تعليمى و دى كانت خطوة شبه مستحيلة ، تحقيقى الاستقلال المادى التام عن أهلى ، قرارى بالنشر و ان شاء الله ديوانى الأول هيبقى خلال أكتوبر ده برضه يعنى خلال أيام ، معركتى مع اهلى بخصوص دراسة التذوق الفنى و مكسبى و بدأى الفعلى للدراسة ، بالإضافة للطفرة الموسيقية اللى حصلتلى على مستوى انتقاء المزيكا المفضلة بالنسبة لى و اكتشافى عالم جديد مدهش من الموسيقى و الأغانى ، أما الأهم فعلى المستوى الاجتماعى حصلتلى عملية فلترة غير متعمدة انما مدهشة قدرت أوقع ناس من حياتى كانوا فى يوم مهمين من غير ما يجرالى حاجة ، عرفت وشوش على حقيقتها ، أضفت قبس من نور من خلال أفراد معينين لازم يكونوا عارفين نفسهم و انهم من أروع الانجازات اللى حصلتلى فى 2007 ، عمقت علاقتى بأفراد مهمين كانت علاقتى بيهم سطحية ، و الأجمل انى تصالحت تماما مع عيوبى و ذلاتى الشنيعة اللى كنت مش بقدر حتى استوعبها ده كله خلانى واثقة من الطريق و من خطواتى و ناوية باصرار أكمّل كل ده يوصلنا ل
ثالثاً
انتظارى السعيد ليوم السبت لما أوصل ل 23 سنة علشان حاسة انى أكثر أنوثة و إنى تخطيت السلمة الأولى فى الطريق و ده يدينى طاقة أكبر لمزيد من التوغل داخل أدغال الحياة
باختصار شديد من كل قلبى بمنتهى الصدق و الحب
ياسمينتى
فخورة بيكى السنة دى
و طبعا بتمنالك الخير
كل سنة و أنا و انتى طيبين
و على رأى نورا
ياريت
تحاولى
تاخدى بالك من نفسك
 
posted by Yasmine Adel Fouad at 2:25 AM | Permalink |
Monday, October 01, 2007
إلى من يهمه الأمر

نتيجة امتحانات القبول
لدبلومة
التذوق الفنى
ظهرت
و الحمد لله
نجحت

 
posted by Yasmine Adel Fouad at 7:49 AM | Permalink |