Saturday, May 16, 2009
الحلوة لسه صغيرة
كنت بتكلم مع حبيبى امبارح ، و فجأة قلتله تصوّر إحنا قربنا خلاص نتجوز !! إيه ده أنا لسه صغيرة !! مش عارفة ليه و مع إنى ما اتفاجئتش يعنى لكن لقيتنى اتاخدت أوى أوى كده ، طبعاً أنا مش صغيرة سناً أنا كنت لسه بقول لبنت عمى باقيلنا 5 سنين و كام شهر و ندخل التلاتين و نبقى محسوبين رسمى ستات ناضجات و عندنا عيال و حركات !!؟ ده العمر جرى بسرعة ، أيوه بعرف أحب ، بعرف أتحمل مسئولية معنديش مشكلة و مش من طبعى أتنصّل من حاجة ، إنما العمر جرى كده ليه ؟ بقى أنا ياسمين الصغيرة البنت بتاعة المدرسة أم ضفاير كبرت و هتجوز !! ده مش بس العيال اللى كبرت أنا كمان بقيت امرأة دلوقتى ، و بعد أقل من شهرين هبقى مدام و عندى بيت و البيه بتاعى راح البيه بتاعى جه ، مقدرش أنكر إنى بحب البيه بتاعى جداً و هموت و أتجوزه النهاردة قبل بكرة بس ده ميمنعش إنى فعلاً شايفانى لسه صغيرة .. يمكن عشان يُهيألى إنى فيّا حاجة بريئة مش عارفاها مخليانى لسه فريش و ما اتقطفتش .. يمكن
 
posted by Yasmine Adel Fouad at 2:48 AM | Permalink |
Wednesday, May 13, 2009
It's all about a Shampoo ..

اللى ف الصورة ده فيلم اجنبى - طبعاً - رومانتيكى خفيف ، الفيلم كان فيه موقف مميز أوى جاى على بالى اليومين دول ، فى الفيلم البطل حبيبته سابته و رفضت أى محاولة للرجوع ، و لمّا معرفش ينساها حاول يعمل ده بطريقته و الصراحة كانت طريقة مبتكرة جداً . حبيبته كان عندها نوع شامبو معين بتحبه أوى ، فقام شربه ، الناس افتكرته بيعمل ده عشان ينتحر لكن الحقيقه هو كان بيحاول ينسى حبيبته بإنه يحاول يوصل لحد الحافة و يجيب آخره معاها يمكن - ساعتها بس - يقدر يبقى عنده مناعة ضدها
 
posted by Yasmine Adel Fouad at 5:42 AM | Permalink |