Saturday, December 29, 2007
What a Journey ..

2007
.
.
السنة دى كانت مليانة احداث رئيسية بالنسبه لى ، يمكن فى معظم الاتجاهات ، حابة أعمل عملية كشف للإيجابيات و السلبيات ، أقعد قدام شاشة عرض أسترجع كل الأحداث العظيمة و غير العظيمة اللى حصلتلى فى 2007
**
على المستوى العملى
اشتغلت و بشهادتى ، دكتورة صيدلانية ، و ده بالنسبة لى كان قرار غير متوقع على الإطلاق ، إنما اخدته عن اقتناع حقيقى ، قدرت أرفض الشغل فى شركات أدوية علشان أفضل حرة نفسى و مالكة وقتى بإيدى و دوامة العالم الصيدلى ما تسحبنيش ، لغيت تكليفى و تخليت عن دورى تجاه الحكومة عن قناعة تامة ، و من خلال شغلى أقدر أقول إنى حققت أول حلم عملى ليا و اللى بيه استقليت مادياً عن أهلى و دى خطوة جميلة جدا بالنسبة لى
**
على المستوى الأدبى
أقدر أقول إن مؤخراً كتاباتى كانت - على حسب ما أنا شايفة و ناس تانيين شايفين - اتطورت أو اتغيرت ، و قدرت آخد قرار بالنشر ، و نشرت بالفعل و دلوقتى أول كتاب ليا فى السوق " نفس آخر فى الحجرة " و ده كان تانى حلم حقيقى بالنسبة لى ، و يوم حفلة توقيع الكتاب يمكن كان من أسعد أيام حياتى لحد دلوقتى ، بس لازم ما أنكرش إنى مش موجودة فى حياة طفلى الأول ده ، مشغولة عنه جدا و مقصرة فى حقه و لسه معنديش وقت أبقى معاه ، فى حلم جديد مالينى الفترة دى و هو إنى اكتب رواية أو مجموعة قصص قصيرة بتدور حوالين نفس الشخصية ، لسه مابدأتش جدياً فى حاجه يدوبك شوية شخبطات بتدينى امل فى ميلاد جديد ، محاولات إخصاب أولية علشان الحماس مش أكتر ، معنديش خطة زمنية محددة للهدف ده لكنه كده اتحط فى الخانة رقم واحد و شاط حلم تانى خالص من مكانه كان دوره دلوقتى بس ملهوش نصيب
**
على المستوى الثقافى
من الملاحظ إن قراياتى بتزيد و بتتوسع لمجالات مختلفة كل سنة عن اللى قبلها
**
على المستوى التعليمى
بعد صراعات قدرت أحقق حلم من أحلامى و اللى كان رقم 3 بالنسبة لى و هو إنى التحق بمعهد النقد الفنى و أعمل دبلومة فى التذوق الفنى ، و بغض النظر عن إن المعهد مش بيدينى كل اللى بحلم بيه بس كخطوة أولى سعيدة بيها جدا و مستمتعه بكل شعاع نور بيزق الحيطة و يدخل من وراها ليا
**
على المستوى الاجتماعى
السنة دى عملت علاقات كتير جديدة ، بعضها هامشى لكن جميل و بعضها بقى فى محور الأحداث ، حصلت عملية فلترة شوية ناس دورهم ثانوى كنت حطاهم فى تراكات هم مش أدها و ما يستاهلوهاش وقعوا أو رجعوا لوراء و ناس جديدة تستاهل رغم الفترة الزمنيه القليلة اللى جمعتنى بيهم إلا إنهم لابد يحتلوا مراتب الصدارة ، فى كمان علاقات اتطورت و اتعمقت بشكل قوى جدا صعب يتخاف عليه ، و علاقات تانيه قدرت أتغلب على الوجع اللى فيها و الناتج عن بعد مسافات أو بعد أرواح ، قدرت أفهم إن مش تواجد الفرد فى حياة الآخر بشكل مستمر هو اللى يعنى علاقة متينة و ان فى علاقات رغم التباعد لحظة القرب فيها بتفضل ليها جمالها ، بقيت صريحة و شجاعة و جميلة فى علاقاتى ، بعبّر عن إحساس اللحظة فى وقته على أد ما أقدر ، بقول مبسوطة و خليك شوية و عاجبنى و بقول ماتمشى و كفايه عليك كده و ابقى تعالى كل يوم ، مبقيتش بخاف بقيت بعرف أوفر وقت و أبقى نفسى بغض النظر عن مين هيقول إيه ، قدرت اواجه ناس كتير كانت جرحانى ، و قدرت أقفل علاقات صح بدل المواربة اللى كانت فيها
**
على المستوى الإنسانى
معملتش حاجات كتير تتضافلى اعتقد ، مؤخراً فى الكام شهر الآخرانين فى نشاط اجتماعى معين أقدر أقول انه فيه بعد انسانى و روحانى جميل و بيفيدنى أنا كمان حتى لو كنت أنا اللى بدى فيه
**
على المستوى الروحانى
أووووووووووه ، فى تطور جميل و حقيقى ، حبانى أكتر بكتير ، فاهمانى ، مقدرة مواقفى الصح و الغلط ، قدرت أغفر لنفسى حاجات كتير ، قدرت أتصالح مع مواقف كانت مؤرقة حياتى سنين و سنين ، مصدقة حاجات مش مرئية ، مؤمنة بسحر و نور حتى فى لحظات ضعفى و وجعى بيفضل موجود و مستنينى ، لا الموضوع كبير ما يتكتبش ده يتعاش ..
**
على المستوى الشخصى
اعتقد إنى كبرت ، و وصلت لمرحلة من النضج أكيد مش الكاملة لكن مش البدائية
**
على مستوى الصراعات
أوووووووه السنة دى كل قراراتى المصيرية كان بيصحبها صراعات لكن الحمد لله نجحت فى معظمها و المهم منها و ده إدانى ثقة جامدة فى نفسى و حسسنى إنى قادرة أحدد مصيرى الشخصى باستثناء لحظات بسيطة بس برضه بيبقالها مرارة
**
على المستوى الإنجازى الصغير
أخدت كورس اليوجا تانى لمدة شهرين متواصلين بس من ساعة ما اشتغلت و دخلت المعهد المواعيد اتضربت ، قصيت شعرى كذا مرة و لعبت فى لونة شوية على خفيف ، بقيت أقدر أروح حفلات و مسرحيات و عروض من غير ما يكون فى اعتراضات عظمى ، صحيح المعدل مش كبير بس احنا كنا فين ، احنا بنحظ الأساسات أهو ، و الشاطر اللى يختار اهدافه المهمه و ينشن عليها
**
على المستوى العاطفى
الحمد لله ما خبطتش فى حيطان بس برضه ما وقعتش فى جنينة ، إنما الجميل إنى اتأكدت إن الريسيفر بتاعى شغال من جوه و من برّه و ده فى حد ذاته شئ رااااااائع
**
على المستوى العائلى
يعنى ساعات خبط و رزع و ساعات بنت ناس ، لكن رغم كل حاجه ربنا يخليهم ليا لانهم و رغم كل شئ بعد المناقشات الفظيعة بتاعتى بيسيبونى أمشّى اللى فى دماغى و فى لحظة الجد بيباركولى الشئ من قلبهم بجد
**
على المستوى الدينى
تقهقر مش حلو خالص ، مقصرة فى حق ربنا جداً ، ساعات بتضايق لده و ساعات بتضايق بدرجة أأقل ، و ساعات بنسى أتضايق من الأساس و ده بيضايق أكتر لو افتكرت ، بجد عيب بعد كل انجازات السنة دى أبعد عن ربنا بدل ما أقوله شكراً .. ربنا .. بجد أنا أسفة
**
على مستوى ارتكاب الأخطاء غير المتوقعة
حتى الآن ارتكبت خطأ واحد ، بس مش حاسة معاه بالذنب
**
بوجه عـام بقى
بعد كتابة الكام كلمة دول بقول إن شكل السنة دى كانت لطيفة معايا ، صحيح هتمشى بس مش هنساها لأنها هتفضل دايما معايا ، بهداياها اللى عندى ، حواليا ، و جوايا
*
*
Dear 2007 .. i do LOVE you
Big Hug ...
 
posted by Yasmine Adel Fouad at 9:15 AM | Permalink |
Sunday, December 23, 2007
وحشتنى الكتابة

شئ ما
مازال مفقوداً
غير أن حلمى الجديد
و الذى أصاب رحمى
- فجأة -
، دون إخصاب
لا يترك له مساحة كافية
. كى يُعبّر عن نفسه
*
*
فها هو ذلك الشئ المفقود
، ينتقم منى
، لتجاهلى
بأن يظل مفقوداً
بعيداً
- تماماً -
. عن حدود الرؤى
و ها هو الحلم الجديد
- ذلك الذى استولى على حق حلم أقدم فى الظهور -
يسحبنى نحوه
، قدر ما يستطيع
لأقبع أنا
،بين أساطير لم تكتمل
، و أمنيات أخرى تحيط عنقى
، أدّعى الحياد
. منشغلة عن نفسى
أعلن للجميع
أننى لست هنا
مثلما أنا كذلك .. لست هناك
 
posted by Yasmine Adel Fouad at 8:38 AM | Permalink |
Tuesday, December 18, 2007
Belief ..

" أنا وحدى لا أستطيع أن أفعل شيئاً ،
بلى بنى أنت وحدك تستطيع ،
تستطيع أن تفعل كل شئ ،
تستطيع أن تفعل ما بوسعك فعله "
*
*
من رواية " تفريغ الكائن " لخليل النعيمى
 
posted by Yasmine Adel Fouad at 11:36 PM | Permalink |
Saturday, December 15, 2007
الميزان مغشوش يا حضرة
" كل ما أوزن ألاقى لسه ناقصلى حتة "
 
posted by Yasmine Adel Fouad at 1:11 PM | Permalink |
Wednesday, December 12, 2007
لسـه الطــريــق مـوصــول
 
posted by Yasmine Adel Fouad at 10:14 AM | Permalink |
Saturday, December 08, 2007
" فضفضة ناتجة عن " فعــل ارتبــاك

" علشــان "
ساعات
بكتشف إنى مش فاهمانى
.
.
كتير
بحس إن الصورة اللى شايفاها
هتفضل
دايماً
جزء من كل
.
.
دايماً
معنديش نقطة فى المنتصف
تماماً متطرفة
إما أقصى اليمين
أو أقصى اليسار
.
.
فعلاً
مش ندمانة
على كل اللى بكسّره
لأجل ما افتح الأبواب
.
.
أحياناً
بلاقينى
انا اللى بخبطنى فى الحيط
بدافع
من
فضول
.
اكتساب
خبرة و لو من فشل
.
التأكد من إن لسه جوايا
روح
و دم
زى باقى البشر بينزف
.
لحظة
عايشاها و طلبت اللى بعمله
.
إيمان
بإنى حرة
.
محاولات جديدة
للحياة عبر أنفاق الاكتشاف
.
حنين
للحظات ماجاتش
.
حق
و حابة أخده أو حتى أطلّعه
.
أحلام
عايزة تمارس حقها
ف إنها تشوف النور ع السطح
.
رغبة مكبوتة
فى إنى أسيب إيدى
من غير حسابات ولا يحزنون
فبديهى
رأسى أول ب أول تتفتح
و لإنى بترعب م الغرز
بقف قدام المرايا
أتفرج على خيط الدم
و أرجع بعد كده
أعاقبنى بمنتهى العنف
.
يمكن علشان كل ده
حاسة
دلوقتى
إنى
خايفة
 
posted by Yasmine Adel Fouad at 9:59 AM | Permalink |
حضــــــــــن كبيــــــــــر

شكراً
مرة
و اتنين
و مليون و تلاتين
لكل الناس الجميلة اللى شاركتنى فرحتى
بطفلى الأول
.
.
أنا من لا تشتاق للأمومة
أعرف الآن كيف تكون لحظة الميلاد
.
.
كل اللى حضروا
كانوا منورين المكان جداً
سعادتى كانت بوجود كم الناس ده
فى مكان واحد
مش لحاجة
غير علشان يبقوا معايا و انا فرحانة
حسيت فرحة كل الناس
و أسفة
انى كنت مشغولة
لدرجة خليتنى ماعرفتش احسس اى حد
اد ايه انا سعيدة بحضوره
بس مش محتاجة اقول
إن الحلم ده مكنش حلمى لوحدى
الحلم ده كان بشرة خير
تخللى كل اللى ما بيصدقش
يرجع يعيد حساباته
و يقول
إن بكرة مش بعيد
و ممكن اوى بجد
نوصل
لكل اللى جه
و كل اللى ماجاش
عن عمد
او عن شدة
.
.
بحبكم كلكم
و ببعتلكم
واحد
واحد
حضــــن كبيــــــــــــــــــر

 
posted by Yasmine Adel Fouad at 9:05 AM | Permalink |
Monday, December 03, 2007
Maha ..
مش إحنا صحاب ؟
بنشرب شاى على القهوة
نغنى
أغانى ملكنا إحنا
نعبّر بيها عن روحنا
مش إحنا صحاب ؟
*
*
و لمّا الدنيا بتعاند
بنجرى فيها و نعاند
تعيش حلمى
و أعيش حلمك
مش إحنا صحاب ؟
.
Thanx
M
A
H
A
For
This Song
.
كنتى دايما جنبى كل ما احتاجلك باستمرار بحبك أوى و عايزة أقولك شكراً على بساطتك و النور اللى بيوصلنى فعلا من ذبذبات حبك الحقيقى ليا
Love You
 
posted by Yasmine Adel Fouad at 4:52 AM | Permalink |