Sunday, March 22, 2009
خاف الله خاف .. ارحمنى ما تضربنيش

ضاق خلقى يا صبى
من ها الجو العصبى
.
.
بقالى فترة مش قصيرة مشغولة و مش متظبطة اكمن عفاريت الدنيا طالعة على جتتى .. بصحى الصبح اللى يكلمنى أقوله و كمان بتقولى صباح الخيــــــــــــر .. طااااااااخ .. تقريباً كده حاجة بسم الله الرحمن الرحيم لبستنى ، يمكن بردانة يا عين أمها و اتعشمت فيا خير و قالت هدفيها ، قُصر الكلام بقيت لا طايقة روحى و لا طايقة أغلب اللى حواليا و لسانى اللى مسحوبة منه طول عمرى اتمد أكتر لقدام 15 متر و بقى يقول من المنقّى يا خيار ، فجأة خلقى بقى ضيق و بقيت أصحى أشوف ف المرايا وردة دبلانة و كل ما أقول لا أنا هحاول أتمالك أعصابى الفترة دى المفروض من أجمل فترات حياتى و لازم أبقى بنت كوول و مؤدبة ملحقش أفضل هادية 5 دقايق على بعض أنا قلت الشر بره و بعيد عنى و عن السامعين - سامحونى يا أسياد جاهلة مش فاهمة - راكبنى جن

النهاردة صحيت بقول ده يوم جديد و نبدأه ببسم الله الرحمن الرحيم بس برضه العفاريت من أوله عماله تطنطط و أنا أنفعل شوية و شوية آخد نفس عميق و أقول يا واد طنّـــش خااالص كله هيبقى فُل ، بلاها نادية خد سوسو ، و بعدين اكتشف إن سوسو معيوبة أقوم أول لنفسى يا واد طنّـــش خاااالص كله هيبقى فُل ، بلاها سوسو خد نادية ، و بعدين اكتشف إن نادية راخرة فيها عيب فبقيت قاعدة خايفة لا يكون آخر المتمة نصيبى يُقع ف فوزية و بعدين قلت مالها فوزية ماهى زى الفل أنا بحب فوزية بخفة دمها و تلقائيتها و دماغها المتخشبة و إن كان الأمر - الحق يتقال - ما يسلمشى و لإنى لسه - رغم كل شئ - عندى سنة تفاؤل بعلو صوتى بقول : "بلاها نادية ، بلاها سوسو ، خد فوزية " و لو عمو بتاع عبد الموجود موجود اتصل و سأل ع ال 5 كيلو سمك و جمبرى بالله عليكم قولوله العفاريت راحت توصل الطلب
ضاق خلقى يا صبى
لا مش كله بسببى
.
.

على الهامش

اعترف بجريمتى و التى لن يمحوها أسف أو ندم
أعرف أن توبتى جاءت متأخرة
للغاية
لكن هل نغفر !!؟
 
posted by Yasmine Adel Fouad at 11:02 AM | Permalink |