إهـــداء
إلى
شعــاع نــور أبيــض
اسـمــه
فاطمــــــــــة
أنا لو حكيت عنها هقول
لازم أأقول
ما أقولش ليه !!؟
أولها ( ف )
فــدان أمــل
بيقول أنا لازم أنوّر
ليل قلوب السهرانين
و آخرها ( ت )
تحلف تثـور
على كل ظالم مفترى
عايز يحجّم عقل حد
بكلمتين
اكمنها بتحلم كتير
وعارفة معنى إن حد يقص حلم
ناس غلابة
للأمل كانوا محتاجين
* * *
بنوتة يمكن
إنمـــا
ليها روح و فيها كنز صافى
مخبيـــاه
أول ما تسمع اسمها
تقول دى تاج أصفر بيبرق
و إنها نسمة خفيفة
جت علشان تحلى الحيــاة
* * *
دى ملاك و هارب م السما
عايشة تزيح جبال وجع
من فوق كتاف متأزّمة
* * *
بسمتها لوحة مزركشة
تديك أمل إنك تكون
فنان فى يوم
من ضحكة صافية مزأططة
ترسم قلوب
عناقيد نجوم
* * *
طول عمرى أقول إن الحياة
من غير صحاب
ماتسوى شئ
وحياتى لمّــا عرفتها
فجأة برز فيها طريق
لمكان كبير
وحلم أوسع م الفضا
و سحابة خضراء مسمسمة
بتقول مفيش ماضى و مضى
معاها عينى فتّحت
على حضن أبيض م الندى
من غير حروف بتقول كلام
يحمينى من برد الصدى
* * *
تسمع غناها عينيك تقول
الله أوى
أنا لازم أبكى و أحتفل
بميلاد دموع إحساس جديد
معاها لسّــة بيبتدى
* * *
أنا جوّة قلبى كلام كتير
اكـمنهــا
شعاع منــوّر مسّــنى
جدد ملامح فرحتى
من يوم ما عينى جت عليه
عشان كده أنا مهما أقول
عمرى ما أوفّى حقها
و اكمن جواها الدفا
بخاف قوى لَ البرد ينهش قلبها
فتعيش بشر من غير جناح
و تفوت تدوّر زينا
على ضل دافى تنام عليه
_______________
14 / 11 / 2006
