أدينى جيت متسربعة
علشان زعرورتى مستنيانى
أحكيلك ع الوقفة يا ستى ؟
كانت وقفة مليانة هتافات و اعلام و حماس
كان فى كمان ورق بيعرف التحرش الجنسى و تعملى ايه فى المواقف دى
و اسئلة اذا كان حصلك تحرش قبل كده
اتصرفتى ازاى
مطالبك ايه
كده يعنى
الهتافات كانت حارة جدا
كان فى منها
ياحكومة مفضوحة
فى مارينا و سموحة
أو
قولوا للعدلى يقول سيده
التحرش تم بإيده
كده يعنى
طبعا كان فى من عينة كفاية مبارك
كان فى ناس بتقول ايه حشر الراجل الساعادى
بس هى متتالية زمنية و مكرورة
كمان اتكلموا كلمتين
عن فلسطين و بناتهم فى النص
فى ناس بقى قالت ده مش وقته
و ناس اتضايقت من اللى قالوا كده
و اننا ازاى لازم نشارك الكل
كان فى شخصيات اعلامية موجودة
و ناس فعلا بتدافع بحماس
عن عرضها و عن قضيتها
اللى ضايقنى
- غير الشمس اللى سيحتلى دماغى -
العدد كان قليل جدا
بشكل مخجل
و غير متوقع
شئ تانى لاحظته
أغلب اللى كانوا هناك كانوا جامعة امريكية
و كاتبين يافتاتهم او البانر بتاعهم بالانجليزى
حتى كلامهم مع بعض كان انجليزى صرف
ماكانش فى كلمة عربى بتقع منهم
- طبعا مش بدينهم و لا بمدحهم -
- أنا بس بحكى اللى حصل -
من ضمن الناس اللى اتكلموا فى المايك
كانت واحدة ست عادية
قالت أنا مدام هدى فلان الفلانى
و جاية النهاردة
و قايلة لولادى الاتنين و هم ظباط فى الشرطة
الرائد فلان
و مش عارفة ايه علان
جاية أقولهم انى مش فخورة بشغلهم فى الشرطة
الظباط فين ؟
و بيعملوا ايه للبلد و للا لبناتهم اللى تم التحرش بيهم ؟
عجبتنى قوى الست دى
- بغض النظر عن اسماء ولادها اللى قالتها ثلاثية -

المهم
كنت راضية قوى عن نفسى فى الوقفة
يعنى أضعف الايمان الاعلام هيفتح الموضوع بحماس تانى
على الأأقل بنات كتير هتبدا تاخد بالها
على الأأقل اللى يسمعنا يعرف اننا مش ناويين نسكت

و أنا بشكل أو بآخر احترمت نفسى

و حسيت انى ما سكتش
بس بعد ما مشيت
مش هقول كنت محبطة
لكن حسيت ان مع العدد اللى جه الوقفة
آه فى أمل
و الغمة هتنزاح إن شاء الله
لكن لسه محتاجين وقت
مش قليل

تصوير

مى كريم