.jpg)
البلدية
اجرى و الحق و اخطف
فجأة الشارع يتقلب
و كل واحد بيقلب عيشة يبقى يا مولاى كما خلقتنى
طيب المشكلة منين و فين و ليه ؟
آه حق البلد عايزينه و الضرايب لازمانا
بس طيب يعنى نص العمى و للا العمى كله ؟
الناس تشحت و تقتل و تسرق ؟
و للا تشوف أكل عيشها
ده مش مبرر
يمكن ناس شايفين كده
بس أنا اعرف ان البياعين بيروحوا يدفعوا فلوس فى القسم
و ياخدوا اللى يلاقوه من بضاعتهم
لو لقوا حاجة
- و لو البيه الظابط وافق -
متكسر و بايظ
وناس بتاخد حاجة ناس
و ظباط ياخدوا اللى يعجبهم
و خربانة خربانة
يبقى المبدأ اللى بيدافعوا عنه فين ؟
و للا هى فلوس و يقشطوها و خلاص ؟
اكتر مكان شوفت فيه البلدية
كان اسكندرية ووسط البلد
طبعا فى اماكن شعبية تانية
بس ماعديتش عليها
كنت كتير بساعد ناس بياعين
و اخبيلهم بضاعتهم فى اسكندرية
مش عارفة
مش مؤمنة باللى البلدية بيعملوه
خصوصا انهم بيرجعوا لناس منهم حاجاتهم لو دفعوا
او لو طلعوا عارفين ظابط فى القسم
او حد يعرفه حتى
لكن فى غلابة بيروحوا فى رجلين الرجلين
الصح ايه بقى ؟
علشان كلنا عايزين نعيش
معقول مبقاش فى ربط بين حق البلد و حق المواطن انه يلاقى لقمة شريفة ؟
تصوير
مى كريم
