2007
.
.
السنة دى كانت مليانة احداث رئيسية بالنسبه لى ، يمكن فى معظم الاتجاهات ، حابة أعمل عملية كشف للإيجابيات و السلبيات ، أقعد قدام شاشة عرض أسترجع كل الأحداث العظيمة و غير العظيمة اللى حصلتلى فى 2007
**
على المستوى العملى
اشتغلت و بشهادتى ، دكتورة صيدلانية ، و ده بالنسبة لى كان قرار غير متوقع على الإطلاق ، إنما اخدته عن اقتناع حقيقى ، قدرت أرفض الشغل فى شركات أدوية علشان أفضل حرة نفسى و مالكة وقتى بإيدى و دوامة العالم الصيدلى ما تسحبنيش ، لغيت تكليفى و تخليت عن دورى تجاه الحكومة عن قناعة تامة ، و من خلال شغلى أقدر أقول إنى حققت أول حلم عملى ليا و اللى بيه استقليت مادياً عن أهلى و دى خطوة جميلة جدا بالنسبة لى
**
على المستوى الأدبى
أقدر أقول إن مؤخراً كتاباتى كانت - على حسب ما أنا شايفة و ناس تانيين شايفين - اتطورت أو اتغيرت ، و قدرت آخد قرار بالنشر ، و نشرت بالفعل و دلوقتى أول كتاب ليا فى السوق " نفس آخر فى الحجرة " و ده كان تانى حلم حقيقى بالنسبة لى ، و يوم حفلة توقيع الكتاب يمكن كان من أسعد أيام حياتى لحد دلوقتى ، بس لازم ما أنكرش إنى مش موجودة فى حياة طفلى الأول ده ، مشغولة عنه جدا و مقصرة فى حقه و لسه معنديش وقت أبقى معاه ، فى حلم جديد مالينى الفترة دى و هو إنى اكتب رواية أو مجموعة قصص قصيرة بتدور حوالين نفس الشخصية ، لسه مابدأتش جدياً فى حاجه يدوبك شوية شخبطات بتدينى امل فى ميلاد جديد ، محاولات إخصاب أولية علشان الحماس مش أكتر ، معنديش خطة زمنية محددة للهدف ده لكنه كده اتحط فى الخانة رقم واحد و شاط حلم تانى خالص من مكانه كان دوره دلوقتى بس ملهوش نصيب
**
على المستوى الثقافى
من الملاحظ إن قراياتى بتزيد و بتتوسع لمجالات مختلفة كل سنة عن اللى قبلها
**
على المستوى التعليمى
بعد صراعات قدرت أحقق حلم من أحلامى و اللى كان رقم 3 بالنسبة لى و هو إنى التحق بمعهد النقد الفنى و أعمل دبلومة فى التذوق الفنى ، و بغض النظر عن إن المعهد مش بيدينى كل اللى بحلم بيه بس كخطوة أولى سعيدة بيها جدا و مستمتعه بكل شعاع نور بيزق الحيطة و يدخل من وراها ليا
**
على المستوى الاجتماعى
السنة دى عملت علاقات كتير جديدة ، بعضها هامشى لكن جميل و بعضها بقى فى محور الأحداث ، حصلت عملية فلترة شوية ناس دورهم ثانوى كنت حطاهم فى تراكات هم مش أدها و ما يستاهلوهاش وقعوا أو رجعوا لوراء و ناس جديدة تستاهل رغم الفترة الزمنيه القليلة اللى جمعتنى بيهم إلا إنهم لابد يحتلوا مراتب الصدارة ، فى كمان علاقات اتطورت و اتعمقت بشكل قوى جدا صعب يتخاف عليه ، و علاقات تانيه قدرت أتغلب على الوجع اللى فيها و الناتج عن بعد مسافات أو بعد أرواح ، قدرت أفهم إن مش تواجد الفرد فى حياة الآخر بشكل مستمر هو اللى يعنى علاقة متينة و ان فى علاقات رغم التباعد لحظة القرب فيها بتفضل ليها جمالها ، بقيت صريحة و شجاعة و جميلة فى علاقاتى ، بعبّر عن إحساس اللحظة فى وقته على أد ما أقدر ، بقول مبسوطة و خليك شوية و عاجبنى و بقول ماتمشى و كفايه عليك كده و ابقى تعالى كل يوم ، مبقيتش بخاف بقيت بعرف أوفر وقت و أبقى نفسى بغض النظر عن مين هيقول إيه ، قدرت اواجه ناس كتير كانت جرحانى ، و قدرت أقفل علاقات صح بدل المواربة اللى كانت فيها
**
على المستوى الإنسانى
معملتش حاجات كتير تتضافلى اعتقد ، مؤخراً فى الكام شهر الآخرانين فى نشاط اجتماعى معين أقدر أقول انه فيه بعد انسانى و روحانى جميل و بيفيدنى أنا كمان حتى لو كنت أنا اللى بدى فيه
**
على المستوى الروحانى
أووووووووووه ، فى تطور جميل و حقيقى ، حبانى أكتر بكتير ، فاهمانى ، مقدرة مواقفى الصح و الغلط ، قدرت أغفر لنفسى حاجات كتير ، قدرت أتصالح مع مواقف كانت مؤرقة حياتى سنين و سنين ، مصدقة حاجات مش مرئية ، مؤمنة بسحر و نور حتى فى لحظات ضعفى و وجعى بيفضل موجود و مستنينى ، لا الموضوع كبير ما يتكتبش ده يتعاش ..
**
على المستوى الشخصى
اعتقد إنى كبرت ، و وصلت لمرحلة من النضج أكيد مش الكاملة لكن مش البدائية
**
على مستوى الصراعات
أوووووووه السنة دى كل قراراتى المصيرية كان بيصحبها صراعات لكن الحمد لله نجحت فى معظمها و المهم منها و ده إدانى ثقة جامدة فى نفسى و حسسنى إنى قادرة أحدد مصيرى الشخصى باستثناء لحظات بسيطة بس برضه بيبقالها مرارة
**
على المستوى الإنجازى الصغير
أخدت كورس اليوجا تانى لمدة شهرين متواصلين بس من ساعة ما اشتغلت و دخلت المعهد المواعيد اتضربت ، قصيت شعرى كذا مرة و لعبت فى لونة شوية على خفيف ، بقيت أقدر أروح حفلات و مسرحيات و عروض من غير ما يكون فى اعتراضات عظمى ، صحيح المعدل مش كبير بس احنا كنا فين ، احنا بنحظ الأساسات أهو ، و الشاطر اللى يختار اهدافه المهمه و ينشن عليها
**
على المستوى العاطفى
الحمد لله ما خبطتش فى حيطان بس برضه ما وقعتش فى جنينة ، إنما الجميل إنى اتأكدت إن الريسيفر بتاعى شغال من جوه و من برّه و ده فى حد ذاته شئ رااااااائع
**
على المستوى العائلى
يعنى ساعات خبط و رزع و ساعات بنت ناس ، لكن رغم كل حاجه ربنا يخليهم ليا لانهم و رغم كل شئ بعد المناقشات الفظيعة بتاعتى بيسيبونى أمشّى اللى فى دماغى و فى لحظة الجد بيباركولى الشئ من قلبهم بجد
**
على المستوى الدينى
تقهقر مش حلو خالص ، مقصرة فى حق ربنا جداً ، ساعات بتضايق لده و ساعات بتضايق بدرجة أأقل ، و ساعات بنسى أتضايق من الأساس و ده بيضايق أكتر لو افتكرت ، بجد عيب بعد كل انجازات السنة دى أبعد عن ربنا بدل ما أقوله شكراً .. ربنا .. بجد أنا أسفة
**
على مستوى ارتكاب الأخطاء غير المتوقعة
حتى الآن ارتكبت خطأ واحد ، بس مش حاسة معاه بالذنب
**
بوجه عـام بقى
بعد كتابة الكام كلمة دول بقول إن شكل السنة دى كانت لطيفة معايا ، صحيح هتمشى بس مش هنساها لأنها هتفضل دايما معايا ، بهداياها اللى عندى ، حواليا ، و جوايا
*
*
Dear 2007 .. i do LOVE you
Big Hug ...
