اللى يعرفنى كويس هيعرف انى مش بتاعة رمضان جه فكل سنة و انتو طيبين و العيد جه فالعيد فرحة يا سلام بس بما ان السنة دى سنة مميزة و لان أول يوم العيد الموافق 13/ 10 موافق يوم عيد ميلادى و ده عاملى حالة نشوة و بهججة زيادة فلازم احتفل لنفسى بالمناسبة دى .
رغم عدم استيعاب الكثيرات من سعادتى بتقدمى فى السن الا انى مليش دعوة انا فرحانة و خلاص .
أولاً
ساعة ما كملت 21 سنة انبسطت لانى حسيت ساعتها ان دى نقطة الصفر للبداية الحقيقية
ثانياً
يوم ما كملت 22 سنة كنت أسعد لانى حسيت ان مرحلة الصفر الكبير انتهت و ان انا وصلت لسن بدء التنفيذ الحقيقى و بالفعل فخورة بانجازاتى خلال السنة اللى فاتت دى و اللى باقى عليها كام يوم وعلى سبيل المثال لا الحصر :
حصلت على شهادة تخرجى بمعنى الورقة اللى تثبت انى فعلا اتحررت من ضجر و عفونة العالم الصيدلى ، قصيت شعرى و دى كانت خطوة مش سهلة و المدهش انى كررتها 4 مرات بعد كده كانت آخرهم امبارح و قصيته أوى جدا من غير ما آخد إذن حد ، كورس اليوجا اللى أخدته ثلاثة شهور متتالية ، قرارى بانى اشتغل فى مجال تعليمى و دى كانت خطوة شبه مستحيلة ، تحقيقى الاستقلال المادى التام عن أهلى ، قرارى بالنشر و ان شاء الله ديوانى الأول هيبقى خلال أكتوبر ده برضه يعنى خلال أيام ، معركتى مع اهلى بخصوص دراسة التذوق الفنى و مكسبى و بدأى الفعلى للدراسة ، بالإضافة للطفرة الموسيقية اللى حصلتلى على مستوى انتقاء المزيكا المفضلة بالنسبة لى و اكتشافى عالم جديد مدهش من الموسيقى و الأغانى ، أما الأهم فعلى المستوى الاجتماعى حصلتلى عملية فلترة غير متعمدة انما مدهشة قدرت أوقع ناس من حياتى كانوا فى يوم مهمين من غير ما يجرالى حاجة ، عرفت وشوش على حقيقتها ، أضفت قبس من نور من خلال أفراد معينين لازم يكونوا عارفين نفسهم و انهم من أروع الانجازات اللى حصلتلى فى 2007 ، عمقت علاقتى بأفراد مهمين كانت علاقتى بيهم سطحية ، و الأجمل انى تصالحت تماما مع عيوبى و ذلاتى الشنيعة اللى كنت مش بقدر حتى استوعبها ده كله خلانى واثقة من الطريق و من خطواتى و ناوية باصرار أكمّل كل ده يوصلنا ل
ثالثاً
انتظارى السعيد ليوم السبت لما أوصل ل 23 سنة علشان حاسة انى أكثر أنوثة و إنى تخطيت السلمة الأولى فى الطريق و ده يدينى طاقة أكبر لمزيد من التوغل داخل أدغال الحياة
باختصار شديد من كل قلبى بمنتهى الصدق و الحب
ياسمينتى
فخورة بيكى السنة دى
و طبعا بتمنالك الخير
كل سنة و أنا و انتى طيبين
و على رأى نورا
ياريت
تحاولى
تاخدى بالك من نفسك
