Thursday, December 14, 2006
ليــل الشتــا


بالليل أوى
لمّا الشتا يحاوط الدفا
بحتاج كتاف تحمينى من برد الوجع
إيدين تطبطب ع الدماغ
و لسان يقولى ماتخافيش
لسه الأمل قدام كتير
يمكن شعاع السكة غاب
بس اسمعى بُكراكى مش بعيد أوى
و فى يوم هييجى صدقى
فجأة السما تبعت دموعها
عشان تآنس وحدتى
أفرح أوى
و أمّا أفوق من حلم دافى
فى ليل شتا
ألاقينى جامد برتعش
ألبس هدومى كلها
و بخوف حزين أهرب بروحى من الصدى
و أنزل قوام و أنا بنتفض
تحت اللى أقابله من الغطا


ملحوظة
بكراكى = بكرة بتاعك
 
posted by Yasmine Adel Fouad at 12:43 AM | Permalink |