عارفه إنك مش غاوى قراية كلامى بس اتطمن الرسالة دى بالذات لو مقريتهاش مش هعرف و لا ناويه اهتم ، المهم دلوقتى إنى لازم أقولك شوية حاجات كده ..
قبلك .. مكنش فيه حاجه تقدر توجعنى ، أو خلينى أقول كان اللى بيوجعنى برميه ورا ضهرى ، بمنتهى البساطة أمشى و أسيبه من غير لا ندم و لا حزن و لا دياوله مجرد خربوش صغير يفكرنى من وقت للتانى إنى قوية ، ضد الكسر ، و بعرف و لو ف الآخر أهرب ، كنت واحدة بايعة كل اللى مش شارينها ، راسمه طريقها و راضيه بيه ناقص كان أو مليان ، عندها قضية شغلاها تخص ذاتها اللى طلباتها مبتنتهيش و رغباتها واجبة الإشباع و هى الخانة الأولى و الثانية و الثالثة فى سلم أولوياتها و من بعدها كل حاجه مهما كانت قيمتها تقدر تقول عليها مش مهم .
و معاك .. شوفت الحياة بشكل تانى ، كإن الألوان فجأة اتولدت على إيديك ، و ف لحظة اتصورتها وقتها مباركة تَوجِـتَّك إله و طرت م الفرحة لما اخترتنى عشان أكون عبدتك الوحيدة ، و قررت بمنتهى العصيان للروح اللى جوايا أكون مطيعة و أغمض عينيا ، و قدرت فعلاً أخليك الخانة الأولى و الثانية و التالتة و رضيت لنفسى بالخانة الأخيرة لكن عشان إنت مش إله و مش كامل و شهوة الامتلاك مالكاك فضلت عينك ع الخانة بتاعتى ، و حاولت .. آآه حاولت أشطب اسمى و أحطك فيها بس كان صعب ، لحد ما صحيت ف يوم ملقيتنيش ، لا ورا و لا قدام ، لا ف أولوياتى و لا ف أولوياتك ، فاتكسرت ، وقتها بس افتكرت إنى قبلك كنت ضد الكسر ، فكان طبيعى إنى أقرر أسيبك و قبل ما أمشى حبيت أقولك إنى خرجت فريش و بضحك و إن قلبى مش ممرر و جوايا مش حزين ، و إني مش ناقمه عليك إطلاقاً ، لإن ببساطه بصمتك على روحى زالت ، أصلك غشيم و متعرفش إن المرارة عشان تروح لازم تاخد معاها الشعور بالوَحشَه و الامتنان للوجود و حلاوة الحنين و الأمان اللى جوه الحضن و شوية الحب اللى كان موجود ، بس فداك عارف ليه ؟ عشان العيب مش عليك ، العيب على الحياة الواطيه اللى بتخلى الأحرار أمثالى يتعلقوا بالغرباء أمثالك ، و إوعى تفتكر إن الغرباء جايه م الغرابه لا خالص .. دى جايه م الاغتراب .
على فكرة أنا مش عايزاك تتغير بالعكس إفضل زى ما إنت و اعرف إن اللعنة المسحورة اللى كانت حوالين رقبتى اتكسرت و وقعت فى البحر عملت طِشّ كبيييرة ، أصل اللى عمرى ما قلتهولك إن اللعنة كانت سخنه و بتحرق ، فياريت قبل ما ترمى لعنتك على ست تانية تعَـدِّل فيها و تخليها فى صورة آيس كريم بالمستكة و الليمون أهو منه فيه مزازة و بيلسع و منه طراوة ع القلب اللى هييجى من بعدى ، يمكن مفعول لعنتك يطول لما يصيب قلب واحدة غيرى معندهاش استعداد أو حتى مبتعرفش تقاوم الآيس كريم .
قبلك .. مكنش فيه حاجه تقدر توجعنى ، أو خلينى أقول كان اللى بيوجعنى برميه ورا ضهرى ، بمنتهى البساطة أمشى و أسيبه من غير لا ندم و لا حزن و لا دياوله مجرد خربوش صغير يفكرنى من وقت للتانى إنى قوية ، ضد الكسر ، و بعرف و لو ف الآخر أهرب ، كنت واحدة بايعة كل اللى مش شارينها ، راسمه طريقها و راضيه بيه ناقص كان أو مليان ، عندها قضية شغلاها تخص ذاتها اللى طلباتها مبتنتهيش و رغباتها واجبة الإشباع و هى الخانة الأولى و الثانية و الثالثة فى سلم أولوياتها و من بعدها كل حاجه مهما كانت قيمتها تقدر تقول عليها مش مهم .
و معاك .. شوفت الحياة بشكل تانى ، كإن الألوان فجأة اتولدت على إيديك ، و ف لحظة اتصورتها وقتها مباركة تَوجِـتَّك إله و طرت م الفرحة لما اخترتنى عشان أكون عبدتك الوحيدة ، و قررت بمنتهى العصيان للروح اللى جوايا أكون مطيعة و أغمض عينيا ، و قدرت فعلاً أخليك الخانة الأولى و الثانية و التالتة و رضيت لنفسى بالخانة الأخيرة لكن عشان إنت مش إله و مش كامل و شهوة الامتلاك مالكاك فضلت عينك ع الخانة بتاعتى ، و حاولت .. آآه حاولت أشطب اسمى و أحطك فيها بس كان صعب ، لحد ما صحيت ف يوم ملقيتنيش ، لا ورا و لا قدام ، لا ف أولوياتى و لا ف أولوياتك ، فاتكسرت ، وقتها بس افتكرت إنى قبلك كنت ضد الكسر ، فكان طبيعى إنى أقرر أسيبك و قبل ما أمشى حبيت أقولك إنى خرجت فريش و بضحك و إن قلبى مش ممرر و جوايا مش حزين ، و إني مش ناقمه عليك إطلاقاً ، لإن ببساطه بصمتك على روحى زالت ، أصلك غشيم و متعرفش إن المرارة عشان تروح لازم تاخد معاها الشعور بالوَحشَه و الامتنان للوجود و حلاوة الحنين و الأمان اللى جوه الحضن و شوية الحب اللى كان موجود ، بس فداك عارف ليه ؟ عشان العيب مش عليك ، العيب على الحياة الواطيه اللى بتخلى الأحرار أمثالى يتعلقوا بالغرباء أمثالك ، و إوعى تفتكر إن الغرباء جايه م الغرابه لا خالص .. دى جايه م الاغتراب .
على فكرة أنا مش عايزاك تتغير بالعكس إفضل زى ما إنت و اعرف إن اللعنة المسحورة اللى كانت حوالين رقبتى اتكسرت و وقعت فى البحر عملت طِشّ كبيييرة ، أصل اللى عمرى ما قلتهولك إن اللعنة كانت سخنه و بتحرق ، فياريت قبل ما ترمى لعنتك على ست تانية تعَـدِّل فيها و تخليها فى صورة آيس كريم بالمستكة و الليمون أهو منه فيه مزازة و بيلسع و منه طراوة ع القلب اللى هييجى من بعدى ، يمكن مفعول لعنتك يطول لما يصيب قلب واحدة غيرى معندهاش استعداد أو حتى مبتعرفش تقاوم الآيس كريم .
