YUK
كل حاجة لازم يكون ليها أول مرة
محدش بيتولد كده فاهم و عارف
و محدش برضة بيموت عارف كل حاجه
بس النقطة اللى بتستفزنى
إصرار البعض اللى بتتاحلهم الظروف على رفس النعمة
و الاستهزاء من معتنقها
و الموضوع ده بيضايقنى خصوصا لما يكون متعلق بالفن
فعلى سبيل المثال
من 3 سنين كده أخدت قرار إنى
بالنسبة للقراية
مش شرط أقرأ كتاب حد قراه قبل كده من أصحابى
و مش شرط يكون الكاتب أعرفه
لكن مادام العنوان و من خلال نظرة سريعة
لقيتنى متشوقة للمحتوى يبقى خلاص
فهمت نفسى ان مفيش حاجه اسمها مش هكمل قراية الكتاب
لان أى كتاب غالبا هيكون فيه فكرة أو هستفيد منه
أو أضعف الايمان لو معجبنيش هتعلم ان الكاتب ده مش كاتبى المفضل
لكن مقدرش أحكم على اسلوب حد من كتاب واحد
سواء عجبنى أو لا
لان تعميم الحكم ده مينفعش
أما بخصوص السينما
فبرضه علمت نفسى ان يكون ليا رؤية
و ان مش قضيتى جماهيرية الفيلم شكلها ايه
مادمت حاسه ان ليه هدف يناسبنى أنا
و لو قولنا الموسيقى
فأنا عادتى مش بصد صوت جديد عن ودانى
خصوصا لو الصوت ده قديم و أنا معرفهوش
يعنى وجيه عزيز عرفته بالصدفة من سنة
لما واحد بعتلى أغنية و عجبتنى فقررت أدور أنا بقى على أغانيه
كذلك الشيخ إمام
أميمة خليل عرفتها من واحدة صاحبتى
كانت مصممة انى اسمع اغنيه لأميمة
كاميليها جبران عرفتها صدفة لما واحد جابلى سى دى
هدية أيام عيد ميلادى
و حطلى فيه المزيكا اللى هو بيحبها
كل ده عرفته بالطريقه دى
أما الرسم فأنا مليش فيه
بس بحب لما ابص لأى لوحة أحسها
ميهمنيش اعرف الفنان عايز يقول ايه بالظبط
بس يهمنى يوصلنى منها شعور
انما لما تلاقى بقى ناس جاتلها فرصة تعرف نوع مختلف من الفن
و تلاقيها مش بس بترفض لكن كمان بتستهزأ
تلاقى نفسك بتقرف .. بتقرف أوى
و ده حصللى كتير
بس كان آخرها لما نزلت سيديهاتى على كمبيوتر الصيدلية
علشان لو حبيت أسمع حاجه هناك بما ان الكمبيوتر مش عليه حاجات كتير
فلاقيت ان الدكتور و المساعد ميعرفوش الناس اللى بحبهم دول
فقلتلهم طب اسمعوا مثلا أغنيتين كده و احكموا
تلاقيهم بقى يرضوا عليك و يقولوا
مين وجية رستم و للا فوقية خليل و للا مسعدة
مين الناس دول
مش فرض ثقافة بس مبحبش حد يحكم على حاجه ميعرفهاش
يعنى انا مقدرش اقول على سعد الصغير هابط
لكن اقدر أقول الفن بتاعة مش بحبه
و أقول كده بس بعد ما أسمعله مش قبل كده
فى الوقت اللى كنت بلاقى الدكتور بيعايب على المساعد
لانه مش بيحب يسمع فيروز و لا عمر خيرت
طب ما هى هى أهى
الله يخرب بيت الازدواجية
و اللى يغيظك انه بيقوللى
انى بفهم علشان بحب عمر خيرت و فيروز
لكن غريبة علشان بسمع وجيه عزيز و الباقيين
مع ان المفاجأة
ان امبارح قالولى مين الناس اللى صوتها حلو دى
علشان ماكانوش عارفين
ان دول هم دول
و لما قلتلهم دول اللى كنتو بتعايبوا عليهم
مقدروش ينطقوا
بعدين بقى تيجى تلاقى حد بيقول
عمارة يعقوبيان ده مش فيلم أصلا
و دم الغزال ملوش لزمة
و أوقات فراغ قلة أدب
و ليلة سقوط بغداد تخلف عقلى
- مع ان ممكن يكون ما شافهمش أصلا -
- و ده فى الغالب كمان -
إنما فيلم كتكوت و بوحة اوعى بقى
تعمل ايه ؟
مش القصد انى اعايب على بوحة لانى ما شفتهوش
ولا اقدر اقول ان دى ناس مبتفهمش
لكن غصب عنى بحس بالقرف
يمكن فى الأول الناس دى يصعبوا عليك انهم متربسين أوى
بكرر مش قصدى ان رأيى هو اللى صح خالص
بالعكس بحترم النقد الفنى و الرؤى المتعددة
بس انك تبقى رافض الاطلاع على اى حاجة لانك متعرفهاش ده يبقى فعلا
YUK
و لما ييجى يوم يسألوك انت ليه بتحب الفن ده
تلاقى نفسك مستخسر حتى تجاوبهم
