و أنا لوحدى
بعمل حاجات كتير قوى حلوة
بحاول أستمتع مع نفسى مادام مش مخنوقة
ده عادى و طبيعى
لكن
اللى الناس حتى اللى يعرفونى
مستنكرين انى أعمله لوحدى
نشاطين
*
*
**
أولهم
إنى أروح سينما لوحدى
صحيح الكام مرة اللى روحت فيها السينما لوحدى
أأقل من صوابع الإيد الواحدة
وصحيح أول مرة كنت مضطرة
علشان محدش من أصحابى رضى يروح معايا الفيلم ساعتها
لانه رومانسى
إلا إنى استمتعت جدا
و بجد الفرجة مع نفسك كده
بانطباعاتك و تركيزك حاجة جميلة
زى ما السينما مع أصحابك و قرايبك
حاجة برضة جميلة
دى ليها متعة
و دى ليها متعة تانيه
اعتقد ان اسعاد النفس لنفسها ده فن
من أمنياتى أتعلمه و أتقنه
علشان مش دايما هتلاقى جنبك حد
و ده مش عيب ده شئ وارد
المهم ساعتها ماتموتش علشان لوحدك
ثانى نشاط ليا بعمله لوحدى
هو إنى أنزل أشترى لبس لنفسى طبعا
لوحدى
بقالى سنتين ع الحال ده
فى الأول بقيت أنزل لوحدى
لان أنا و ماما دايما بنختلف فى المحل
هى عايزانى أجيب استايل معين
و أنا عاجبنى حاجه تانيه
و بتكون النهايه الوحيدة
ان ماما ترميلى الفلوس
وتقولى اعملى اللى انتى عايزاه
و بأمانه اعملى اللى انتى عايزاه دى
معناها اعمل اللى أنا عايزاه
معتقدش معناها
انى أقول
خلاص اللى تشوفيه يا ماما
و بيكون الحل انى باخد الفلوس
و أشترى اللى على كيفى
و أخرج أقول لماما يللا نروّح
فبعد 20 سنه الست تعبت
و نفذت جملتها اللى سمعتها كتير دى
آخر مرة هنزل معاكى وانتى بتشترى حاجة
و قد كان
بقالى سنتين بنزل مع نفسى
مش باخد و لا أصحابى حتى
و الصراحة لما بنزل لوحدى
بيبقى فى سرعة وانسيابية فى الأداء
و بنجز بسرعة
بس سبحان الله رغم انى مرتاحة كده و دماغى رايقه
الا ان بعض الناس بتستغرب
فى نشاط كمان بحب أعمله لوحدى
بس اعتقد ان فى ناس غيرى بيعملوه
وهو انى بحب اقعد ع البحر لوحدى
يمكن لإنى لما بقعد مع حد
بفقد خصوصية الإحساس
