الموضوع ده بقى بجد شاغلنى بقاله كتير
طول حياتى تقريبا
بالنسبة للامور العامة فى حياتى فانا صريحة جدا جدا جدا و تقريبا ده داء عائلى لان كلنا كده
و صراحتى طوب زى ما أصحابى بيقولوا يعنى بدب رأيى كده من غير تزويق
خصوصا لو الحد ده أنا اعرفه كويس قوى .
اكيد فى فرق بين الصراحة و البجاحة بس ده ممكن الواحد يراعيه لما يكون بيدى رأيه فى لبس او شكل لكن فى مشكلة و قضية يبقى نجيب م الآخر .
علشان كده مش ده الموضوع اللى بتكلم عنه بمعنى مش الصراحة م الناحية دى .
أنا بقى قصدى الصراحة فى إبداء المشاعر و العلاقات الشخصية بصفة عامة سواء عاطفية أو مهلبية .
فى البلداية
أحب أقول إن رأيى الشخصى ما كونتوش من فراغ لكن من خلال تجارب حياتية
اخدت الشر و راحت و سابتلى علامات تخلينى آخد بالى .
نيجى بقى للأسئلة اللى هنا ..
فى ثقافة سايدة فى المجتمع
- فى اغلب طبقاته -
بإن البنت اللى تعبر عن مشاعرها تبقى مجرمة و أذنبت لانها معندهاش كرامة و رخصت نفسها و شكلها بقى فى الزبالة و كده الولد او الراجل هيقول ده هى اللى حفيت ورايا و يديها على ام نافوخها
لكن فى نفس الوقت الولد اللى يعبر للبنت عن مشاعره ده عادى جدا و طبيعى و فتك و وواد جامد و شجاع
الله علينا معايرنا المزدوجة تحفة فعلا .
مش رأيى ان البنت لما تحب حد تروح تقوله تتجوزنى ؟
لكن فى نفس الوقت رافضة الصورة اللى بتتاخد عن المجرمة اللى فرطت فى حاجة حلوة لما تروح تقول لحد انها بتحبه
لو سألنا السؤال بشكل صريح هل ترضى ان البنت تيجى تقولك بحبك ؟
هل هتستشعرها و تبصلها نفس البصة الاولانية ؟
معرفش اجابة الناس اللى فاهمة و مش حافظة ايه
بس انا أأقدر اتكلم على اساس انى بنت
انا معنديش شجاعة أقول لواحد بحبك
وده مش لانه شئ غلط لو علشان مين هيقول عليا ايه لكن لانى زى ما قلت مش شجاعة أو جريئة للدرجة
لكن معنديش مانع ألمحله و اخليه يفهم و بعدين أستنى الخطوة اللى الناس فاكرينها الاولى .
دى ازدواجية ؟
معرفش
بس انا فعلا مش بعمل كده علشان نظرة مجتمع أو نظرة اللى بحبه لانه لو استرخصنى يبقى مايلزمنيش من اولها لكن بعمل كده علشان لو هو مش عايزنى فممكن نحافظ على ما تبقى من علاقتنا الاولى سواء صداقة او أيا كان مسماها .
و ده يودينا لنقطة مختلفة هو فى حب يتقلب صداقة ؟
زمان كنت بقول أبدا لا يمكن لكن دلوقتى ممكن أقول انها قدرات و صدق مع النفس و طاقة .
ده موضوع كبير عموما و مش قضيتنا دلوقتى
نرجع لموضوعنا تانى
بالنسبة لى بحترم البنت الصادقة مع نفسها
و من خلال تجارب زى ما قلت الصراحة بتوفر وقت ابن لذينة و بتجيب من آخر الآخر .
يعنى من خلال علاقاتى بالناس أأقدر أقول ان فى 3 علاقات فى حياتى ماكنتش صريحة فيهم و هحكى باختصار عن اتنين منهم .
علاقة كنت فيها مع شخص تانى و عرفت بالصدفة من الشخص نفسه عن فعل اتعمل ما يرضنيش انى افضل عارفة الشخصية دى بعدها و الفعل ده يسيئ ليا بشكل غير مباشر و رغم انى ما سألتش عن تفاصيل او توقيت الفعل لانه ربما اتعمل فى وقت يسيئ ليا لكن بشكل سطحى الا اننى اتدعيت انى مازعلتش من اللى حصل و لما الشخص اللى حكالى سألنى زعلت و للا لا قلتله لا طبعا يكفى انك انت اللى حكيتلى لكن بينى و بين نفسى كنت واخدة قرار خلاص معاملتى هتختلف و مسمى علاقتنا كمان هيختلف .
و لأول مرة فى حياتى أفكر بعقلانية اكتشفت انها هبل بعدين و ما عملتش مشكلة بالعكس أنا بدات ابعد واحدة واحدة لحد ما الشخص ده بقى شبه مش موجود فى حياتى و لما اتأكدت ان خلاص هكمل لوحدى من غير اى ضرر نفسى كلمت الشخص ده و قلتله ان علاقتنا هترجع درجة لوراء و تروح لمرحلة أأقل و لما اتسألت عن السبب كانت اجابتى عادى أنا عايزة كده لانى مش حاسة علاقتنا زى الاول .
دلوقتى لما بفتكر الكلام ده و اللى مر عليه حوالى 6 سنين بقول ياااه طب و انا ماكنتش صريحة ليه م الاول ربما الشخص ده كان هيبقى عنده مبرر واهى للى عمله أو هيعترف بغلطه أو هيقول معلش آخر مرة
ربما حتى هيقولى أنا كده و ده اللى عندى ساعتها كنت هديلة بالجزمة و انا ضميرى مستريح .
لما بفتكر و أقول الشخص ده لو حد سأله و قاله ليه ياسمين عملت كده هيرد و يقول ايه بفكر انه هيقول لانها هوائية و انانية ياااه يعنى الغلط نط من عنده بقى عندى .
ده مثال لعلاقة ماكنتش صريحة فيها و ربما اعيش عمرى كله ااقول لو كنت صريحة كنت هبقى فين دلوقتى . اكيد مش ندمانة لان الندم تانى غلطة للبنى آدم
لكن ساعات بفتكر و أسئلة ماذا لو تقعد تنخور فى نافوخى .
ثانى علاقة ممكن اتكلم عنها فى نفس القضية ببساطة كنت حاسة مشاعر ناحية حد و انا زى الحمارة بيبان عليا و عينيا بتفضحنى و كل حاجة حلوة بتحصل .
كانت فى دلالات ان الشخص ده - المفروض - عنده نفس البوادر .
و فى مره لما اتاكد من مشاعرى سألنى و قالى على بلاطة كده ياسمين انتى بتحبينى ؟
ردى السريع جدا كان لا طبعا
و تحت طبعا حطوا مليون خط أنا قلت فى عقل بالى اولا باين انى مياله ليه ثانيا أنا أقوله يقولى بس انا مش بحبك يافرحتى بنفسى ساعتها مش بقول كنت المفروض أقول آه بحبك يا حلاوة لكن كان ممكن اى رد غير لا طبعا و ياريت ردى عمل نتيجه كان رده والله كل حاجة تانية بتقول غير كده . ساعتها قلت خلاص بقى هو واثق منى يبقى خطوته و الكورة فى ملعبه لكن ما اتحركش و ساعتها عرفت ان خلاص كده مينفعش لان لو كان فى حاجه كانت حصلت بس فى التجربة دى رفضت انى أأقفل على جرح من غير ما انضف مكانه وواجهته فعلا و قلتله انا عايزاك تعرف حاجة واحده انى لما حسيت مشاعر ناحيتك كانت نتاج كلام و تصرفات انت عملتها و يكفى انك كلمتنى مره ع الجواز ساعتها وشه جاب الوان و قالى انى بكدب و انه معملش كده و رغم ثقتى بنفسى وفى ودانى و فى عينى بس حاولت افكره و كان رده بسيط جدا انا لو كنت قلتلك كده يبقى حقك تتعلقى بيا و يبقى الغلط غلطى انا لكن انتى بتتبلى عليا .
آن آن ااااان تششششششششششش
الجملة كانت ضربة فى مقتل لكنها فوقتنى و خليتنى وقفت على رجليا تانى بسرعة
و حلفت انى ما اسمعش كلام و احوشه و استنى اشوف اللى قصادى عايز ايه .
و قد كان
من ساعتها لما بحس ان حد بيلمحلى بحاجة مادام مش ببادله نفس المشاعر و انا شبه متاكده من تلميحاته بقوله جملة واحدة بس انت عايز ايه بالظبط علشان نوفر وقتنا ..
والله قالى انه بيحبنى او معجب بيا او مشدود و كل الحالات اللى اتحطيت فيها كنت مش ببادل اللى قدامى نفس المشاعر " حتى الآن "
فكان ردى بسيط مبقولش انت زى اخويا علشان دى جملة بتستفزنى بس باقول أنا مش بفكر فى الموضوع ده دلوقتى و الارتباط مش أول اهتماماتى دلوقتى
بس لاحظت ان فى ناس بتقولى طيب لما تفكرى ترتبطى قولى فغيرت البقين بتوعى بقى و بقيت أقول انجذابك ليا ده وهم و علشان انت ماتعرفنيش كويس و مش شايف غير اللى انا موريهولك منى لكن انا فيا حاجات تانية زبالة كتير و للأمانة معرفش ايه بيشد فى الجمله دى و بيخللى اللى قدامى يستميت اكتر و مش بقول الكلام ده علشان ارسم دور لنفسى لكن فعلا انا عايزة اثبت فكرة .
يعنى الحد ده كان ممكن يفضل يفكر اد ايه و يلمح بكلام و فى الاخر اطلع انا و لا هنا لكن صحيح جرحته لكن الضربة اللى ما بتموتش بتقوى و فى نفس الوقت انا بساعده يفوق أسرع و عادة مش بقطع علاقتى بالاشخاص دول بالعكس بفضل فى حياتهم بمقار أأقل طبعا علشان يفوقوا بشكل اقوى ربما هى سياسة غلط بس أنا شايفه ان لو حد ما بيحبش واحد تانى بيحبه و قاله احسن ما يفضل معشمه لان فى نوع من الحب اسمه حب الامتنان و ده الواحد بيحسه ناحية الشخصيات اللى بتحبه من طرف واحد بمعنى انه بيحب فيه حبه ليه فبيعامله كويس كنوع م الشكر و كنوع من التثبيت علشان يفضل عايش نفس الاحساس الجميل بانه مرغوب . يافرحتى يعنى . اعرف واحد فضل يحب واحده من طرف واحد 7 سنين لحد ما اتخطبت يا حلولى ما ياتقولها يا خلاص فكر فى حياتك .
اللى خلانى افكر ف الموضوع ده اكتر ان واحدة قريبتى بتكلم واحد على اساس انه المفروض يعنى هى فاهمه انه هيقولها بيحبها و بقالهم ع الحال ده سنه لا هى نطقت و لا هو نطق قلتلها يابنت الناس طيب اسأليه انت عايز ايه منى ؟ بيحبك هيقولك معندوش امكانيات يتقدملك دلوقتى هيقولك مش عايش من وشك حاجه هيقولك و انتى ترتاحى لكن لزمتها ايه الدوخه دى و نظام افلام انا اتقدملى عريس علشان تلحلح الواد و فلان عايز يرتبط بيا . يا امى ع الشلل . معتقدش ان فى جملة عايز ايه أباحة بالعكس ده فكر منظم يا جدعان ولو قالها مش عايز حاجه احنا اصحاب و بس مش معنى كده انها مدلوقة عليه ممكن بصنعة لطافة تقوله الحمد لله انا كنت فاكرة غير كده و يبقى أبوك عند اخوك و للا معرفش بيقولوا ايه
حد فهم حاجة م الموضوع و للا انا عكيت و خلاص ؟!
المهم يعنى السؤال الرئيسى اللى يخلص الموضوع ده كله مين احسن البنت \ الولد اللى بيلخص و يجيب م الآخر من غير لف و دوران و للا البنت \ الولد المسهوكين اللى بيعملوا أفلام لحد ما الوقت يضيع و يكونوا عاشوا الوهم المتين ؟
ملحوظة أخيرة
للف و الدوران مذاق جميل لا يُنكر
ربما كان الخط المستقيم هو أقصر طريق بين نقطتين لكنه أقصرها عمرا و أقلها خبرة و ليس بالضرورة أفضلها انما بيوفر وقت ابن لذينة برضه
و لكل قاعدة شواذ و اللى يتطبق هنا ما يتطبقش هناك
و سمعنى اجدع سلام
----------------------------------
فاصل كده بقى
علشان اريح البلوج منى شوية
و لو حد عايز يقرأ علشان الناس اللى بتشتكى تاخد وقتها
ولانى فعلا عايزة أركز فى الكتابة شوية
معلش ع الصداع
معلش ع الصداع
دواء الصداع للبلوج كله على حسابى
احنا بنشترى زباين .
