إيه يا ترى يا هل ترى
مالى كده متغيرة !!؟
قلبى انخطف
قلبى انخطف
لونى اتقطف
معرفش ليه متحيرة***
رغم إنى مش بحب الأرقام الزوجية بس كنت متفائلة جداً ب 2008 كنت مقررة أديها فرصة حقيقية بحسن نية و سماحة قلب ، و ده كان مخلينى مبسوطة من نفسى و عندى ثقة ف بكرة اللى هيحبنى زيادة بسبب انى آمنت له و أمنت بيه ، كنت حاسه ان 2008 شايلالى كتير ، لا كنت شبه متيقنة من ده ، كنت محددة كمان هى هتدينى إيه بالظبط ، و كنت كل ما يوم يعدى من السنة أبقى حاسة انى فيه على ميعاد لحد بشكل ما أو بآخر اتحققلى الحاجات اللى كنت مستنياها ، و خلصت 2008 أو بمعنى أصح بتطلع النفس الأخير أهى و كان عندى فوبيا انها جابت الحاجات بس هتاخدهم معاها تانى و هى ماشية ، كنت خايفة أطلع ساذجة و اتعشمت فيها زيادة عن اللزوم ، المهم آدى 2008 بتودّع على أد ما حبيبتها و فعلاً بحبها بشكل مميز لان هديتها ليا فيها عارفة انها بشكل ما مش هتتكرر أقله مش بنفس الكيفية العبقرية دى ، انما أنا بنام و بصحى بحلم ب 2009 اكمنى مستنية منها حاجات أكتر ، عندى مشاريع و أحلام و أحاسيس مش هتكمل و لا تتحقق غير ف السنة الجديدة أو على أقل تقدير خططى الزمنية لمشاريعى المصيرية متحددة وفقاً لمسيرة 2009 دى ، رغم انى بطبيعتى مش انسانة متشائمة و بفترض دايماً حسن النية و بقدّم المشيئة و فوق كل ده و ده بحب الأرقام الفردية لكن قلبى حاسس ان 2009 هتخدعنى ... هتعمل فيّا حركة دنيئة و لا أجدع مقص ، مش عارفه بس فعلا حاسة ده ف الجو ، يمكن عشان موودى مش متظبط ؟ لا أنا حتى و أنا كويسة و بنت حلال لسه عندى شعور ما بالخيانة ، و بيعلا لليقين .. أنا فعلاً خايفة و مش واثقة ف السنة الجديدة خالص ، يمكن عشان أنا أولاً مؤمنة بإن تصديقنا لشئ معين كافى انه يحققه و ثانياً عندى تصوّر شبه محدد للضربة هتيجى منين و للا يمكن عشان أنا مضطرة أستنى !! مممم مش عارفة ، مش حابه خالص الموود اللى أنا داخلة بيه سنة جديدة ده ، بس كل اللى أقدر أقوله لنفسى إن ربنا مش بس كبير و قادر على كل شئ لا ده الأهم من ده كله إن ربنا جميل و أنا هستودعه أمنياتى و أحلامى و من غير جدال الخيرة فيما اختاره الله .. على بركة الله طيرى بينا يا 2009 و لا تقوليليش السكة منين
***
حد قالك خاف ؟ قالك خاف ؟ خوفت ليه !!؟
حد قالك تووه ؟ قالك تووه ؟ توهت ليه !! ؟
حد قالك شمس بكرة مش هتيجى؟
هتيجى .. هتيجى
حد قالك إن حلمك مش حقيقى؟
حقيقى .. حقيقى
*
*
على الهامش
المقطع الغنائى الأول من أغنية " اسمه الهوى " ل .. شادية
المقطع الغنائى الثانى من أغنية " ليه " ل .. أميمة خليل
