Ladies and gentlemen
the party up
We about to get it on
.....
سيب بكرة و بعده و بعده تصحى تلاقى نفسك يوم ( 13 ) أيوة هو ده اليوم المقصود .. هو ده يوم عيد ميلادى ، 24 سنة بالتمام و الكمال، ما اعتقدش انهم ضاعوا هدر لا ده أنا اعتقد كمان إن من حقى أقول إنى حققت فيهم إنجازات شخصية \ حميمية \ اجتماعية أفخر بيها ، بس قلبى حاسس و أنا بكتب إن فيه " بس " ف الموضوع
*
*
السنة دى فيه حاجة جوايا مش متحمسة أوى لعيد ميلادى أو بمعنى أدق مش متفرغاله ، السنة اللى فاتت كنت عامله لنفسى و لوحدى هيصة و زفة ، و السنة اللى قبلها عملت عيد ميلاد فعلاً و عزمت أصحابى و قرايبى . أيوة ده أول عيد ميلاد يعدى عليا و أنا مخطوبة و ده أكيد يديله نكهة مختلفة و خصوصاً إنى عارفة إن عيد ميلادى بشكل ما هيبقى مُحتفى بيه بشكل لم أعهده من قبل .. طب ما هو يمكن عشان كده أنا سايبة إيدى اكمنى عارفة إن حد تانى شايلنى ، مش عارفة !! كنت بفكر اعمل عيد ميلاد أجمع فيه كل أصحابى و قرايبى مين عارف هقدر أعمل الحركة دى تانى امتى انا معرفش عيد ميلادى السنة الجاية هيبقى إيه ظروفه و للا هبقى فين ، اعتقد ان الفكرة قيد التنفيذ
*
*
كل شوية ألاقى حد بيكلمنى عن عيد ميلادى المُنتظر ، بحس انى فاقدة شهيتى للاحتفال .. يمكن فى جزء من اللاوعى منتظرة شئ مجهول حميمى .. مستنياه يدينى الأمارة إن عيد ميلادى جه ، و يمكن أنا من ضمن التغيرات الكتيرة اللى شملتنى كان الاتجاه نحو مزيد من الخصوصية حتى ف المناسبات العامة ، لسه فى طور الاكتشاف
*
*
لمّا فكرت ان عيد ميلادى كمان كام يوم لقيتنى بقول ياريتنى كنت هكمّل 25 و يبقى كده رقم مقفول على ذاته ، ربع قرن يا سلام ، بس الصراحة مقدرش أقلل من شأن السنة اللى مريت بيها دى ، من أكتوبر اللى فات لاكتوبر ده حصل حاجات كتير أكيد ، بدأت دبلومة التذوق و عديت أول سنة و أدينى اهو ف اللى وراها ، نشرت ديوانى " نَـفَـس آخر ف الحجرة " ، و بعدين بقى هلّت عليا 2008 ، أنا بطبعى كارهة للأرقام الزوجية يمكن عشان كده عندى فردية عالية أو يمكن العكس إنى مبحبش الارقام الزوجية عشان فرديتى العالية !! المهم آخر يوم فى 2007 حسيت انى حابة أدى 2008 فرصة ، لقيتنى مبتسمة و بقول أنا واثقة ف 2008 و قلبى بيقولى إنها شايلالى حب و جايبالى رزق ، معرفش ليه بس كنت مصدقة ده وآدى ربنا مخيبش ظنى و لقيت أكتر ما اتمنيت كمان
*
*
الصراحة أقدر أقول بقوة ان موودى قبل كتابة البوست غير دلوقتى خاااااااااااالص يمكن أكون هيأت نفسى ان عيد ميلادى جاى .. أقدر أقول برضه ان فيه طيف جوايا بقى مستنى اليوم ده .. أكيد مش ده يوم ميلادى اللى هعلن فيه إصرارى على الميلاد .. أيوة أنا هحتفى بيّا و هفاجئنى و هدّى كمان فرصة لكل اللى بيحبونى يحتفوا بيا كل بطريقته و ساعتها يمكن آجى أحكى عن اليوم المُنتظر
*
*
" كل سنة و أنا طيبة "
