عارفة من غير أى شك إنى بقالى فترة طويــــــــــــــــــلة كنت مزعلاه منى ، مبكلمهوش ، مش بعمل الحاجات اللى عايزها منى فترة عن عمد و فترة عن كسل ، و بعدين بقيت كمان بعمل حاجات هتضايقه مش عن عمد لكن عن رغبة معينة ، كنت متضايقه من نفسى عشان بعيدة عنه ، كنت مكسوفة عشان شايفنى و أنا ناسياه ، و كل ما أقول أقرب أنسى و أنشغل و أقول بكرة و بكرة بييجى بعيد ، المهم من فترة قريبة اتكلمت أنا و واحدة صاحبتى عنه و عن علاقتنا بيه و عن مرادفات مشابهة ف العلاقات الانسانية و ان ازاى البعد بيوّلد الجفا ، و كان عندنا رغبة نرجع نوصل الحبل المرخى اللى ماليه التراب ، حاولت فعلاً بس يمكن نيتى كانت فيها إنّ ، المهم أول ما نيتى بقيت كويسة ووقفت على رجليها و ف عز ما أنا عندى حماس لقيته بعدنى عنه .. زعلت أوى و قلت انه خلاص مبيحبنيش ، عشان دى مش أول مرة يعمل معايا الحركة دى .. رجعت فكرت طب ما هو معاه حق ، و قلت كمان هو لما بعدنى عنه ده مش معناه انه مش عايزنى لكن معناه انه واخد باله منى و مركز معايا ، بيقرص ودنى ، بيقولى يا عبيطة انا بحبك فبفوقك
.
.
من كام يوم بقى كنت مروّحة و كان نفسى اشترى فاكهة ليا و للبيت - بحب لما أدخل بحاجة جبتها بفلوسى " اللى على رأى أبويا فلوس إيه يا أم فلوس هو مرتبك ده بتسميه فلوس :) " لناس تانيين - المهم فتحت شنطتى عند البيت لقيت فيها 20 جنيه قلت أجيب حاجه بسيطة ، البسيط جرّ البسيط و لقيتنى صرفت أغلب اللى معايا ، و فجأة جت ف بالى فكرة ، هو قال ان اللى يطلع قرش يرجعله 10 ، انبسطت مش عشان هيرجع لكن عشان حسيت انه هيجينى و يطبع على خدى بوسة حنينة ، ابتسمت ، كنت دايما لما الفكرة دى تيجى ف دماغى أقول هيدينى 10 إزاى يعنى و طبعا كانوا مابيجوش ، لكن دى أول مرة أصدق و قعدت أفكر يا ترى هيفاجئنى إمتى و إزاى ، مش مستعجلة بس عايزة الحضن ده .. محتاجاه ، المهم من 3 اسابيع كنت حطيت50 جنيه ف شنطة و قلبت الشنطة عليها لا حياة لمن تنادى ، قلت يبقى صرفتها زى اخواتها ، قوم إيه أتفاجئ يوميها بماما بتصحينى تقولى انا لقيت 50 جنيه ف الشنطة دى اللى كنتى بتدورى عليها من مدة ؟ و حتى الان معرفش ازاى جت ف الشنطة اكمنى فلّيتها بدل المرة مليون ، بس ساعتها ابتسمت ابتسامة أوسع و قلت اللـــــــــــــــــــــــــــــــــــــه ، أنا بحبك أوى
.
.
أيوة أنا عارفة انك بتحبنى أكتر ما بحبك ، و مقدرش أعوضك عن تقصيرى بس ده ميمنعش ان رغم انك أكبر و أجمل و أعقل منى بكتيـــــــــر إنى أجرى عليك و أترمى ف حضنك و أطبع بوسة من بنت صغيرة على خدك المنوّر و أقولك .. حبيبى أنا أسفة
