النهاردة حسيت إنى مفتقدة جداً " سناكس " اللعبة اللى كانت على موبايلى القديم ، انا مغيرة موبايلى بقالى سنة و نص يعنى كل ده ملعبتش اللعبة دى ، و موبايلات نوكيا الجديدة عليها لعبة سناكس بتخنقنى جداً و مش مقتنعه بيها ، سناكس ايه دى اللى وسط خضرة و تفاح و بيوت !! انا متعوده على اللى ف صندوق و بحجم صغير و ابيض و اسود
كنت ف الاول مبلعبش اللعبة دى عشان مش بجيب فيها سكورعالى و انا احب اللعبه اللى العبها ابقى فيها رقم واحد ، بعدين بقيت العبها ايام الامتحانات عشان ما اذاكرش ,و أضيّع الوقت لكن لقيتنى بجيب ارقام عاليه و بسجل اسمى ع الموبايل فبدأت أحب اللعبه و أبصلها بصّة مختلفة ، و ساعات لما كنت أبقى مخنوقه اقعد العبها لحد ما احطم الرقم بتاعى القديم ، أو العب و اموّت نفسى عمّال على بطّال عشان اسمع صوت خبطة دماغ التعبان ف الحيطة .. يمكن أستريح شوية و اتخلص من الاحباط اللى جوايا
و النهاردة لما لقيتنى محتاجة اتخلص من طاقة سلبية بتحوم و تحرجم عشان تعشش جوايا افتكرت اللعبه و اد ايه انا مفتقداها و كمان محتاجاها ، ساعتها حسيت بحزن أكبر ، الانسان ده غريب أوى بيتعلّق بحاجات عجيبة لأسباب لا تبدو منطقية ، ممكن حد يقولى ان الاسهل ان البنى آدم يواجه مشاكله و يحلها بدل ما يقعد يلعب و يبقى الوضع على ما هو عليه هرد عليه و أقوله هو من إمتى يعنى الكلام كان بفلوس ؟ و للا من إمتى كان اللى شاف زى اللى سمع ؟
