م الاول البوست ده مش للتعليقات و لا شرط إنه للقراية . البوست ده حتى هكتب فيه بالطريقة اللى سحر قالتهالى زمان . هقعد اكتب و خلاص من غير ما اعرف انا هكتب ايه و الحقيقة هتطلع لوحدها . كل اللى عارفاه انى مش مستريحه بضحك و بقول نكت و برغى و بجرى و بتنطط و بقفل على نفسى و باخد مهدئات و بسمع اغانى فقر و بسمع اغانى رقص و بحتاج لحضن و بقول ملعون ابو دى دنيا و بغير و بزعل و بعمل حركات عيال و بعمل حاجات ماتجيش غير من عقل واحده كبيرة و ببقى عايزة اصيع و ببقى مؤدبة و بقول و بخرس و ببعتر و بلم وبجرح فى نفسى بشدة و اتقان و موهبة لا حريفة يعنى و بجرح ناس علشان انا موجوده فى حياتهم و بجرح ناس تانيين علشان مش موجوده معاهم و ناس بتجرحنى علشان كلامها و ناس بتجرحنى علشان سكوتها و ناس بتجرحنى لانها شايفه جوايا اللى انا مش شايفاه و ناس تانيه بتجرحنى علشان ببقى عايزاهم يشوفوا جوايا لكن بلاقيهم عمى و ناس بتسعدنى فى عز مانا مش محتاجالها و ناس تانيه بتسعدنى علشان انا عايزاهم يعملوا ده . و ناس بتسعدنى علشان ربنا كريم او لاجل الصدفة . ناس بقرب منهم علشان عايزة احس احساس معين فى لحظة معينه و ناس ببعد عنهم علشان بحس قربهم خانقنى . مبقيتش فاهمانى . مبقيتش عارفه هصحى الصبح ابقى مين . فى وراء المرايات حاجات حاجات و انا مين و فين و حاجه جايه و للا جرح فات مبقيتش عارفه . مجروحة و للا مخنوقه و للا فاضيه فبدور على شوية وجع احس من خلالهم انى بنى آدمة من روح و لحم و قرف و دم . مشغولة و معنديش وقت و ورايا مشاكل بالكوم و بلاوى و عايزة أقابل الناس و مليش خلق اركب مواصلات اروح اشوف صحابى . ناس واحشنى بس مليش مزاج امسك سماعة التليفون و ناس مش واحشانى و بكلمهم علشان اغلس على نفسى و ناس بكلمهم اداء واجب محدش طالبنى بيه و ناس بكلمهم روتين و ناس بكلمهم علشان انا عايزة ده و ناس عايزة اكلمها و بمنعنى امسك سماعة التليفون . بعمل حاجات مبحبهاش و بحب حاجات بكرهها و بسيب حاجات اتعودت عليها و بكتب و برسم و بغنى بس ما بعيطش . مش عايزة امسك اكتب فى مذكراتى و مش عايزة اكسل علشان هضطر بعد كده اجى اكتب كل اللى حصل . طب و هو ايه اللى حصل ؟ مبقيتش عارفه . فى ناس كتير مهمين بيحسوا بعدت عنهم فجاة بقول قال انى سخيفه و مش طالبانى فى حياتهم و ناس بقول مش طالباهم الساعادى فى حياتى . و ناس بتعلق بيهم و اول ما بخاف بسيب ايدى و ارمينى من فوق و اقول لا يا بت ماتنسيش انك حرة و لوحدك و اجرى و ابعدى . ما تخليش الحاجات بتاعة الناس التانيين تشدك انتى انتى مش انتى هم بس ارجع و اقول بجد خلال اخر اسبوعين او تلاته دول او يمكن اخر شهرين كاملين انا بضيع و بنزل و بصرخ و ببعد و بحتاج و و بشاور و بقطع ايديا و بقفل موبايلى و بفتحه و بطلع و ببقى قوية و ببقى جميله و بحس بانوثتى و بحس بهشاشتى و بقول عادى و بقول تعبانه و بقول ان حزمبل بتاع سعاد حسنى خاننى و مجابليش حاجه و مش مسامحاه و بقول انه غلبان و انه تلاقيه مش عارف يجيب لنفسه و ان جنى المصباح مش قادر يستر نفسه فمنين اقوله اكسينى وبقيت كل حاجه بدوس على حاجه تانيه فى حياتى علشان اجيبها و بقول براح مجروح بشقفة ازاز و بقول عاجبك كده و بمسك ايدين و بسيب مشاعر و بجرى و بضحك و اخاف انما برضه ما ببكيش . دموعى فين يمكن تيجى لو طبعت البوست دى و قريتها فى سريرى لوحدى و شوفت حالتى وصلت لحد فين أكيد هتيجى و ابقى بعيط زى العيال البايخين اللى بتبقى عايز تلعن ابو امهاتهم انهم جابوهم علشان يقرفوك انت من غير ذنب . مش عارفه مفيش مشكله واضحه يعنى عادى انا مش ضعيفه علشان اتكسر بس ليه ما تكونش دى المشكله ليه مكونش محتاجه اتكسر محتاجة اصرخ و حد يشيلنى و يطبطب على راسى و يقولى بس انتى اهدى شويه وانا هعملك كل حاجه اهدى .. اهدى و اهدا بس علشان هو موجود . بقيت سبب قرف لناس كتير فى الوقت اللى انا فخر لناس تانيه . بقيت حاجات كتير عكس بعض حاجات غريبة كلها انا و للا كلى هى . يا سلام لما تبقى متفائل و فجاة تحصل حاجه تخليك ترجع لوراء شوية خطوات بنت ستين كلب و الحاجه تبقى هبله زى ان مثلا و انت خارج صباعك يخبط فى الباب فتلعن كل الحاجات الكبيرة و الهبلة اللى فى الدنيا او علشان صورة مش عاجباك و للا كلمة اتكتبت غلط من غير قصد و للا اى هبل و السلام و طبعا حاجات بتبوظ بسبب حاجات كبيرة ماهو مش كل حاجه صغيرة اكيد و ياسلام بقى لو تبقى المفروض مش متضايق و ضاحك ضحك للركب و تيجى فجاة تلاقى قلمك بينقط خره ليه بقى ؟ الله اعلم علشان حد كان متعشم فيك عشم فانت جرحته علشان ما يتعشمش علشان مبتعرفش توعد و تخلف ؟ و للا علشان حد انت كنت ناوى تتسند عليه و فجاة قلت لا مش انا انا ما اسندش على حد ابدا انا هقع لوحدى . و للا علشان مضغوط و للا علشان الناس حواليك بيقولوا انهم قلقانين عليك و انك مش انت و خد بالك و خاف و لا علشان انت جارح ناس و عارف و ساكت و للا علشان عايز تحس و مش عارف و للا علشان مش عايز تحس و برضه مش عارفه و للا علشان عارف و حاسس و للا علشان لا عارف و لا حاسس و للا و للا و للا و للا اييييييييييييييييييييييييييييييييييييييييييييييييييييه ؟ عارفه انى هقفل الكمبيوتر و هضحك و هزعل و همارس كل شئ عادى و هرجع اقول مش فاهمه و بسيطه و صعبه و هو فى ايه و انا صحيت شوفت مين فى المرايا المره دى و الانفصام جاى منين بس الأكيد انى مش عايزة اى حد مهما كان و بكرر مهما كان يكلمنى عن البوست او يحاول يتصل بيا يتطمن عليا علشان أنا اهو زى القردة و بكتب من غير ما اقرا و بقرأ من غير ما اكتب و فى الآخر البوست دى ليا انا مش لاى حد برضه مهما كان
