عايزة
أشكر
امبارح
لإنه فاجئنى بنفسه
بشكل مكنتش مستنياه
ياااااااه
لسه الحياة قادرة تفاجئنى
كنت المفروض رايحة السينما
فجأة خروجة السينما اتفشكلت
و رغم إن ده ضايقنى أوى
إنما لقيتنى بتمشى من آخر الهرم لحد الجامعة
زهقانة
و لما قابلت سلمى قلتلها حاجة واحدة بس
تدخلى جنينة الحيوانات ؟؟
و هكذا فجأة لقيتنى
فى
جنينة الحيوانات
يااااااااه
المكان اللى كنت رافضه اروحه
بقالى 10 سنين
من كتر ما تشبعت بيه فى الطفولة
دخلته
شميت فيه ريحة كل شئ برئ
استمتعت جدا
حسيت أوى بحضن الجنينة
الجنينة اللى كنت بعلن انى مبقيتش بحبها
لكنها و بمنتهى الشهامة
ما عاملتنيش بالمثل
و حضنتنى
بجد
فطبعاً
شكر خاص
ل
جنينة الحيوانات
اللى
رغم
الزبالة
العشاق المتنطورين فى كل شبر
معاكسات الأطفال و المراهقين
و الريحة اللى ناتجة من ان الجنينة
جنينة حيوانات
كل ده مقدرش
و لو
للحظة
يخلينى أتراجع
أو
أفقد حالة البهجة
اللى حاوطت كل حاجة
فى اليوم ده
.
.
شكراً
ل
سلمى
اللى شاركتنى الساعتين دول
و اللى دايما معاها
بعرف أكون مبسوطة
.
.
شكراً
ل
عمرو
اللى قابلته بفعل قرار منى مش مترتبله
و فضّالى وقت
وسط شغله و انشغاله
نص ساعة
حسيت فيها انى مش أنا بس اللى مبتسمة
لا ده روحى اللى جوه
سايبة إيدها
و مبسوطة
نص ساعة
ما تخللهاش غير سلامات و طراطيش أخبار
ناتجة عن انقطاع الصلات
اكمن
الدنيا واخدانا
انما الحقيقة حسيتنى فعلاً مرتاحة
.
.
شكراً
ل
نورا
اللى رغم خنقتها
قدرت تضحك معايا
و تختم معايا اليوم
.
.
شكراً
ل
غزل البنات والفشــار
.
.
شكرا حتى
للسينما
اللى ماجاتش
و خليتنى أعمل كل ده
.
.
شكراً
للحالة
اللى خليتنى اكتب كل ده
حتى لو مكنتش فى الموود بتاع امبارح دلوقتى
بس كان لازم أقول
شكراً
لكل حاجه خليتنى أحس ان امبارح يوم جميل
.
.
على الهامش
شكراً
ل
سماح
اللى متعرفنيش غير من أيام
و رغم ده حبيت تحضننى امبارح
حتى لو كنت أستاهل الحضن ده
فشكرا ليها لانها عبّرت عنه
و بصدق
و
اعتذار خاص
ل
ياسمين
اللى فعلا
عن اعتراف
مقصرة معاها
بقالى كتير
