يالله
مش متخيله ان اللى فات ده كان مجرد أسبوع
الموضوع ببساطة
إن بلغنى أيها الملك الرشيد
إن باب التقديم فى التذوق الفنى فتح
و لمدة كام يوم بس
و طبعا انا بقالى سنة و شوية بدن فى مالطة
و بقول هقدم
بس ببساطة لما قلت لبابا
كان الرد
لا مفيش تذوق فنى
ليه بقى ؟
ده السؤال اللى اكل نافوخى
بس الاجابات كانت كل يوم بتختلف
1
علشان بابا مش مقتنع بالتذوق الفنى
و الحل ؟
يقتنع ليه أصلا
مش أنا اللى هدرس
ثم الدراسة كبيرها لو ما فادتنيش
مش هتضرنى
2
علشان انا لسه طايشة و مش عارفه اللى عايزاه
و أأجل الموضوع للسنة الجاية
و الحل ؟
طب و لحد السنة الجاية اقعد بعد النجوم ؟
و ايه يضمنلى ظروفى السنة الجاية ؟
3
انى لسه محددتش موقفى م التكليف بتاعى
فده داعى للتأجيل
و الحل ؟
التكليف كلها اسبوعين تلاتة بالكتير و يظهر
يعنى عقبال ما امتحن امتحانات التقديم
و تظهر النتيجة يال بالنجاح
يالبفشل الأسود
ساعتها هكون حددت موقفى م التكليف
و اللى هو اصلا متحدد
بانى هلغيه
و الحكومة تبله و تشرب ميته
4
الوسط الفنى و الكتابى ده تعبان أصلا
و الحل ؟
أنا اللى هدخله
غير انى حتى لو اجلت الموضوع للسنة الجاية
أضمن منين ان الوسط تكون صحته رجعتله
ده كان رأى بابا
أما ماما بقى فرأيها كالتالى
1
الفن أصلا حرام و الموسيقى و الباليه و كل ده
سكة اللى يروح مش هيبقى عايز يرجع
و أنا بالفعل فى نظرها انحرفت
بما فيه الكفاية
و الحل ؟
ده رأيها على عينى و على راسى
بس مش هتنازل عن حلمى علشان رأيها ده
غير ان السنة الجايةهيفضل رأيها مماثل
2
انا عنيدة و كل حاجة عايزاها
لازم اعملها
و لازم تتكسر شوكتى و اتعلم يتقالى لا
مش انا هلغى التكليف يبقى خلاص
مادرسش السنة دى
و كفاية عليا الديوان اللى لسه منزلش
و اللى شاكين ان اتنصب عليا فيه
و الحل ؟
يعنى ده كلام !!
الدنيا فاتحالى دراعاتها
بس ازاى يقفلوها هم فى وشى
لمجرد ان اتعلم يتقالى لا
3
و الفلوس اللى عماله ابعترها دى
مش اولى اشيلها للجواز
و الحل ؟
ياسلام
و هو مين قال انى هتجوز حالا بالا
يا بشر هتجوز قضاء و قدر
ليه مش مصدقين
و يعنى السنه الجاية مش هيبقى نفس الموال
.
.
المهم بعد اسبوع كامل من الشد و الجذب
و الخناق
و الغلط
و العند
و العياط
و البوز
و الرجاء
أمى قالتلى أأقدم فى الامتحان من وراء أبويا
و لو نجحت أبقى أقوله التقديم فتح تانى
و ده لمجرد انى قعدت اتكلم معاها ان ده حلم حياتى
و انها طول عمرها بتشجعنى
بس بشرط
ما اروحش افتن عليها
و لو قدمت الذنب يشيله أبويا
علشان كفاية عليها ذنوبها
بس انا قررت اخوض آخر معركة مع بابا
- قبل ما أقدم للامتحان من وراه -
بهدوء
و صوت واطى
و ادب
و كان الحل السلمى اللى توصلناله اخيرا
انه مش معتبر نفسه عنده بنت
و انى بحلم باستقلالى
يبقى خلاص ملهوش دعوة بيا
و انا حره
اشرب م البحر
و مفيش كلام بيننا
و الرد بتاعى كان بما انى حرة
فهقدم
مع استمرار المحاولات فى انه يهدا و يرضى عنى
لانه اعلن انه لو جراله حاجه فبيبشرنى بانه غضبان على سيادتى
عموما انا لسه مقدمتش
ان شاء الله هقدم يوم السبت
ربنا يكفينا كل الشرور لحد يوم السبت يعنى
و يستر ع الامتحان
اللى مش سهل أصلا
و بعد النتيجة يبقى نشوف الطوفان اللى بعده
*
*
طبعا
رغم كل الكلام ده
انا بحب اهلى جدا
و متاكده انهم بيحبونى
- على عكس ما هم متخيلين -
لان اختلافنا لا علاقة له بالحب
و عيب اكون انا الطايشة المنحرفة عارفه ده
و هم لا
أنا فعلا عارفة انى مسببالهم ضغط نفسى رهيب
بس للأسف مش قادرة اتخلى عن احلامى
و لا عن حقى فى خوض التجارب
بحبكم
و أسفة جدا
اذا كان وجودى مسببلكم كل التعب ده
بس حتى لو كانت دى انانية
فأنا فعلا مش قادرة أتخلى عن معركتى
عارفه انى جرحاكم
بس ..
*
*
اخيراً
أنا شايفة إن فى اول الطريق
حريتنا
غاية
بس بمجرد ما نحصل عليها بجد
و تبقى قاعدة راسين عليها
بتتحول بسلاسة
لوسيلة
.
.
وعلى رأى سحر
الطريق طويل
و المعركة مش قصيرة
و الوصول فى الأول و للا فى الآخر
قرار
*
*
شكر خاص
لكل اللى وقفوا جنبى الأيام اللى فاتت
و حضن \ اعتذار
أكثر خصوصية \ حميمية
لأبويا و امى
*
*
دعواتكم بقى
ان ربنا يسهل و أقدم على خير
و أنجح فى الامتحان علشان الشماته ماتبقاش للركب
LOL
.
.
تحديث
اتكلمت مع بابا تانى
قلتله يطلع جدع و يوافق
قالى انا مقلتش لا
بس الوقت مش مناسب
قلتله طب بص انا هقدم
و النتيجة لسه 13 / 9
لو نجحت و موقفى م التكليف هيكون اتحدد
يبقى ساعتها ربك يسهلها بقى
قالى ربنا يهديكى
و دى معناها انى هقدم
ان شاء الله
أما ماما فقالتلى قدمى و اسكتى بقى
ياريتك بتعمل كل الهلمة دى
ع الحاجات المهمة
:)
