حتة قماش
مكعبلة
متبهدلة
مليانة شحم
بس أما عينى راحتلها
لمَحتَها
بشكل تانى مختلف
فى عينيا بانت
إنها
:
حلوة
كمان متسرفلة
تنفع تكون
فستان جميل
من غير كمام
لبنت سمراء
عينين حزينة مكحّلة
و بنطلون مهوش طويل
لطفل مخنوق م البكا
و روحه شاردة
مسهّمة
أو
حتى روب
من غير جيوب
لشيخ عجوز
طاف بالدروب
اكمنه عطشان الجواب
رغم إنه ملّ الأسئلة
*
*
حتة قماش
رغم البُقع
باقى العرق
و خيوط كده متهلهلة
تنفع تكون حاجات كتير
لكن
مهيش
..
متكملة
