إيه ده
!!!
مين الطفلة البريئة دى ؟
إوعى تقولى انتى ؟
أيــــوة انا
أصلا ما اتغيرتش كتير
.
لا يا شيخه
بس فى دموع فى عينك
كنتى بتعيطى ليه ؟
لا مكنتش بعيط
- قال يعنى لو كنت بعيط ساعتها هفتكر السبب -
أنا عينى دايما فى الصور تحسيها مدمعة
..
.
ده الحوار الاولانى
كل ما حد يشوف فى محفظتى الصورة دى
- أكتر صورة بحس فيها ببرائتى الأولى و انسانيتى -
.
.
لســه حبــانى
و بالعــند
.
.
حاجات كتير بتحصل بتحاول تخلينى
أتوه
أتعب
و أقول ملعون أبو الدنيا
بس أنا و لا هنا
بضحك و بقول عادى الدنيا زى اختى الصغيرة
- مع ان معنديش اخوات بنات أصلا -
و بتغلّس عليا
مش حاسه انى حتى ببذل مجهود علشان ما أتأثرش
و مش معنى كلامى ان الحياة فلة
و الدنيا بمبى
لا الصراعات ما بتموتش
و اللى بيتحل
بيتكلكع غيره
و ده اللى بيدى الحياة طعم
بس الرك بقى
على القدرة على التحدى
.
.
دلوقتى بس فهمت معنى جملة
تفوت فى الحديد
انت بس بتحاول على اد ما تقدر
.
.
المعافرة بتكون
علشان انت بتحاول فى وسط طرق الحديد
ما تصديش
مش علشان بتحاول مجرد انك تعدّى
.
.
مش عارفة
حاسة انى عايزة
أمرر صوابعى كده فى الهواء
كإنى ماسكة ريشة
مش هلوّن الكون
علشان مبحبش اتدخل فى طبيعة الحياة
إنما عايزة أطلّع من جوايا كل النور اللى حاساه
مع الاحتفاظ بالأصل
أوزّع الشئ اللى مالينى ده
على الكون
الحاجه اللى شاماها دى
الأورا اللى حاسها حواليا
.
.
علشان أى حد مزاجة متعكّر
يقدر يروق
.
متصالحة مع نفسى ؟
آه
مع عيوبى ؟
جدا
مع كل مصايبى اللى عملتها و عندى استعداد اعملها؟
absolutly
الجميل حقيقى إنى
مش شايفانى ملاك خالص
شايفانى بشر
هنا تكمن القوة
.
.
اعتقد ان التصالح مع الذات
بيبدأ
لما الواحد يدرك إن خطئه منطقى
و ده اللى بيميزه عن أى كائن تانى
.
.
جمالية الانسان انه
بيغلط
بيتعلم
بيقع و يقوم و يقع
.
.
.
خلاصة الكلام
أحب أقول لنفسى
بحبك
و هفضل جنبك
فما تخافيش
الوصول مش كل حاجة على فكرة
السعادة الحقيقية
تكمن فى الطريق
.
.
على الهامش
بصيت للقمر امبارح
كان مخنوق اوى وراء السحاب
قلبى وجعنى
حسيت انى عايزة أبوسة
احضنه
أقوله ما تخافش
أنا جنبك
و بحبك أوى
.
.
البحر كمان
مش عارفه ليه
حاساه محتاجنى
.
.
قمرى الفضى
نحن احفادك
نعلم انك تعكس روح الحقيقة المجردة
فلا تخشى وحدتك
كلنا لك نجوم
فهل يرضيك هذا الونس ؟
.
.
..
بحرى الغميق
ثور
انتفض
اصنع من موجاتك درع واق
و كن على يقين
أنك قريبا ستصلك رسائلى
محملة بالنور
و الحنين
.
.
لسه رغم أى شئ رمادى فى سحر فى العالم
