عارفة انى مجنونة
و إنى مصاحبه مجانين
بس اللى حصل إمبارح
كان أكبر من الجنان بكتير
اننا نروح دريم بارك
ده عادى
اننا نلاقى المطرة بتمطر
و احنا برضه نصر ع الدخول
ده عادى
انما اللى عملناه تحت المطرة
ده اللى كان أجمل جنان
كل الناس بتستخبى تحت حاجه
من المطر
و احنا واقفين نغنى و نجرى و نلعب
مش هقول غرقنا
علشان احنا كنا أكتر من الغرقانيين
بس هقول اننا ركبنا الشلالات مرتين
و بجد لو كنت اخدت دش بهدومى
مكنتش هتبل كده
كان منظرنا كلنا بجد فظيع
و متكتكين
و بنحاول نجرى و نغنى
علشان ندفا
و ندفى فى بعض
بس لا حياة لمن تنادى
بجد كان شكلنا فظيع
و الستات الكبار
ناقص يشاوروا علينا و يقولوا
العبيط اهو
كنت حاسه اننا لوحدنا اللى مبلولين فى البارك
و روّحنا بنتكتك
و بنقول برد سعيد ان شاء الله
و أنا مروحة
حاسة ان كل الناس ماشيين عادى
و أنا اللى فى الاسكيمو ده لوحدى
دخلت البيت بقول لماما
عايزة اى حاجه دافيه
و روحت لبست باديهين
و عليهم البيجاما
و عليهم الروب
و فى رجلى شراب
و فوق الشراب لكلوك
و فى ايدى جوانتى
و نزلت تحت البطانيه و اللحاف
على امل انى ادفا
و الجميل فى الموضوع
ان لحد دلوقتى
الكوتشى بتاعى ما نشفش
من امبارح
و صوتى راح امبارح على خفيف كده
من كتر الضحك اللى ضحكته
مش عارفه كل ما العب لعبه
اصحابى يصرخوا
و أنا نورا نقعد نضحك بهيستريا غريبة
بس صوتى جه تانى الصبح
و الحمد لله ما اخدتش برد
و كله كوم
و صور المجانين اللى أخدناها دى كوم
أول مرة أشوف ناس بتتصور فى الطوابير
و الزحمه و المطرة
بجد كل خروجة
صورنا فيها بتكون أكثر جنوناً
اللى عايز يشوف سى دى الصوربقى
اللفه بربع جنيه
و الحسابة بتحسب
*
*
عارفة ان احنا مجانين
بس ربنا يديمها عليان نعمة
