Thursday, October 12, 2006
عيد ميلادى

بكرة إن شاء الله عيد ميلاد حضرتى
هكمل بالتمام و الكمال
22 سنة
عملت فيهم إيه ؟
و النبى مش طالبة حد يخنقنى بالسؤال ده دلوقتى
علشان انا مزاجى عال العال
يكفينى مؤقتاً إنى إن شاء الله اتخرجت
" زغرودة بقى ياللى فى بالى "
غالبا كنت ببقى مكتئبة ساعة عيد ميلادى
مش علشان سنين فاتت و الفيلم ده
لكن علشان كان بيعمل كلوز على شعورى بالوحدة داخلياً
فى الوقت اللى أنا ظاهرياً طايرة من الفرحة و بهزر مع خلق الله
فاكرة عيد ميلادى ال 18
كنت مبسوطة فيه
بس ده اول عيد ميلاد احس إنى فرحانة يا ناس
من عيد ميلادى اللى فات و أنا بقول هعمل عيد ميلادى السنة الجاية
" اللى هى السنة دى "
و إن شاء الله هظبط خروجة جامده جدا
لكل البنات القريبين من قلبى
بلالين و صواريخ و تهييس
الله اكبر
إن شاء الله
مش عارفة ليه مبسوطة السنة دى
" بطلى فقر يا غرابة هو لازم تلاقى سبب للانبساط ؟ "
كنت متخيلة انى لما اكمل 21 هتبقى سعادتى اكبر
علشان كسرت حاجز الوصاية
بس عادى
لا انا مبسوطة فعلا
السنة دى اكتر
" للدرجة دى أنا مش متعودة على انبساطى ؟ "
على رأى زعرورتى العزيزة
سبحان الله فى مخلوقاته
 
posted by Yasmine Adel Fouad at 4:10 AM | Permalink |