Tuesday, October 10, 2006
أنا مش مجنونة

هو
حضرتى لما أقول لأهلى
إنى مش بفكر فى الجواز
بمعنى آخر
مش همى الأكبر يعنى
ممكن حاجة من ضمن حاجات كتير
لو فيها خير
أتمنى ربنا يحققها
لكن مش فى أول اولوياتى
لما أقول
ان الأمومة مش هاجس عندى
زى بنات تانية كتير
" مع العلم إنى ربما أغير رأيى يوم ما أتجوز وده حقى برضة "
لما أقول
إنى بفكر ما اشتغلش بشهادتى
اللى تعبت فيها تعب أسود
لانى مش ناوية اشتغل حاجه مابحبهاش
أو أضعف الإيمان
لو اشتغلت و ما عجبنيش الوضع مش هكمل
لما أقول
إنى عايزة أستقل بحياتى بعد 3 و للا 5 سنين بالكتير
أو إنى بفكر أسافر أشتغل برة مصر المهروسة
لما أقول
عايزة ألعب يوجا
و ادرس تصوير
و أتعمق فى علم النفس
لما أقول
إن أنا منفعش فى جوازات الصالونات
و مش ناوية أنفع
هل ده دليل إنى مجنونة
وللا انى مختلفة مش أكتر
؟
يعنى اشمعنى أنا مستعدة أستوعب اختلاف اللى حواليا ؟
و مش بقول ده فكر متخلف و للا معرفش إيه
ماهو كل واحد تفكيره ملكية خاصة
مادمت مش بعمل حاجه عيب و لا حرام
يبقى محدش ليه عندى حاجه
صحيح أنا مش عايشة لوحدى
بس محدش هينفعنى لما حياتى تعدى
من غير ما اعمل اللى كان نفسى فيه
أنا صح بقى و للا غلط ؟
مع العلم
إنى ناوية أكمل فى السكة اللى مش عاجبة حد دى
لانى مش ناوية اكون غير نفسى
بس حرية الرأى
مكفولة للجميع
ولامؤاخذة
 
posted by Yasmine Adel Fouad at 3:14 AM | Permalink |