السؤال اللى بيطرح نفسه
هو مين أصلا مستر هشام ده ولا مؤاخذة ؟
مستر هشام ده هو مدرس الإنجليزى بتاعى
من أول خمسة ابتدائى لحد ثانية اعدادى
هل قيمته جاية من هنا ؟
لا طبعا
بالنسبة لى
مستر هشام هو أول شخص ألمس فيه معنى المبادئ
أحس إنه إنسان بحق و حقيق
زيه زى غيره نسيت معاه فرق العمر اللى بيننا
إلا إنه كان إنسان مش ناوية انساه
حكايته إيه ؟
لظروف شغل بابا
اتنقلنا بلد تانية
و كنت فى خامسة ابتدائى
كنت فى مدرسة حكومية عادية
- أيام ما كان التعليم بخيره و كل الناس بتشرح بضمير-
لكن لما اتنقلنا رحت مدرسة تانية خاصة
و كان فيها انجليزى منهج منفصل
- على أيامنا كان الانجليزى بيبدأ من أولى اعدادى -
و كان منهج المدرسة الخاصة
مش بنمتحن فيه لكن بندرسه
فاكرة اول يوم فى حصة الانجليزى
كنت مرتبكة
و حاسة انى تايهة لوحدى
فاكرة انى كتبت التاريخ فى اليمين و زميلتى قالتلى انه بيتكتب فى الشمال
فاكرة ان تانى يوم جه موجه و حاول يخلينى أقرأ من الكتاب
درس كان صعب قوى
و قريت لكن و أنا متلجلجة و روحت اعيطلهم فى البيت
يمكن حادثة زى دى كانت ممكن تخلينى أكره الإنجليزى طول حياتى
إلا إنى هعيش و اموت و هو مادتى المفضلة
أيامها الطلبة اشتكوا لمستر هشام ان المنهج صعب
ساعتها جابلنا كتاب اولى اعدادى و كان أسهل
كان welcome
اعتقد
و بدأ معانا من اول الحروف و علمنا ازاى نحب الانجليزى
فاكرة اننا دخلنا اولى اعدادى و احنا حافظين المنهج
كانت دى بداية مستر هشام فى حياتى
فى اولى اعدادى كان بيدينى فى الفصل
و رغم اعتراض بابا على فكرة الدروس الخصوصية
الا انى اخدت درس عنده
مع انه ماكانش بيزود حاجة عن الفصل
و كان فى امكانى اخليه يشرحلى أى حاجة فى المدرسة
و هو مبسوط
فاكرة غزاى كنت أنا و احمد و محمد اللى كانوا معايا فى الدرس
بنعمل حيل و مؤامرات علشان نعرف ندى لمستر هشام
الفلوس آخر الشهر
و ازاى كان كل مرة بيرفض بنفس الاصرار
فاكرة انى فى ايام امتحانات نص السنة
بعد الامتحان فضلت اتكلم معاه و اتأخرت عن ميعادى فى البيت
حوالى 4 ساعات و انا مش حاسة بالوقت
كنت انا عندى 11 سنة و هو مالايقل عن 22
الا ان عمرى ماحسيت بفرق السن
أى قضية كنا بنناقشها
كان بيحترم رأيى و يستشيرنى
فاكرة المرة اللى حسيت انه نزل فيها من نظرى
و ازاى روحت وواجهته رغم ان علاقتنا لا تتجاوز علاقة
طالب بالمدرس بتاعه
فى يوم فى الامتحانات فى تانية اعدادى
بنت كانت بتعيد السنة و هو كان بيراقب علينا
و لما حاولت تغش و شافها سكت
و لما قلتله ازاى تسكت قالى معلش هى بتعيد السنة
ساعتها روحتله بعد الامتحان و قلتله انت بتساوى جهد اللى ذاكر باللى ما ذاكرش
ماكانش اعتراضى انها تغش
بس كان صعب عليا قيمته جوايا تتهز
فاكرة انى قلتله ان فى ناس بتاخد دروس علشان تبقى احسن من غيرها
فاكرة ازاى اتأثر يومها و بعتلى مع مدرسة جارتنا
فلوس الدرس اللى كنت بدفعهاله طول السنة
فاكرة انى فضلت اعيط
و روحت رجعتله الفلوس و قلتله ان ده ماكانش قصدى
فاكرة كويس قوى
انه ساب المدرسة علشان يشتغل مرشد سياحى
و لما حاول يرجع المدرسة رفضوا
و بعدين خلوه أمين مكتبة
فاكرة كويس غيرتى على قدرته ع التدريس
لكن كان الحقد اللى بين المدرسين حاجة اكبر من انى افهمها و قتها
فاكرة انى قلتله ازاى يقبل بكده
قالى معلش كل بوقته وانه هيستغل وقته فى المكتبة
بانه يدرس ايطالى و عبرى
علشان يقوى لغته
اقامتى أغلب الوقت كانت بتبقى فى المكتبة علشان حبى للقراءة
لكن لما بقى امين المكتبة
كنت بتخنق لما بروح علشان بحس انه اتظلم
و عنده قدرة يستحمل القرف ده
الكلام ده من حوالى 11 سنة
بس عمرى ما نسيته
بابا اتنل اماكن تانية
و بعد سنين رجعنا نفس المكان الاولانى
و كان اول حاجة عملتها روحت المدرسة أسال عليه
- كنت خايفة قوى يكون نسينى -
أول ما شافنى رغم انى كنت دخلت الجامعه و فى سنة تانيه
بس افتكرنى
عرفت انه خطب و فشكل خطوبته
معقول راجل بالقيم دى مايتجوزش
إزاى
ده لسه لحد دلوقتى بيدوخ الطلبة علشان يقبل ياخد فلوس الدرس
ده الراجل وسيم وراجل بجد

و عينه خضراءكمان
ههههههه
ومن تانى سيبت مكان سكنى
و نقلنا فى مكان تانى
لكن من وقت للتانى بيبعتلى السلام مع أصحابى
و أنا عاوزة أروح أسلم عليه
و ناوية باذن الله
الناس دى ماتتنسيش

فى موقفين مهمين جدا افتكرتهم

يوم حصل فيه زلزال و احنا كنا فى المدرسة

هو كان من توابع الزلزال اللى كان فى التسعينات

و كان مستر هشام عندنا فى الفصل

وحس بالزلزال

فاكرة انه قالنا ياولاد لو حصل زلزال محدش يجرى

كل ينزل تحت الديسكات

قلناله حاضر

فقالنا طب ورونى كده هتعملوا ايه

و نزلنا فعلا تحت الديسكات

و بعد لما الزلزال خلص قالنا خلاص اخرجوا

و بعدها عرفنا ان كان فى زلزال حقيقى

الموقف التانى اللى فاكراه

كان فى يوم برضه الدنيا اصفرت و بعدين احمرت و بعدين اغمقت قوى

و ناس كتير قالوا ان يوم القيامة جه

و كنت فى الدرس ساعتها

فاكرة ان لما مستر هشام عرف

كان كل همه انه يهدينا

و فضل يطمنا لحد ما الدنيا رجعت للونها تانى

هو ده مستر هشام