Wednesday, September 17, 2008
دُنيـــــا جديــدة
خُـدنى لعالم تانى
خُــدنى لدنيا جديدة
دوب يا هوى ف أحضانى
أنــا دلوقتــى سعيـــدة
نهرب من أيامنا
و تاخدنا أحلامنا
نسكن نجمة بعيـــــدة
*
*
سعيدة كما لم أكن من قبل .. دى حقيقة مطلقة مفيش عليها جدال ، دايماً لمّا كنت ببقى سعيدة كنت بستخدم لفظ ان اليوم اللى أنا سعيدة فيه ده من أجمل أيام حياتى لإنى كنت على يقين إن هيبقى فيه أجمل منه جاى ، بس فيما يخص يوم ( 16الثلاثاء ) بالتحديد فهو الأسعد على الإطلاق ، لان ببساطة معداش عليّا قبل كده يوم فيه كل السحر ده بداية من مكان و زمان مروراً بكل المفاجآت و الاحتفاليات دى و اللى كانت مخصصة عشانى بمنتهى الحميمية و الدقة و الحب
................
الأرض سرايا
السمــا بنّـــور
البحر مرايــا
المــــدى مفتـــوح
و نفوت من سور
ورا سور
ورا سور
و نروح مطرح ما نحب نــروح
*
*
عُــمرى ما حسيت إن سعادتى هى الشغل الشاغل لحد بالشكل ده ، آه أكيد ناس كتير كانت يهمها إنى أبقى مبسوطة - سواء عشان أبقى أنا مبسوطة للانبساط نفسه أو عشان ربنا يكفيهم شرى و أنا قرفانة - ، أكيد الناس دى بتحاول و تعمل اللى عليها ، لكن الجديد كان إنى ألاقى حد عدّى بكل السُبل و الوسايل كمّـاً و كيفاً و فى حدود معرفتى أنا الشخصية بنفسى كل ده ، حد قادر يفاجئنى بشكل مستمر ملهوش نهاية و قادر يخلينى فعلاً طايرة و مش حاسة إن ناقصنى أى حاجة م الدنيا ، و مش بقول كده عن مراهقة بلهاء و لا بقول كده عن مراية حب عميا و لا برمى ف الأرض أحكام ف المطلق أو حتى جاية أتمنظر ببهجة بَـتنفسها ، أنا مازلت قادرة على التمييز وواثقة تماماً من كده وعمرى ما هخدعنى لصالح حد .. أنا فعلياً و بعلنها رسمياً سعيدة كما لم أكن من قبل
..................
الماضى ورايــا
أرميـه و أطيــــــر
و ياخدنى هوايا
ف نسمة حريـــــر
أنا عايزة أفرح بشبابى و أعيش
و مليش إلا إنت و حلم كبيـــــــر
*
*
أحمـــد .. عارفة إن مفيش بيننا شكراً ، بس أنا عن وعى تام و مش عن سذاجة طفلة مش على لسانها غير " خطيبى حبيبى " قادرة أستوعب إن اللى انت بتعمله عشانى كتير و ده ميقللش من قيمتى بس هو فعلاً من غير مبالغة زيادة عن حقى اللى عندك ، خصوصا إنك عارف إن سقف أحلامى مش عالى ، و إنى متواضعة لمّا الأمر يتعلّق بأسباب سعادتى و رغم كده إنت أصريت و خليتنى أوصل لمنطقة ما حلمتش بيها أصلاً ، أنا بحبك و دى حقيقة واضحة و أساسها كافى إنه يحمينا و يشيل عننا بكرة و كل اللى مخبيه .. ربنا يخليك ليّا
You Are The One Who Saw Me Through It All
****************
على الهامش
ما باللون الأحمر أغنية " دنيا جديدة " لإيمان الطوخى

 
posted by Yasmine Adel Fouad at 6:43 AM | Permalink |
Wednesday, September 10, 2008
القطة عميــا
( 1 )
كُــلوا بامية
القطة العميــا
سرقت قميصه
و قميصه دايب
اكمنه عايب
ضيق من يومه
أوحش هدومه
بياقة عالية
له ناحية مايلة
و كم طايل
مَلهِـش نقشة
مَفيهوش زراير
ده لونه باهت
يا مين يصونه !!؟
* * *
( 2 )
كُــلوا بامية
القطة العميــا
سرقت قميصى
قميصى متنى
و مبين جسمى
ما أنا جسمى فاير
حتى الضفاير
إياك تعاكس
إياك تعاير
ده قميص مشجّر
أصفر على أحمر
- الأحمر ده همّى -
مهما كويته
دايماً مكسّر
* * *
( 3 )
كُلــوا بامية
القطة نايمة
إيه ذنب القطة ؟
دى القطة عميــا
تُحرس ما تُحرس
بيخونوها
و مهما تنكر
هيطردوها
حلفت ما تسهر
حتى اسألوها
فين راح قميصى ؟
و للا قميصه ؟
دى القطة هربت
يا ناس سيبوها
 
posted by Yasmine Adel Fouad at 10:06 AM | Permalink |
Tuesday, September 02, 2008
Never Knew I could Feel Like This ..
 
posted by Yasmine Adel Fouad at 1:34 PM | Permalink |