Sunday, May 27, 2007
أيـــوة حبّــانى

حباكى ؟
أيوه حبانى .. حبانى أوى كمان . صعبة دى !!؟
.
مش القصد بس غريبة شوية
ليه ؟ حد قالك إنى بكرهنى ؟
.
لا طبعاً بس خير ؟ فى سبب ؟
معرفش
اللى متأكدة منه إنى فيا حاجة جديدة
مختلفة
حاسانى أقوى
أقوى بكتير
اكتر ما انتى تتصورى
مؤمنة بيا بجد
- ده اللى أهلى بيسموه غرور -
مش فارق معايا السبب أد ما تهمنى النتيجة
.
طب ما لو فى سكة دلينا عليها
بصى انتى عارفه كويس الحاجات اللى حصلتلى الشهرين اللى فاتوا
1-
خناقتى الكبيرة مع أهلى
2-
إصرارى على موقفى و تنفيذ اللى عايزاه حتى لو كان من وراهم
و السعى فى ده
" صحيح الموقف اتحل و عملت اللى عايزاه برضاهم "
انما عرفت انى فعلا قوية
و مش ناوية استسلم
و هوصل
مادام مابسعاش لغلط
3-
انسحاب 2 كنت فاكره انى هكون معاهم صداقة مميزة
4-
اكتشافى لضربة من شخص كنت معتبراه صديق مميز
ضربة من سنتين بس اكتشفتها متأخر بالصدفة
رغم انى لسه ليا علاقات بالشخص ده
مش نفاق
لكن علاقة أكثر هامشية
وواقعية
مابجيش على نفسى معاه
ماعاتبتوش
مش قلب اسود لكن علشان اللى يضربنى فى ضهرى باستخفاف
مايستاهلش اللوم
على الأأقل دلوقتى
احساس حلو انك عارفه
و لما تتخطى الموقف هتبتسمى باستخفاف
و تقولى ياه ده أنا قوية بجد
و ده اللى أنا جواه
آه لسه معاه بنتكلم و نقول و نعيد
اصحاب
انما معاه بتمسك باختياراتى
و بكون نفسى من غير مجاملات
5-
علاقتى اللى فى ازدهار
مع
" برتقالة الآلهة "
الإنسانة اوى
نــورا
6-
رجوعى لليوجا
7-
اختلاطى بنوع حقيقى من الاصحاب
من عينة الناس المشغولة
بنتقابل كل فين و فين
انما من جوه احنا فعلا كلنا موجودين لبعض
8-
اكتشافى بالقوة الحقيقة لجوايا و ان انكسارى بقى صعب
مش مستحيل أيوة
بس صعب و مش أى حد هيزقنى هقع
9-
اكتشافى لعمق ما جوايا
صوت داخلى حقيقى فخورة بيه
صوت عارفاه من زمان
لكن بقى أعلى دلوقتى
وكمان احتياجات جديدة مش خجلانة منها
10-
مضيت عقد مع دار نشر
من 10 أيام

بصى كل ده ممكن ما يكونش ليه علاقة بقوتى
بس اللى أنا متأكدة منه
انى حبانى أوى
فاهمانى
و مصدقة
.
انتى مصدقة !!؟
جدا
.
.
تذكرى
المعبد بابه آمن
.
ما تخافيش
الوحش ده خدعة
أشباحك مجرد تماثيل فى بيت رعب
و الموسيقى التصويرية \ الضلمة \ الوحدة
هى اللى بتخليكى خايفة
.
اقتحمى حصن الأسرار
ثقى أنه عند الباب الآخر
تنتظرك سيدة الحلم
بابتسامة
ووشم الروح
.
ده ايه ده كله ؟
اللى اداكى يدينا
هههههههههه انتى اللى بتقولى كده
مش انتى اللى لسه من يومين كنتى بتقولى ملعون ابوهم كلهم أوساخ ؟
أيوة أنا
بس ده ميمنعش انى عندى إيمان بنفسى
بدواخلى
بوجودى كبنى آدمة
يكفى انى محترمانى ككيان و تفكير
خلاص مبقيتش مكسوفة
عندى تصالح مع الذات
كبيـــــــــــــــر
.
.
إياكى و الأقنعة
كونى نفسك
بصدق
و إيمان
هدهدى روحك بين كفيك
ثم اسعدى بالرد
.
و السعادة دى من امتى؟
مش عارفه
هو الشعور بالسلام الداخلى ده بقالة فترة
يمكن أنا حاسانى على اعتاب دهاليز جديدة
معبد أكثر عمقاً
معبد كان لابد ان ابتعد عنه ان اتبعت الأعراف
لكننى هنا فخورة به
و اقتحامى إياه
.
يا بت اللى يسمعك كده يقول بتحبى
آه بحبنى و دى أجمل قصة حب
.
مش خايفة تتغرى ؟
هههههههههه
علشان مؤمنة بيا ؟
انتى مصدقة ان للى بيعمل كده مغرور ؟
عارفاكى مابتعوميش على عومهم
.
أمال مختفية من البلوج ليه ؟
هههههههه
حتى انتى ؟
ناقص تقولى ان روحى مبقيتش موجوده
.
و هى موجودة ؟
يمكن كانت بتشحذ قواها . انما مش حاساها اهى منورة و للا ايه ؟
شمى ريحتها
.
آه شايفة الروح
بس برضه فينك من البلوج تانى؟
قلتلك مشغولة غير انك عارفه اهتماماتى متغيرة و كل مرحلة بتاخد وقتها
.
هتقفلى البلوج ؟
مش شرط
بس انتى عارفه الأشياء بتفقد بريقها مع الوقت
التجارب بتروح
و بيتبقى الدرس المستفاد و الذكرى
و أدينى مش هنا انما هناك مش بعيد
.
هم كده الناس لما تبقى أقوى تبعد ؟
أبعد فين
من حقى أروح ورايا و أشدنى من إيدى
محتاجانى للطريق
ثم قلنا أنا لسه أهو
على قيد الحياة
.
الحالة دى هتفضل كتير ؟
انتى عارفه نفسك حبة فوق و حبة تحت
بطلى خوف بقى .. جواكى قوة تعلّى قلوب
ما هو اكيد هتعدى فوقنا قطارات
خناقات
اوجاع و خبطات
.
.
بشر أنتى ستخطئين
هذه هى لعنتك
فلا تقفى أمامها
دوما تذكرى هذه اللحظة
أغمضى عينيكى على ظلك الذهبى
لا تخشى سراديب الأسود
اسعدى أنك تغلبتى على وحش البدايات
ها أنت داخل الظلمة
صدقت الرؤية
و اعتدتى على الرؤية فى الظلام
و الآن تتنبئين
اغتنمى النور الذى يسكنك
أحبك
فلا تخافى
سأحمينا
.
.
لســـه فى سحــر فى العــالم
 
posted by Yasmine Adel Fouad at 5:27 AM | Permalink |
Wednesday, May 23, 2007
ملعون أبوهم كلهم أوساخ



البنت دي اسمها أميرة

- خدت بالك من اسمها ؟ اسمها حلو قوي
,, مش كده ؟
- أيوة ,,

انت عارف أبوك سماك باسم ليه ؟
- لأ
- ولا هو كمان يعرف ,, ولا أبويا يعرف هو سماني أحمد ليه ,, أصل احنا مش محتاجين أسامينا في حاجة ,, أبوك كان عارف إنه حيختارلك مدرسة كويسة و شغلانة كويسة و شقة كويسة و عروسة كويسة بنت ناس كويسين ,, يعني مكانش ناقصك حاجة غير اسم كويس ,, كويس و خلاص ,, في ناس بقى مش حيختاروا لولادهم غير اسمهم بس ,, علشان كده ولاد الناس دول بتبقى أساميهم حلوة قوي ,, و لازم الاسم يكون له معنى ,, و لازم يبقوا فاهمين المعنى ده ,, البنت دي اسمها أميرة ,, لما واحد معندوش حاجة في الدنيا ربنا يديله بنت و يسميها أميرة بيسميها كده علشان لما تصحى الصبح يقول لها صباح الخير يا أميرة ,, و لما تعمل حاجة صح يقول لها شاطرة يا أميرة ,, و لما ييجي نازل يسألها عايزة حاجة يا أميرة ؟
بس ,, كده يبقى مبسوط و الحياة فُل قوي بالنسباله
البنت دي اللي اسمها أميرة تبقى تلميذة في مدرسة " نجع معين " الابتدائية في قنا و عندها 11 سنة
- شوفت انت بقى الصورة ,, البنت دي كانت مشروع كبير
- ما انت لسه قايل ,, مدام سماها أميرة يبقى لازم تروح المدرسة ,, و تاكل كويس و تلبس كويس ,, لازم تذاكر علشان أميرة لما تكبر المفروض تبقى دكتورة أو مدرسة ,, و لما تبقى دكتورة أو مدرسة حتعيش عيشة أحسن ,, هي صعبة بس هو حيعمل اللي عليه ,, حيشتغل شغلانة أو اتنين كمان ,, حيعمل نفسه مش واخد باله من الفلوس اللي أمها بتسرقهم من المصروف علشان تحوشلها تمن الحلل اللي مبتصديش قبل ما تغلى ,, مش حيحشر نفسه في اللي ملهوش فيه ,, حيرضى باللي في إيده علشان ربنا يباركله ,, و لو ربنا بارك يبقى ممكن اللي في باله يحصل ,, و لو محصلش مش حيزعل ,, علشان أميرة حتعيش زي ما ربنا كتبلها ,, و حتخلف بنت و تسميها اسم حلو قوي و تحاول معاها تاني ,, يمكن
البنت دي اللي اسمها أميرة ماتت من 11 يوم
- 11
سنة !! هما استعجلوا عليها كده ليه ,, هما فاكرين يعني لو سابوها تعيش كانت حتبقى دكتورة بجد ؟
- أيوة ,, يمكن كانت تبقى ,, علشان كده انت متضايق ,, في السن ده بيبقى احتمال النص في المية لسه موجود و هي دي المشكلة ,, محدش بيطلب إن النص في المية يحصل فعلاً ,, احنا عايزين بس إنهم يسيبونا شوية نفتكر إنه ممكن يحصل
ماتت من 11 يوم بضربة شمس و هي واقفة على الطريق - الله أعلم كام ساعة - علشان تحيي موكب وزير التعليم
- يسري الجمل !! تصدق مكنتش أعرف اسمه ,, مش ده ابن العبيطة اللي بقى وزير علشان مفيش حد من قرايبه إخوان ,, هو أي كلب بسلسلة بقوا يقفوله في الشوارع ,, بعدين مفيش على الطريق مدارس ثانوي يعني ,, على الأقل العيال بتوع ثانوي طوال شوية علشان يعرف يشوفهم و هو ماشي ,, هو إيه اللي حصل في الموضوع ده ؟
- وزارة التعليم قالت لأبوها يسلم شهادة الوفاة بسرعة علشان يلغوا قيدها

- احنا بقى عندنا عجز شديد في الألفاظ الوسخة
وزارة التعليم أخدت توقيع والد أميرة على إقرار بإن الوزارة مش مسؤولة عن موتها ,, واحد منهم قال إن انتظارها للموكب ملهوش علاقة بالوفاة و الدليل إن هي بس اللي ماتت
هو ليه الكفار مبيكتبوش في خانة الديانة إنهم كفار ؟

.

.

منقول من مدونة الإنسان العظيم



 
posted by Yasmine Adel Fouad at 8:35 AM | Permalink |
Friday, May 18, 2007
" نــــــــــــون "


للساحرات دهاليز خمرية
و لنا نحن الولوج


.
.


Congratulation
My God Mother

.
.


رواية
" نــون "
لدار الهلال
Go & Check

 
posted by Yasmine Adel Fouad at 4:26 AM | Permalink |
Saturday, May 12, 2007
Digging Deeper داخل محارة الروح



تنويه

ما هو مكتوب باللون الأسود منقول
أما ما هو مكتوب باللون الاحمر
فمقتطفات من أغنيات
" وجيه عزيز "

.
.

ابتهال


أيتها الجدران القديمة
دثّرينى
طمئنينى أن كل شرور العالم
لا تطولنى
هدهدينى
بعيداً عن أصابع تتهمنى
أنى ساحرة
غداً سيتم حرقها
فى الميدان العام
وسط حشرجة هتافات عامة


" سحر الموجى "

.
.

افتتاح


" ستأتى ساعة قد أتت الآن تتفرقون فيها كل إلى خاصته و تتركوننى وحدى "


" نزيه أبو عفش "

.
.


كان نفسى أقول غنوتى
ناعمة رومانسية
طلع الكلام ناشف
كاشف هموم فيّا

لا تصرخ عالياً فقط ابتسم مستهزءاً و أقبل التحدى . إن خسرت هنيئا لك فقد صرت فيلسوفاً و إن ربحت فيكفيك أنك لم تخسر شيئا . الخطر الحقيقى يكمن فى أن الخسارة تصيب الروح لا البدن فما أسخف أن تصاب روحك بالتجاعيد بينما الجسد مازال منها آمناً و لأنك تؤمن أن عمليات التجميل تُعد كذبا على نفسك قبل الآخرين فلن تقدم عليها . تُطمئن نفسك من وقت لآخر أن تجاعيد الروح مجرد طبقة خارجية فى محاولة أخيرة لتطبيق سلاح ال self defense
. . طبقة من المساحيق التى كان السبب بمعظمها - أغلب الظن - آخرون ستزول حتما بشكل غير كلى انما معقول متى شعرت بالامان .ها أنت تكمل سيرك فى مشوار العمر . من وقت لآخر تترك شيئا منك - يُسلب منك أو يسقط عرضا او ربما عمداً فى الطرقات - . بعد كل ذلك إن حالفك الحظ للوصول أتصل خالى الوفاض إلا من تجاعيد ؟ فالروح سر الخلق ذلك الكائن الممسوس و الذى يسكننا جميعا . ما يؤثر على مثلثك الخطير ( الوحدة - الحلم - الاغتراب ) ما تراه أخطر من مثلث بارامودا

أيتها النسمة البعيدة
مُدعية النسيان
هدهدينى بين جناحيك
مررى أصابعك على كتفى
ثم اتركينى
انطلق

.
.

لو موصوفلك وصفة
اسأل ناس مش عارفه
و اعرف لما تجاوب
تسمع ألف مفيش
لو موصوفلك تحلم
قضى الليل بردان
و اعمل روحك ناسى
ناسى انك انسان

هى ثورة إذن !!! ما الذى يجعلك تتخطى كل المألوف و تثور ؟ أنوع هو من إثبات الذات بين جنبى الخسارة ؟ أم هو مجرد رد فعل لفعل مساو له فى القوة و مضاد له فى الاتجاه ؟

القطة الملساء
ترفض أن تلعق أقدام الموتى
عبثاً يحاولون لوى ذراع أحلامها
تبكى قليلا
ثم تترك لهم ذراعها
و ترحل
مكسورة
بعين حمراء
خدش عميق
و نظرة نحو ذراعها الأخرى
يليها الأفق

.
.

أنا مش عاشق ضلمة
و لا زعلت الضى

تهاجم دواخلك الضلمة . يملأ نزفك مجال رؤيتك . إلا أنك تُصر على إيمانك بالوصول . أنت من ترسم مثلث " الوحدة \ الحلم \ الاغتراب " فسّر لى وحدتك . أمسك القلم و سجل النتائج

عدد معارفك ؟
كثيرين اكثر من ان يتم عدهم . ربما للحياة المتنقله التى مررت بها

عدد اصدقائك الحقيقين من يساندونك عند السقوط ؟
ما يقرب من 20 أو هكذا أتصور

عدد من خذلوك ؟
4 أو 5 على الأكثر

تبدو المقارنة مثمرة فمن أين لك بالوحدة ؟

السماء تّمطر أرزاً
و العصفور الأزرق لا يثق بالنشويات
فيكتفى بشلالات الملح على وجهه
ثم يدعو الله من اجل الخبز

.
.

لما بنام بحلم و بعيش
لما بفوق ما بفوقش بموت

أسهل سرقة و أسخفها هى سرقة الأحلام . كذلك إجهاض الأحلام تحوط به حرمانيه .فالحلم هو طفلك الصغير ما تتعلم فيه الأبوة \ الامومة قبل الآوان . تخلقة كآله تحت التمرين . تنفخ فيه من روحك على امل أن يكبر يوما و يتحقق غير أن الأحلام كالأبناء بعضها عاق و بعضها قصير الأجل . لكن الأعمق هو فقدان الحلم بيد مقربين

البنفسجة تتنفس فاتحة فمها
كى لا تنتحب
رغم احتمالية القتل المبكر
إلا أنها مازالت تصر على مواصلة
تفتح الوريقات

.
.

شوية هموم
بتوع كل يوم
يلفوا فى رأسى
أفر يطولونى

آخر أركان المثلث المشئوم " الاغتراب " . إلى أين لا تنتمى ؟ إلى كون فسيح لكن ضيق ؟ يحاول وئد الخيال صغيراً ؟ أم أن السؤال الأكثر مناسبة هو ماذا ينتمى اليك ؟ أتراه فضاء الابداع اللطيف ؟ و روح الخلق على الورق ؟

شجرة القلق
جذورها متينة
غير أن الرياح تحيط عليائها
كالقضبان
أتراها داخل الأسوار
أم خارجها ؟

.
.

مبقيتش عارف
ده ازرق ده و للا احمر رمادى
و دى كارثه و للا ده وضع عادى
مجنون ده و للا ساكت و ثاير ؟
بردان ده و للا ده دور و داير ؟
و ده احنا و للا الكل حاير ؟

غريب هو قمع الحريات و فرض السيطرة على آخرين لمجرد قدرتنا على ذلك . و شبهة حقنا فى الامر . أحقا خلقنا الله احراراً ؟ أم مجرد هوامش للأسئلة ؟ قد يثمر التحدى حين تتبناه وحدك . لكن لابد لك من ثقة بالوقت اولا فأين عساها تباع الثقة ؟

نصف الطريق الممهد
يوحى بالثقة
و النصف الآخر
- الغير مستوى -
يعكس روح الفجيعة
و علامات استفهام
تتساءل عن الأسئلة

.
.

الليل ملاح
تايه سواح
لا بيوصل شط
و لا بيرتاح

مفتقد أنت للأمان . ربما بعض من ايمان - ليس ايمان بذاتك بل بمسميات أخرى - ينقصك بعض من تروّى . يحوطك فيض من حنين و همدان . تتساءل عن عيب مركبك . مجهد أنت من فرط العوم . تريد أن تغمض عينيك قليلا كى لا ترى ارباب السلطة . مستثمرى القهر . لكنك تخشى ان تغمض عينيك فيفوتك الفنار

تصنع من ذاكرتك مركبا
من الورق المقوى
تكتب عليه التاريخ
توقّع اسمك
ثم تلقيه وسط الموج
ليلمس
- ربما غدا -
رمل حلمك الساخن
البعيد

.
.

أنا لسه قادر فى الحزن أفرح

حين تعانى من فائض الوحدة \ الحلم \ الاغتراب . صمم على التحدى . عافر للوصول و بكل حماس امسك هاتفك المحمول و افتح لعبة snake
تعمد الخسارة دون نقاط مستشعرا قوة ال vibration
و صوت الموسيقى التى تعلن خسارتك . خذ نفسا عميقا و عاود اللعب بطريقتك . واضعا قواعدك . ثم استمتع بموسيقى الفوز الأكثر اثارة

تراهم يعتّقون الخمر
ثم يتوضئون
مدعين الطهارة بعد ذلك
اغلق أبوابك بوجوههم
مدد قدميك
و ثور
ثور
ثور
لتكن

.
.
.


هاتف الختام
.
.
لا تسيرى فى ظل جدار أمن
لا تحنى الرأس المتوهج بالأفكار
لا تخرسى اللسان
لا تخفى الروح الصعلوكة
تحت نقاب أسود قاتم
لا تقتلى الطفل العابث بالأحلام
حطمى أصنام الوهم
اقتحمى معبد آمون
لطخى الأعمدة بدمك المنتهك الحار
اخترقى قدس الأقداس
مزقى وصاياهم
اسحقى القرابين
انزعى قناع الإيمان
من فوق وجه الكائن
نكسى أعلام القوة المعزعومة
ارفعى رايات الحب
مغموسا فى شمس الحرية
انزعى ملابسك
اقفزى فى ماء النهر
بحثا عن تابوتك يا إيزيس
ارشقى روحك
سهما فى قلب الكون
كونى


" سحر الموجى "
 
posted by Yasmine Adel Fouad at 8:08 AM | Permalink |
Sunday, May 06, 2007
طيــف مــا

مملوءة أنا حتى الحافة
بطيف المرأة التى تسكُننى ،
من تقُُّص عليّا أشباه حكايات .
يأتينى صوتها المُثقل بعمق التجربة
قائلاً : -
طفلتى ،
اركضى نحو المُنتهى ،
لا تخافى ،
اعتنقى روحك بكل شرورها ،
لا تُصدقى وهم التطهير ،
فاللوحة لا تخترق أحداً
إن ظلّت - تماماً - بيضاء .
و إياكِ أن تأمنى سحر قُبلات وردية
لا تفى بوعودها ،
وحدها القُبلات الرمادية لا تكذب
فهى تأتيكِ خالية الوفاض
- إلا من متعة و قرار مؤجّل -
هكذا أيضاً تترُكِك .
 
posted by Yasmine Adel Fouad at 11:05 AM | Permalink |