Sunday, February 25, 2007
رُبمـــا فوبيـــا

أن تتحرر من فوبيا الغياب
أمر ليس بيسير
لن أدعى أننى بالكامل تحررت
غير أن عقدة الغياب
لم تعد ترهقنى \ تخيفنى
بالقدر نفسه
ربما تزيد
تنقص
تماماً تختفى
باختلاف الأيام
لكننى أدركت أن المرء دون فوبيا
ككلمات كُتبت بحبر ليس خام
لذلك لم تصدمنى عقدتى الجديدة
أسميتها فوبيا السحاب
تتسائلون لماذا قد تخشى إمرأة مثلى سحباً ؟
ربما لأننى أخشى أن احتمى بها
فتخذلنى و ترحل
أو ربما لأننى يُرعبنى أن أستظل بها
فتُسقط فوق رأسى حباتها
- كالعادة -
وخزاً
لا يهم
لم اعتد يوماً أن أبالى بالإجابات
و لا أنوى أن افعل ذلك الآن
 
posted by Yasmine Adel Fouad at 11:43 AM | Permalink |
فلـورست

النهاردة
خير اللهم اجعله خير
حصل منى موقف بسطنى بيا
اول امبارح واحد جه فى الصيدليه اشترى شريط فلورست
و بعد ما مشى الدكتورة قالتلى انه بيضرب فلورست
و انه بيشتريه يوم و يوم من قبل رمضان
يعنى مش برد بقى
النهاردة
قبل ما يدخل
الدكتورة قالتلى الراجل بتاع الفلورست جاى
دخل طبعا قاللى عايز شريط فلورست
انا بقى بخباثة تبدو تصرف طبيعى
روحت جبتله شريط فلورست
و قلتله هو البرد اللى عند حضرتك جامد اوى كده
هو الشريط اللى فات ماجابش نتيجة؟
" طبعا حبيت افهمه انى واخده بالى انه لسه شارى شريط
و فى نفس الوقت اعمل بنت ناس و خايفه على صحته و مهتمه بيه "
فقاللى اصله ليا و للاولاد
كلنا عندنا برد
فقلتله يااه الف سلامه
بس عارف انت لو متعود على فلورست
الجسم هيكون خد مناعه
و مش هيأثر ع البرد
فقاللى و الله ؟
عملت بقى انى واخده دكتوراه فى الفلورست
و قلتله آه طبعا
انت لو عايز حاجه تضيع البرد
تاخد حاجه مختلفه علشان تخف بسرعة
و الاولاد يبقوا احسن
انما لو مصر ع الفلورست براحتك
لكن مش هيجيب نتيجه
فراح قاللى خلاص عايز حاجه للبرد كويسة
و اديته حاجه تانيه و مشى
ما يهمنيش بقى انه هيروح يشترى فلورست من حته تانيه
و لا يهمنى ان الصيدلية فيها ستوك فلورست
لازم نخلص منه
لكن يهمنى ضميرى
و لامؤاخذة
 
posted by Yasmine Adel Fouad at 11:20 AM | Permalink |
Just Look

 
posted by Yasmine Adel Fouad at 3:22 AM | Permalink |
Thursday, February 22, 2007
أمسية حكى
الموضوع باختصار
كان منظماه
مؤسسة المرأة و الذاكرة
و هى أمسية حكى
باسم
قالت الراوية
الكاتبات بتختار حاجه من التراث
و يكتبوا عنها بشكل معاصر
و كان اختيار المرة دى عن
شهرزاد
الامسية كانت فى مسرح روابط
فى وسط البلد
و بجد كانت جميله جدا
و الحكايات رائعة
خفيفة
مفيش اى تشابه بين الحكايات
و كل كاتبه كان ليها روحها المميزة
و ادائها
الاجمل انى طبعا قابلت اصحابى قبل الأمسية
و صمموا ياكلوا كشرى عند ابو طارق قبل المسرح
و علشان نلاقى لبان بعد الكشرى
كانت عمليه صعبة جدا
و اضطرينا نقضيها هولز
و بعدين روحنا قعدنا مع سحر
و اتصورنا و دردشنا
و بعد الامسية روحنا قعدنا على قهوة
بس للأسف لظروف خارجة عن ارادتنا
اضطرينا نتقسم مجموعتين
لكن المهم اننا انبسطنا
و كان يوم مميز جدا
من صحبة بحبها اوى
جروب فعلا جميل
لقصص مميزة
لوجه
" عارف نفسه "
مقولتش اسمه
خوفاً
إنه يكون مش بيحب الأضواء
كانت أول مرة اشوفه
و سعيدة انى شوفته فعلا
و بقوله من هنا
ميرسى الجلاكسى
*
*
صدقتوا ان الخروجة كانت تستاهل
و ان بابا كان لازم يوافق عليها
 
posted by Yasmine Adel Fouad at 12:00 PM | Permalink |
Twist
و النبى ما لحقت اتهنا بلحظتين الانشكاح
ده انا حتى ما رديتش ع الناس
فى الموضوع المشرق اللى فات
و للا أصحابى كمان لسه ما شافهوش
علشان يفرحوا لانبساطى
مش عارفه هو غلاسه يعنى و خلاص
انى حالى يتشقلب من لحظة للتانيه
حد يقوللى ايه شقلب حالك يا بعيدة
هقوله سببين صغيرين
الأولانى
انى عايزة اخرج مع أصحابى بكرة
علشان الخروجة دى هتبقى فيها امنا الروحية
" سحر الموجى "
كفايه انى معرفتش أروح حفلة وجيه عزيز
علشان ظروف فى الصيدليه
بابا بيقوللى قال ايه
بطلى خروج كتير بقى و اركزى
أنا لسه عندى أمل أقنعه النهاردة
بس حاطة لنفسى كل الاحتمالات علشان ما اتخنقش
و أشمت فيا الناس الوحشين
أما بقى السبب الثانى
القنبله
هو انى حلمت حلم مش حلو خالص
و بما ان حضرتى أحلامها بتتفسر و بتتحقق
و بما انى حلمت الحلم ده
ما لا يقل عن 20 و للا 25 مرة
و كل مرة تحصللى كارثة مختلفة
فانا صاحية مقلقة
و بقول خير اللهم اجعله خير
و الكوميدى انى صحيت بقول لمامتى
مش انا حلمت حلم
.....
قالتلى يابنتى انتى ما بتحرميش
ما تقوليليش لما تحلميه
علشان بتقلقينى
بس بحاول أشيل كل ده من على كتفى
و افتكر لقائى بأميرة امبارح
أول ما بفتكر
بحس انى اتغسلت من جوه
و انى سعيدة فعلا
لان حلاوة الحدث ده
و كلامنا فى اللقاء
تغطى على أى حاجه تانيه رخمة
أو مالهاش لزوم
عموما ربنا يستر
و حتى لو ما خرجتش مع اصحابى بكرة
أو الحلم اتفسر
مزاجى ما يتعكرش للنقيض يعنى
و تبقى مجرد لحظة بايخة و تروح
ممممممم و الله بالعند فى العقبات
هنبسط و هروح اقرا فى الكتب
اللى جابتهالى اميرة مفاجأة امبارح
لا بجد بدات انبسط اهو
و الذبذبات الايجابية بتشتغل
أيوة
أيوة
كده تمام
" حاسة انى بظبط اريال تليفزيون "
بس خلاص
أنا دلوقتى احسن
*
تحديث
أنا دلوقتى بالليل
الحلم مش فارق معايا خالص
و بابا أول ما قلتله ع الخروجة قالى ماشى
يعنى البوست دى
delete
:)
*
*
على الهامش
لا فى الأساس
قال على الهامش قال
ميرسى جدا يا اميرة على امبارح
و يارب ما اكونش صدعتك
أو صدمتك
 
posted by Yasmine Adel Fouad at 1:12 AM | Permalink |
Tuesday, February 20, 2007
وجــه آخر للعملة

إهـــداء
إلى
إلــه
يفتح لنا ذراعيه
حتى و إن كنا لم نتُب بعد
فرص عمل
جائتنى جماعات
آمل أن أستقر بأحداها
أشخاص
يظهرون فجأة فى الحياة
يقتحمون دنياك بمنتهى الروعة و الخفة
لتدرك ان سجل عمرك الحافل
مازال قابلاً للانتعاش
بأرواح أقل ما توصف بها أنها حقاً مميزة
و أن دفاتر الأيام
مازالت ينقصها الكثير
فجعبة الزمن أبداّ لا تنتهى
نورا
و عقدها المثير حول رقبتى
فاطمة
نوراً يشعرك أن الكون مازال نقياً
أميرة
هدية القدر الجديدة
من دفعتنى
ربما دون ان تدرى
خارج حلقة \ حلبة الصمت
صديقة قديمة
لم أرها منذ 5 سنوات
و ربما لا أراها ثانية
قابلتنى للحظات داخل محطة القطار
لنتذكر سوياً طهارة الأحلام
و آخرون
يعرفون أنهم عندى مميزون
لتكتمل عندى التعويذة
*
*

جميل
ان يتآمر عليك القدر
ليخرجك من كهفك السرى
بعطر فضى
كتاب مميز
و ثوب من الياسمين
يراك مُبتعداً
تغلق دوائرك خلفك
فتراه يفتحها برفق
يأخذك من يدك
لطرق
جديدة
مجهولة
يربت على كتفيك بعصا سحرية
تقذفك وسط باقة من أرواح تآلفها
يترك على وجهك
علامة ارتياح
بسمة بعد صمت
لا يعدك بشئ
و يرحل
*
*
عارفة إن سرعة تقلبى
بين جنبى مشاعر متناقضة
شئ ربما مخيف للبعض
ربما يدعو للسخرية او السخف
لكننى أشعرنى تماما منسجمة
داخل فقاعة جميلة
و كعادتى أترك نفسى للحالة
لأحيا بين كفى اللحظة
دون أن ابالى بتقلبات القدر
*
*
طبعا ده أوضح دليل
للناس اللى بتقلق عليا
انى بفوق و بقوم بسرعه جدا
و بعرف اخد من كل حاله اللى يضيفلى
- على أد ما أقدر -
و هدوء حالة الصمت اللى فاتت
بجد فادنى كتير
 
posted by Yasmine Adel Fouad at 11:50 PM | Permalink |
Monday, February 19, 2007
Enough IS Enough

سمراء النيل منها للى كلت دراع جوزها
و منظمة حقوق الانسان
بعتتلى تاج أقل ما يوصف بيه
إنه فعلا سخيف
و انا مش فى موود تاج يا أنجى
بس برضه بلاهه نادية و بلاهة سوسو
*
*
اسم مدونتك؟
لا تاج ذكى بصحيح
أنا حرة و لامؤاخذة ده اسم البلوج
بس من غير لامؤاخذة يعنى
لماذا اخترته.. ماذا تقصد به؟
من اولها بقى ناس هتحشر نفسها فى اللى مالهاش فيه
البلوج ده اتعمل كده صدفة بحته
لانى كنت هعمل مدونة جماعيه مع صاحباتى
و كان لازم يكون ليا بلوج منفرد
فعملت ده
و بعدين بقى كنت بمر بمرحلة انتقاليه
و قرار بالبعد عن منتديات كنت خايفه ادمنها
لانى مبحبش الاحساس بانى هموت على حاجه
فسيبت المنتديات دى و قعدت اكتب فى البلوج لنفسى
و اذ فجاة بقى ليه جمهور
اختيار اسم انا حرة بقى
كان بسبب انى كنت محتاجه اختار اسم
مش فريش علشان لما اكتئب ما اكرهوش
و العكس
و فى نفس الوقت الاسم يكون بيعبر عن
حلم او هدف او صورة مش عايزة انساها
و افضل أسعالها و عايشاها
من هنا جه فى بالى اسم انا حرة
هل فكرت في إغلاق المدونة.. والسبب؟
الفترة دى مش فكرت انى اقفلها لكن فكرت انى آخد اجازة
الا ان قرارى لسه ما اخدتهوش و ممكن ما أخدهوش
ده كان مجرد اقتراح منى لذاتى
بخصوص انى ممكن أقفل المدونة فى يوم
فده احتمال وارد
لانى انسانه ملوله و هوائيه
و لو حسيت للحظة ان المدونة بقيت بكتب فيها
بهدف امتاع المرور مش بهدف الالتحام مع ذاتى
هقفلها
صورتك ف المدونة، رمزيتها؟
مش فاهمة
بس لو الصورة اللى انا بستخدمها لما ارد على حد
فانا مش حاطة صورة
تخطيت المرحلة دى من زمان
حتى مرحلة انى احط صورة فى الماسنجر
لسبب بسيط انى لو حطيت صورة
هحط صورة تعبر عن موودى فى لحظتها
و مش حابة يبقى فى مجال للتعريه النفسيه
يعنى مساحة خصوصية بمعنى أوضح
لو كنت فهمت السؤال غلط
فعادى يعنى
طبيعة كتابتك في المدونة بشكل عام.. سياسة.. قصة.. عبث.. كلام فاضي؟
ههههههههههههههههه
قشطة اوى
حلو السؤال ده
باختصار طبيعة كتابتى فى المدونة
فهى فيها كل الكلام المحشور فى زورى
تصنيفه لا يعنينى بالقدر اللى يعنينى انى ما أبلعش الكلام
لانه احيانا بيكون سام بعيد عنك
انما لو لازم أصنف
التصنيف العبثى يغرينى
لماذا تدون أصلاً؟
مالكش فيه
عادى مساحة حابة أفردها
لنفسى
بنفسى
و مع نفسى
من خلال إطار واسع مكشوف للعالم اجمع
لو مطلوب اجابة هايفه
فأنا رغايه و بحب اتكلم و اتناقش و اقول و اكتب
هعمل ايه يعنى هروح ابيع ترمس أكيد هدوّن
يعنى تغيير و وسيله اخرى للكشف
أحلى جملة قيلت لك في وصف مدونتك؟
امممممممممممممم
مش عارفه
او مش فاكرة
و اكيد مش هدوّر
بس اعتقد فى اكتر من حد كان بيدخل يقول
ان المدونة لشخصية فعلا حرة
أحياناً الجمله دى بتسعدنى
و أحيانا لا
لانى مش تماما حرة
بس بما ان الحرية سعى فأنا بحاول
أما بقى اللى بيتكلموا عنى كشخصيه أسطورية
بيقلقونى جدا و مش بيسعدونى الحقيقة
لان الأساطير ليس من حقها ان تخطئ
و لانى أكيد فيا سلبيات بالهبل بس فى ناس مش بتاخد بالها
و ده بيخلينى احس انى المفروض أتصرف بناءا
على الصورة اللى قدامى راسمهالى و ده هيسلبنى حريتى
و الحرية انك تتصرف بطبيعيه و تكون نفسك دون مجاملات
التعليقات بالنسبة لك.. أهميتها؟
أكيد حاجه مهمه
انما ما يموتش الانسان من غيرها
محدش يكره التفاعل مع الجمهور سواء بالنقد او الدعم
احساسك انك مش لوحدك او ان دماغك دى مش طفرة
ليه قيمة مش صغيرة
أحلى بوست كتبته.. ضع اللينك.. ثم اذكر لماذا؟
من غير تفكيرهو بوست قديم جدا
و أغلب الناس الكتير اللى بتزورنى ميعرفهوش
و هو كان بوست عن جدتى الله يرحمها
و آدى اللينك
جدتى
على المستوى الانسانى بحب بوست تانى بعنوان
عمرك شوفت استقرار علاقة بيوجع
ليه يمكن علشان كان فيه مساحه كبيرة من كشف جوانب عنى
تخطيت معظمها و كنت بكتب من خلال نظرة صحيحة
بعد تجرع العقبات و رؤيتها بشكل غير مكتمل
جميل هو تحليل الامور بعد تلاشى صدمتها الأولى
أفضل مدونة قرأتها.. يمكن اختيار عدة مدونات؟
ممممممممممممم
لا فى كتير و ممكن تكون مش الأفضل
لكن بلاقى فيها نفسى او بتصرف فيها بعفوية تسعدنى
لانهم كتير اوى مش هكتب اسامى
مش دبلوماسيه
بس لنفس السبب اللى مش كاتبه فيه لينكات مدونات عندى
ع البلوج
لانى بحب احتفظ بمساحة خصوصية
و رؤيتى لنفسى من خلال مدونات اخرى شئ خاص جدا
بس الناس اللى بتابعهم باستمرار و مش بفوت بوست عارفين نفسهم
أفضل بوست قرأته.. يمكن اختيار أكثر من بوست.. ومتنساش اللينك؟
طبعا صعب أحدد لان كل موود و فى حاجه بتعجبنى فيه
و اعجابى بالبوست لا يعنى بالضرورة روعتها
و نفورى من بوست لا يعنى بالضرورة انه أوف ووحش
هل خسرت صديق بسبب كتابة هنا؟
سؤال غريب اوى
عموما لا
و لو خسرت حد من خلال كتابتى هنا
فهو بالتاكيد ماكنش صديق
لسبب بسيط
ان أرائى هنا هى ارائى هناك و فى أى مكان
حد قل أدبه ف التعليق.. إيه رد فعلك؟
عادى جدا هقول ميرسى للمشاركة
و كل واحد حر فى رأيه
و لو قلة ادب بمعنى سفالة
فالناس دى عقابها انها ما تاخدش اكتر من حجمها
و تتعامل زى أى حد معدى و ما اخدتش بالك منه
لانه مش مميز
و نسيت أقول
ان الكلام ما بيلزقش
و ان الشتيمه بتلف و ترجع لصاحبها
أسوأ مدونة.. الإجابة إجبارية.. ويمكن اختيار عدة مدونات
مفيش حاجه اسمها اجباريه
يعنى مينفعش يتغصب عليا اجاوب
غير انى مش بتابع بلوجات وحشة
يعنى لو مش عاجبانى مش بروح و تثبت فى دماغى
لدرجة انى افتكرها دلوقتى
أسوأ بوست.. لازم تجاوب.. ويسمح بتعدد الاختيارات؟
مش بوست محدد
بس مش بحب الكلام الكتير فى نفس الموضوع
يعنى موضوع صدام مثلا مكنتش بقراه فى اى مدونة
لانى كنت بحسه كتير اوى
اى موضوع بقى كده يفضل واخد فترة منتشر فى كل حته
بتلاقينى مش مستمتعه بيه
أسوأ مدون.. ما هو حاتجاوب حاتجاوب؟
لا بجد تاج رخم اوى و سخيف جدا
و على رأى سلمى سمج
اعتقد المدون الرخم هو اللى ممكن يكون ألف التاج ده
*
*

طبعا مش همرر التاج ده لحد
و اى حد هيمررلى تاج تانى مش هجاوب عليه
علشان كده كتير يا بشر
لو كان حبيبك عسل بقى
 
posted by Yasmine Adel Fouad at 7:50 AM | Permalink |
Saturday, February 17, 2007
Keeping Silent

أين طرف الخيط ؟
إلى أى مدى تمتد اللعبة ؟
لا يهم
فأنا مازلت أصُــر على الالتزام
بدورى المُختار
محتميةً بسلاح من صمت
أجلس
ألملم فتات الروح
أخبّئها
داخل دهاليز سحرية
بفضاء أخضر من وهم
لا يتسع بالضرورة للجميع
*
*
Somedays i feel broke inside but i can't admit
Sometimes i just wanna hide
 
posted by Yasmine Adel Fouad at 10:08 AM | Permalink |
Tuesday, February 13, 2007
Locked
 
posted by Yasmine Adel Fouad at 12:21 AM | Permalink |
Saturday, February 10, 2007
نــقصـــان روح
بمفردها جلست هى ، ترفض أن تمارس نشاطاً يهزأ بوحدتها ، أو فناً يزيدها انغماساً
فى محارة الروح . انفردت بنافذة مكتومة بين جدران خرسانية تماماً مثلها هى المحبوسة بين كلمات من رصاص . عاندتها السحب ، تجمعت حشوداً و تركتها وحدها . ما رأته حجزاً صريحاً لها بعيداً عن مرمى ما يلزمها \ ينقصها من رؤى ، ربما لذلك لم يشفع عندها احتمالية ان يكون ستار الغيم يحمل بين طياته عُقداً من حبات المطر . خُيّل لها أن مواويل الطبيعة تتحد دون إرادتها ، لحظة أن احتل القمر عينيها ، أخذ روحها بعيداً ، و رحل . لتعبرها اللحظة الأقسى وقعاً على جوفها . حين رأته تماماً أبيض . تماماً مكتمل . كأنه باكتماله يُسلّط كل كشافات الوجع على شعورها بالنقصان . يُذكّرها كم هو الياسمين هش أحياناّ ، رفضت أن تدافع عن ياسمين هو أيضاً تماماً أبيض . لا يهمها أن تعلل تساقطه \ سقطاته ، ربما لإدراكها أن لون زهرة الياسمين الأبيض لم يكن سوى إخطار مسبق يُعلمها أنها كلما خاضت عمراً كُتب عليه أن تُمزق وصاياها ، لتبدأ من جديد


 
posted by Yasmine Adel Fouad at 6:55 AM | Permalink |
Friday, February 09, 2007
آه يـــا حـــارة معفـنـــة

امبارح روحت دريم بارك
تانى مرة ع التوالى فى نفس الأسبوع
أنا اللى روحت دريم بارك مرة من 5 و للا 6 سنين
اروحها مرتين فى اسبوع واحد
قصره يعنى
روحتها تانى ليه ده سؤال وجيه
المرة دى كنت مع قرايبى
يعنى خروجة مختلفه
حد هيقوللى
طب دى أحلى و للا خروجة أصحابك
هقوله دى نقرة و دى نقرة
يعنى أصحابى دول أصحابى
مش عايزة نباهة يعنى
:)
و فرصه نخرج فى مكان مفتوح و نلعب
غير ان المطرة كانت عاملة جو مختلف
أما مع قرايبى
فأنا لعبت العاب ضعف اللى لعبتهم مع أصحابى
و رقصت مع دوبى فى مسرح الأطفال
طبعا مش رقص بلدى
لانى قلت مش بحبه
بس رقص اطفال بقى
و غنيت مع
اغنيه دبدوبة التخينه
و بابا جاى امتى
و انبسطت جدا
ماكانش معكنن عليا
غير انى ما رسمتش على وشى زى الأطفال
كنت أصلا عايزة ارسم فراشه
على نص وشى كده
بس المشكله
انى كنت هلعب الشلالات
فهتبهدل
ابن خالتى قاللى
و عادى هتمشى فى الشارع
باللى مرسوم على وشك ده ؟
قلتله اه
هو حد ليه عندى حاجه
أنا حرة
قاللى مكنتش اعرف انك مجنونة
لدرجة ترقصى مع دوبى
و تاكلى مصاصه فى الشارع
و كمان عايزة ترسمى على وشك
قلتله أديك عرفت
غريبة
انك مكنتش عارف مدى جنونى
العمر ده كله
حاجه واحده اللى كانت محجمة فرحتى
فى اليوم ده
و هو همجية البشر
اللى فى البارك
*
*

بجد معتقدش ان الهمجيه دى
ممكن تكون بتحصل فى أى دولة متقدمة
أو عايزة تتقدم حتى
الطوابير زحمة طبعا فتلاقى ايه
البشر بينطوا بقى قدام اللى فى الأول
علشان يوصلوا
او واحد ييجى يقولك ممكن بس هعدى
علشان ابقى جنب بنت قدام
تقوله عدى
تلاقيه إذ فجأتن بينده
يا فتحى
يا شوقيه
يا مستكه
تعالوا فى مكان قدام
و لما تبصله يقولك علشان تبقى مع اخواتها
يا روح خالتك
و لان الأمر ما يسلمش
و فى ناس بتدافع عن وقفتها فى الطابور
بتحصل بقى مهازل جوه
لان الأساليب بتختلف
و فى لمح البصر يقوم هوبا تحصل خناقه
علشان فى ناس رافضة ان حد ينط قدامها
تروح تلاقى واحد راح قالع حزامه
و التانى راح مشمر
و هات يا ضرب
و ده حصل فى 90% من الألعاب اللى ركبتها
بس كله كوم و اللى حصل فى الشلالات كوم تانى
الطوابير المفروض دايرن داير كده
و الصف بيلف
و فى حوالى 7 صفوف علشان توصل للباب
فالراجل قال ايه أول ما فتح الباب
محدش مشى فى الطابور
لا دول كل واحد كان بينط الحاجز اللى قدامه
علشان يطلع للصف اللى قدامه
و يختصر لفه طويله
و مش عارفه ازاى
كل الناس كان عندها نفس الفكرة
لان التنفيذ كان جماعى
يحسدوا عليه
أنا بقى اول مرة
كنت واقفه اضحك وسط الناس ع المنظر
و مش محبذة انى انط يعنى
و عماله اقول لقرايبى
لا احنا خلينا منظمين
و كلام محترم كده
يبدو غريب ع الموقف اللى احنا فيه
فجأة الباب اتقفل
بعد حوالى نص ساعه الباب اتفتح تانى
و حصلت نفس الحادثه
طبعا مش محتاجه اقول ان المكان
اللى كان يشيل 2 او 3 مزنوقين
كان واقف فيه حوالى 7 معرفش ازاى
المهم لقيت بنت ورايا او جنبى اوفوقيا
اذا صح التعبير بتقوللى
يللا نطى بقى يا توسعيلنا ننط
يا ستى يهديكى يرضيكى انط ازاى
فوق البشر يعنى و أوسعلك ازاى
و انا مش حاسه برجلى أصلا
وسط كوم البشر دى
راحت بقى مشهدة المجتمع الضلالى عليا
انى مش عايزة انط
و الباب هيقفل
كانها داخله الجنه مثلا
قمت قولتلها طيب هحاول
و عديت رجل من ناحية
و رجلى التانيه معايا و بس على كده
لا عارفه أكمل لقدام و لا أرجع رجلى لوراء
و هى تقولى يلا الباب هيتقفل
طب اعملها ايه فضلت مشعلقه كده
لحد ما اخويا و ابن خالتى نطوا
و اخدونى ناحيتهم
و ده فكرنى لما عضلات جسمى كلها وقفت
و افتكرت انى اتشليت و فضلت اضحك
من خمس سنين
بس دى قصة تانيه
المهم
الظاهر ان النط فى الطوابير ليه ناسه
بس بجد كل اللى كان جاى فى دماغى لحظتها
جملة خالد الذكر اللمبى
" آه يا حارة معفنة "
حد هيقوللى ايه اللى غاصبك على كده طيب
هقوله انه المرح يا عزيزى أيبك
و دى اللحظات اللى ما بتتنسيش فى الآخر
خلاصة الكلام
لو سألنا ليه الناس بتنط
بغض النظر عن البعد الميتافيزيقى
اللى بيدل ان الشخصيه المصرية
بتحب تسبق الأحداث
و تنط لقدام حتى لو مش حقها
و ان لو معليهاش رقابه هتاكل بعض
و بغض النظر
عن الأمن اللى مش أمن
اللى لما تقوله فى خناقه و ناس بتاخد حق غيرها
يقولك اولعوا فى بعض أنا ليا اشغل لعبتى
بغض النظر عن كل الأخلاق دى
هقول حاجه بسيطة
ان لو فرضنا الصف فيه 200 واحد
و اللعبه بتشيل 40 ففى خلال 5 ادوار
دورك هيكون جه
انما لما كل واحد يعدى قدامه 5 او 6
شوف كده كام واحد هيعدى
يبقى الطابور عمره ما هيتحرك
ده لو ماكنتش بترجع لوراء
**
*
ده غير طبعا
الناس اللى قدامها الباسكت
و ترمى الزبالة فى الأرض
دول بقى عايزين يتقتلوا مباشرة
بانهم يتحشروا فى طابور من الطوابير دى
مدى الحياة
*
*
عموما أنا فعلا انبسطت الحمد لله
جدا كمان
*
*
على هامش الموضوع
أحب أوجه شكر لبابا
اللى روحت الرحله دى على حسابه
و لعبت كل الالعاب اللى بفلوس كذا مرة
برضه على حسابه
و حتى لو ده واجب عليه
فشكرا برضه مش هتأذينى لو قلتهاله
خصوصا انه كان كل شوية ييجى يحضننى
و يقوللى أنا فرحان بيكى أوى
بقالنا كتير ما روحناش رحلة كده مع بعض
باستثناء المصيف طبعا
عايزة فلوس
عايزة حاجه
طب مبسوطة
أنا طبعا بقى اروح أقوله
ما تروح تركب حاجه طيب و انبسط انت كمان
سيبك مننا و عيش حياتك
صحيح سعادته انه يشوفنا مبسوطين
أنا مؤمنة ان كل واحد من حقه يشوف انبساطه
و ان مش لازم الأم و الأب يضحوا علشان أولادهم
اللى مش سعيد مش هيعرف يسعد
لكن تلك قصة أخرى
 
posted by Yasmine Adel Fouad at 11:47 PM | Permalink |
Wednesday, February 07, 2007
Time for TAGS
أدى تالت تاج يوصلنى و ده جانى من مصرى
بقيت كل ما ادخل بلوج و أشوف تاج أخاف ليكون اسمى مكتوب
بس عموماً التاج ده لذيذ و فى السريع
*
*
إكتب الثلاثة أسطر
بعد الخمسة أسطر الأولى
من صفحة 123 من الكتاب
اللي بتقراه دلوقتي
*
*
الإنسان يتدرب على كل شئ
حتى على قول الحقيقة . ألا تعرفين ذلك ؟
رأيت ابتسامتك اللئيمة تكاد تجرحنى
و أنتِ تقولين : و أنت لا تتدرب إلا على العناد
عنادك لإغراق ذاتك بالتفاهات
" و لأن ذلك لم يكن واضح الدلالة كما تصورتِ "
أضفت رأساً : كأنك لم تتعلم فى حياتك
إلا استبدال الغلطة بأخرى أشنع منها
لم أقل شيئاً كنتِ تتكلمين و كأنك خرجتِ تواً من نفسى
*
*
رواية
تفريغ الكائن
بقلم
خليل النعيمى
 
posted by Yasmine Adel Fouad at 9:58 AM | Permalink |
شخبطة قديمة فى ساعة وجــع
 
posted by Yasmine Adel Fouad at 2:16 AM | Permalink |
Tuesday, February 06, 2007
What a mess !!!
هو ده اللى أنا حاساه بالظبط
لخبطة الصورة دى
بألواناتها
بالذبذبات اللى خارجة منها
مسيطرة عليا فكرة واحدة بس
أنا لازم أشتغل
علشان أستقل مادياً
لان الاستقلال المادى خطوة واحد
فى أى مشوار همشيه
بس أشتغل ايه
أنا دلوقتى بتدرب فى صيدلية
و ممكن اشتغل بقى فى أى صيدلية
بس بجد الموضوع ممل جدا
و مفيهوش حياة
مع انه متجدد و بجد سهل
بس أنا مش بحبه
مش شايفه روحى فيه
زهقانه جدا
و مش عايزه أشتغل مندوبة فى شركة أدوية
مش حابة المجال كله على بعضه
طب أشتغل ايه
مش عارفه
بجد مش عارفه
فى الصحافه
جربت قبل كده و زهقت
هو العيب فيا ؟
احتمال
طيب نفسى أشتغل ايه
مش عارفه
حاجه ليها علاقه بالكتب
ده اللى واصلاله
ايه بالظبط مش قادرة اعرف
مش كاتبه طبعا
علشان الكتابه دى حاجه
جنب اى حاجه تانيه هشتغلها
صحيح غالبا هشتغل بشهادتى
مؤقتا
لحد ما اعرف انا عايزة ايه
علشان الاستقلال المادى
بس هبقى بجد مش مرتاحه
طبعا احساسى انى مش هبقى مرتاحه لوحده
كفيل انى فعلا ما ارتاحش
علشان الموضوع فيه جزء نفسى
بس طيب اكدب عليا يعنى
ده حتى ما يصحش
مش عارفه أنا عايزة اشتغل ايه
و ده خانقنى
و مخلينى حاسة انى هضطر مؤقتا
اشتغل فى حاجه ليها علاقة بالصيدلة
و ده منرفزنى جدا
بس فى نفس الوقت
مينفعنيش قعدة البيت خالص
دماغى وجعتنى من التفكير
اشتغل ايه
اشتغل ايه
قلت اكتب عن الموضوع
يمكن ارتاح
بس انا عارفه ان الموضوع ده بالذات
ما يتحلش بالكتابه
يتحل ازاى بقى
ان ربنا يهدينى
و اعرف أنا عايزة إيه
*
*
ياريت محدش يقوللى
حب ما تعمل حتى تعمل ما تحب
لانى ببساطة معرفش
ممكن اعمل اللى ما بحبهوش
بس عمرى ما هحبه
او هعمله بنفس
 
posted by Yasmine Adel Fouad at 9:23 AM | Permalink |