Tuesday, January 30, 2007
كمـــان تــــاج

البت ياسمين صاحبة بلوج إنسانة منها للى كلت دراع جوزها و نافوخه كمان باعتالى تاج رخم كده
هى حدوته بقى مقلتلكيش يا أختى تردى الجميل لا و شوف البراءة التاج سؤال واحد بس
اكتب خمس حاجات ماحدش يعرفهم عني خااالص
" ياحلاوة طب فين مساحة الخصوصية اللى صوتى اتنبح عليها
عموماً أنا هكتب خمس حاجات محدش من اللى بيعدى هنا عارفها مش حاجه محدش خالص يعرفها علشان كده هيبقى عيب يعنى
.
.
أولاً
دايما بقول ان عندى حاجزين يبانوا ساذجين بس لو عديتهم عارفه انى هدخل مرحلة مختلفه داخلياً
الحاجزين هم انى أقص شعرى و ده خلاص تخطيته و قصيت شعرى من 3 شهور كده و الحاجز التانى انى أغنى قدام حد دندنة يعنى علشان حتى الدندنة مش بعملها ببقى محرجة و طبعا محدش يستذكى و يقولى صوتى حلو و للا لا لان أكيد صوتى عادى مش خانفه يعنى بس مش نجاة الصغيرة مع ان كان ليا واحده صاحبتى كانت بتقول ان صوتى فى رنة مميزة كده نفسها تبقى فى بنتها مش صوت حلو لا رنة كده معرفش هى ايه الصراحة
محدش يقولى غنيلى بقى علشان مش هغنى أكيد بس اللى بستغربله ان عندى ابن عمتى مثلا صوته اللهم احفظنا و على طول بيغنى
و منشكح بصوته .. يللا مسيرنا نكسر الحاجز ده قولوا يارب
.
ثانياً
بدأت كتابه من امتى دى برضه حاجه محدش يعرفها بس أنا بكتب من و أنا عندى 4 سنين .طبعا مش بكتب قصايد و قصص لا كنت بكتب جوابات لبابا كل يوم كذا جواب فده أكيد ثبت عندى أساس اللغه و عمل معايا فرق لكن بدأت اكتب قصص من و أنا عندى 10 سنين و لسه فعلا محتفظة بالقصص دى ولما حد فى ابتدائى بيقراها بينسجم معاها جدا لكن لما انا بقراها دلوقتى بحس بقمة السذاجه علشان فرق السن . أما بقى كتابتى كمقالات بحتفظ بيها لنفسى بدأت اعتقد من وانا عندى 12 سنه . و الخواطر بدأتها و انا عندى 17 سنه لكن المفاجأة ان الشكل الى مكتوب دلوقتى او الحرفية اللى ملامحها شبه موجوده أحيانا عندى دى ظهرت من سنه مثلا قبل كده ماكانش ليا سكه معينه شايفانى فيها
كنت بكتب خواطر اه بس مش بنفس الشكل او الروح دى بس أكيد كنت ببقى حاساها برضه . دلوقتى حاسه انا عارفه شويه انا بعمل ايه .. بس لسه فى عهد التجربة ولو انى متفائله و حاسه ان فى أمل أنشر فى يوم من الأيام
.
ثالثاً
كنت عايزة اتحجب و انا فى أولى اعدادى بس بابا مارضيش علشان انا صغيرة و هندم على شعرى بس فى أجازة تانيه اعدادى رجعت تانى قلت عايزة اتحجب و فعلا اتحجبت و من ساعتها و انا محجبة اهو ربنا يديمها علينا نعمه و لو ان حجابى كان صدمة لكل اللى يعرفونى علشان دماغى من يومها شمال مع نفسها و ناس كتير من البلوج بيبعتولى يسألونى اذا كنت محجبةهو الحرية ماتمشيش مع المحجبات و للا ايه ؟ بس ارجع و أقول ده حسب مفهوم الواحد للحرية
.
رابعاً
ممكن أقول انى أكاد أكون مبحبش كل أنواع الأكل فيما معناه أغلبها و هقول على سبيل المثال و ليس الحصر مثلاً
مش بحب اللبن و بالتالى كل منتجاته مش بحب السلطة بكل مكوناتها منفرده او متجمعه باستثناء الخيار مش بحب الكوسه و لا الباميه و لا الفاصوليا الخضراء و لا المسقعه و لا العدس و لا السبانخ ولا الكرنب او القرنبيط و لا المحشى ماعدا ورق العنب مش بحب المخلل او الباتنجان نادرا لما باكل الفول و الطعميه يعنى بيبقى حدث تاريخى لو غلطت و كلتهم يعنى دى مجرد أمثله و طبعا الاسهل اقول بحب ايه يعنى دى حاجه كل الناس بتتصدم منى فيها و مشكلتى لو جيت فى يوم اطبخ مش بدوق حاجه مبحبهاش طبعا فمش بعرف نظامها ايه .. و من اكتر الحاجات اللى بكرهها ان حد يحاول يفرض عليا أكله معينه لان ده استحاله يحصل
اه صحيح بكره كمان دكاترة الاسنان و امتحانات الشفوى اللى كانت فى الكليه
.
خامساً
دى حاجه بقى محدش فى أهلى يعرفها و يمكن حكيتها لنورا من يومين فى ساعة لسان فالت لما كان عندى 9 او 8 سنين باين لعبت انا و اتنين صاحباتى وولد تانى مش عريس و عروسه عارفه الناس دماغها وحشه لا لعبنا زى مسرحية كده و كنت المفروض انا مرتبطه بالولد باين على رأى أسامة منير أس أس ارتشباط عاطشفى و واحدة صاحبتى خالته و التانيه عمته و اننا متخانقين و كل واحد هيكتب جواب للتانى يصالحه بيه و اللى جوابه هيكون احسن التانى هيديله عنب و فطير ههههههههههههه عيال بقى
المهم عايزة اقول انى كتبت حتت جواب حوالى صفحتين فلوسكاب و هو الواد كتبلى فى ورقه كده بحبك بخط كبير اوى روحت انا اتنرفزت انه كاتبلى كلمة يتيمة و قطعت الجوابين و رميتهم فى البسين هههههههههه مع ان دلوقتى عرفت ان الحسبة مش بكتر الكلام الرك ع الإحساس يا معلم
يالهوى مش متخيله انى بحكى الهبل ده لحد و لا متخيله ان الولد ده ممكن يكون فاكر أصلا أنا فى نفس السنة روحت سكنت فى مكان تانى
و معرفش عنه حاجه من ساعتها ...
.
.
انسانة ليكى عندى علقه يابت مش مصدقه انى كتبت الخلل ده
طبعا مش همرر التاج ده لحد علشان التاج ده غرضه مش شريف
بس لو حد عايزة و غاوى تسييح لنفسه بالشفا
 
posted by Yasmine Adel Fouad at 11:15 PM | Permalink |
النــداهــة
للحرية
التواءات
أكفان خادعة
و بعض من شهوة
للحرية
بريق
لون أحمر
و فيض من حماس
للحرية
أبواب عدة
بعضها تماماً مغلق
و نافذة واحدة بعيدة
تغرى بالصعود
للحرية
رذاذ عطر
وهم من سحاب
أياد من وجع
أعين تصمت حين ترى
و أحلام
و لنا نحن البشر
يُعزف بوق الحرية
بعضنا يلبى النداء
و بعضنا يخشى تجربة الجديد من الأشياء
.
.
موقنةً أنا أن داخلى حر
لكن يبقى الجسد مدفوناً فى البحث
عن درب ما للمطلق
فبين حرية و غربة
أجدنى ألهث
أحاول أن أصل لمجهول
لفرط قوتى
أشعر أنه يخشانى
*
*
ما يلى منقول
الحرية هى حقك أن تكون مختلفاً
*
الحرية هى ألا تنتظر شيئاً
" أحلام مستغانمى "
*
*
لا أنتظر شئ
لا أأمل فى شئ
لا أؤمن بشئ
أنا ألأن حــر
" نيقوس كازانتياكوس "
*
*
كل لديه رؤيته الخاصه للحرية
لكن من منا تماماً حُر ؟
فلنحذر
حياتنا لنا
و من كان غيرنفسه
فبئس الملاذ
قرأت عن الحرية سطوراً
فأخذتنى أسطورة الحبر و الكلمات
وددت لو كتبت عن رؤية آخرين للحرية
فجاءت كلماتى تدهشنى أو تدهسنى
كيف خرجت كلماتى بثياب حبرية ؟
هل ملكنى ساحر الفصحى ؟
أم أنها لحظة ما سترحل ؟
كنت أنوى أن اكتب
الثلاث جمل المقتبسة
عن الحرية
فقط لا غير
لكنى فوجئت بالكلمات أخذت هذا الثوب
فعذراً
لكنى لا أملك سلطة على قلم
و لا أنوى قهر الكلمات
 
posted by Yasmine Adel Fouad at 5:48 AM | Permalink |
Saturday, January 27, 2007
بعض من عبث
بالأمس مررت بلحظة ما
أو مرّت هى بى
فى احتكاك مباشر
مفاجئ
ربما لهذا
أردت أن أخلّد لحظة لم أتوقعها
ففاجئتنى أكثر بمحتواها
من خلال بعض الاسترسال
.
.
.
جميل أن يأتيك القدر لاهثاً
عن عمد
أو عن عبث
فيمر بمحاذاة بعض الأشياء
لا يهمنى كل ذلك
فقط مأخوذة أنا بسحر حدوث أمر لم أتوقعه
نتساءل مراراً عن أسرار دهاليز القدر
و حين نمل التساؤل
نعتزل الساحات
ترتطم بنا الأجوبة
ها أنا
دون سعى منى
أجدنى شاهدة على ذاكرة الأحداث
فهاهى ستائر المجهول بمسرحى القديم
تُـرفع عن مقاعد و أحجيات
إضاءات خافتة تكشف رموز منسية
جدائل الألغاز تنحل
عقدة بعد أخرى
فتتحرر خيوط العنكبوت من براثن الغيم
أجلس تضحكنى الحقائق
لفيض ماتوهمته عنها قبلا من رؤى
جميل أن يكافئك القدر على توقفك الطويل
عن البحث بين الفخاخ
عن أدلة أو نكران
و الآن هنا
بعد
وردتين
سبعة فناجين من القهوة
مقعد مقلوب بالذاكرة
نافذة لا هى مغلقه و لا هى مفتوحة
و بعض الأرقام
أجدنى أمام خفايا
ركضت نحوها يوماً
فهربت
تنكرت لها مراراً
فأنكرتنى
و حين نسيتها تماماً
جاءت هى
 
posted by Yasmine Adel Fouad at 11:09 PM | Permalink |
أنتى بنت .. طب ما أنا عارفه
انتى نسيتى نفسك ؟
انتى بنت
.
.
و هو بنت يعنى إيه ؟
.
.

من أكتر الحاجات
اللى ممكن تضايقنى او تنرفزنى
إن حد يجاوب على سؤال
أو حله لمناقشة يكون متلخص
فى جملة من كلمتين
إنتى بنت
بغض النظر بقى عن
قضية المساواة
أو حقوق المرأة
أو أى تفرقة
أو تعريف لمجتمعنا
بإنه ذكورى معظم الأحوال
كلامى هنا فى المطلق
يعنى مش بدافع عن قضية معينه
من خلال البوست ده
فى ناس كده تلاقى الحل الوحيد اللى عندها
لقفل نقاش هو انك بنت
يعنى عايزة تروحى حفلة لوحدك ازاى
انتى بنت
عايزة تعيشى لوحدك ازاى
انتى بنت
عايزة تسافرى تشتغلى بره ازاى
انتى بنت
عايزة تقعدى من غير جواز
ياداهية دقى
انتى بنت
عايزة تكتفى بنفسك
فى مرحلة معينه من حياتك ازاى
حضرتك بنت
كانك بتخرق ناموس الكون
مين قال ان فى خط مرسوم للبنت
مينفعش تشذ عنه
يعنى اعرف اتقبل وجهة نظر حد محترم دماغى
و بيقنعنى برأية
مش حد مصمم يقوللى
انتى بنت
انتى بنت
انتى بنت
اشربى بقى
طب ما أنا عارفه
و عارفه انى مش بسئ لأهلى
و لا لدينى قبل كل شئ
و لا لنفسى
يبقى الغلط فين
اننا صحينا من النوم
لقينا اللى قبلنا بيعملوا كذا
فاحنا عيب علينا لو معملناش زيهم
أكيد لا
صحيح الموضوع ده مش على طول بصطدم بيه
و خلاص بقيت اعرف ارد على اى حد بيواجهنى بحقيقة
انى بنت
علشان يفوقنى
مع انى شايفه نفسى بجد
مش بطالب بحقوق غير منطقيه مثلا
وعارفه ان الصراع طويل
بس أكتر ما يستفزنى فى الموضوع
لما يكون اللى بيحاول يرجعنى للصواب
حد ملوش علاقة بيا
و مش مكتفى انى محترمة رأيه و خلصنا
لا ده عايز يشربهولى
بس بقيت اعرف ازاى اختار
النس اللى احب اتشارك معاها اطراف الحوار
الناس اللى تختلف معايا
بس كلانا محترم وجهة نظر التانى
.
.
رغم ان كلمة انتى بنت بقالى كتير ما سمعتهاش
بس حسيت انى عايزة اكتب البوست
علشان افضح رؤى أفقية
محددة بأسوار من وهم
و مش قصد الكلام
ان اللى رأيه غير رأيى
عليه اللعنة
يعنى عادى جدا
ساعات بكون غلط
و اللى قدامى هو اللى صح
بس اسلوب النقاش يفرق
و الأدلة اللى بيعرضها انسان فى مناقشه
بتكون ادله متموجه
قابله للشد و الجذب
مش مانشيت صحفى
يعنى اقنعنى
ولامؤاخذة
مش بانى بنت طبعا
لكن بانى مينفعش اعمل الحاجه دى لسبب
منطقى مفهوم مش محفوظ
فهمنى انى اللى هعمله ده هيضرنى
أو يسيئ ليا كانسانة
بتحترم نفسها
مش كبنت
فعيب و مايصحش
 
posted by Yasmine Adel Fouad at 1:25 AM | Permalink |
Friday, January 26, 2007
بــرتقــالة الآلهــة


إلى
نورا طبــعــاً
وحدها تستحق هذا الإهداء
و أكثر
.
.

هى
لوحة لآلهة
بعينين بلون الشجر
إمرأة
فى ثوب نجم مرمرى
ثُلثها الأول
صفحة مــاء
تروى ظمــأ المتعطشين للدروب
عبر أطياف قزحية
تهوّن طول لائحة الانتظار
مــرآة
تعكس
فناجين العمر المكسور
زهرات حزن بــرّية
و ظلال أحلام توتية متداخلة
لها رائحة الليمون
.
و ثُــلثها الثانى
شجرة هادئة
أصلها ثابت
و فرعها فى السماء
تمتد جذورها لأساطير إغريقية
و حدها تعرف نهايتها
بين جذوعها
تحتضن أعشاش طيور
تخشى المصير
.
أما الثُــلث الأخير
فبرتقالة
قشرتها تُــزيدها
إغــراءاً
تكثيــفاً
بــراءةً
قلبها يضم فصوصا عدة
كلها يوحدها محور الكون
الساكن عينيها
حين تحاول احتضانها
تتسرب داخلك
كعزف صوفى
ترفض أن تتنفس غيره
تأسر وجهة أقدامك
فتحبو مجذوباً
فى ملكوت فنّــى
مأخوذاً
بحدود طيفها الفلكية
 
posted by Yasmine Adel Fouad at 4:29 AM | Permalink |
Tuesday, January 23, 2007
كــان لازم ألبّــى النــداء

كانت مفاجأة
لما لقيت زعرورة بتدينى لينك لمياء
و بتقولى انى اتعملى تاج هناك
و دى كان حاجه نفسى فيها
مع انى مش عارفه الأسئلة إيه
بس الرغى للجدعان برضه
من هنا
بقول للمياء
http://pleaseforgivemeicanotstoplovingu.blogspot.com/
ميرسى يافندم
و هجاوب على الأسئلة
*
*
اية اللي حيحصل لايميلك لما تموت ؟
عادى هياخده الوبا
بس أسرارى مش هتموت معايا
علشان بكتب مذكراتى بقالى سنه و نص اهو
و لصاحب النصيب بقى
الباسوورد فى المذكرات
اديت الباس وورد لحد قبل كده؟
باسوورد الايميل
أهو ده اللى مش ممكن أبدا
مش علشان أسرار
بس علشان بحب مساحة خصوصية معينة
لو اه كانت طبيعةعلاقتك بيه اية؟
الحمد لله مقلتش آه
بس عموما لو السؤال ده بيرمى على نوع معين
من العلاقات العاطفيه تحديدا
فأنا معتقدش لو ارتبطت هدى الشخص ده الباسوورد
و لا هطلب الباسوورد بتاعته
تانى مش علشان أسرار أو حاجه غلط مستخبيه
لكن علشان مساحة الخصوصية المطلوبة
اسمك؟
ههههههههههه
عبووووووووووووود
لا اسمى بجد المعروفه بيه ع النت
dreaming bird
و دلوقتى أنا حرة
ياسمين بقى اسمى برضه
بصوا
و الله مابتفرق معانا الأسماء
غالبا
اسم الدلع المشهور في وسط اصحابك؟
يالهوى
لا أنا عندى حوالى 35 اسم دلع
لحد دلوقتى
يعنى فى عيلتى ليا حوالى 7 أو 8 أسامى
و أصحابى بقى كل واحد بيقولى حاجه
و أنا بحب كده
بحب الناس تندهلى بالاسم اللى شايفينه فيا
عندى أصحابى بتوع الجامعه
لحد دلوقتى
بيقولولى شيرين
علشان حاسين ان روحى تدى على الاسم ده
و عندى اسامى تانيه غريبه جدا
بس الفضايح مش مطلوبة
و اسم
miss objection
ده من الاسامى اللى بابا مطلعه عليا
شوفتوا عمايل الراجل
بس ده أرحم من اسم تانى مخبياه
لكن أكتر اسم بحبه
هو
مينا
علشان ده المعروفه بيه
فى عيلة مامتى من زمان
و لحد دلوقتى
أو ده أشهرهم
فى اساميا اللى فى العيله يعنى
عمرك؟
اللى فى البطاقه 22
عمرى بقى العقلى أو النفسى اعتقد حاجه مختلفه
بس معرفش كام
برجك؟
الميزان
و للى ميعرفش ده برج العظماء
مجالك او مجال دراستك ؟
مخلصة صيدله السنه اللى فاتت
بس ناوية ادرس تصوير
و احتمال لو نفع فى يوم علم نفس
مع حبة قراية فى التاريخ بعمق
و بفكر أحترف الكتابة
قولوا يارب
شخصيتك نوعها اية؟
ايه السؤال الغريب ده
شخصيتى شخصيه عادية
فيها حاجات تشدك
و حاجات تخليك عاوز تولع فيا
بس بحب اقول عن نفسى انى
هوائية مجنونة لكن بحس
مع حبة تسرع و حبة رومانسيه
مع عدم صبر
مع شخصية قوية و عصبية
يعنى شخصيه مفيهاش ازدواجية
لكنها محفوفة بالتناقضات اللى أراها منطقيه
أحيانا
السفر بالنسبة لك؟
تغييييييييير
مش عايزة أقول هروب
لكنه عملية
refreshment
مالهاش حل
بحس فعلا انى جددت الأكسجين
بدل الأكسجين المستخدم بتاع القاهرة ده
ياسلام لو فى بحر بقى
أوعى
المود بتاعك؟
يااااااااااااااه
الموود بتاعى
حبة فوق و حبة تحت
هوائية بشكل مخيف بيرعبنى أنا شخصيا
علشان انا نفسى بتصدم من سرعته
بس متعرفش تمسك عليا موود معين
يعنى فى لحظة تلاقينى متضايقه
التانيه تلاقينى على ضهرى م الضحك
طبعا مش دايما
و مش بيتغير ميت مرة فى اليوم
أصلى مش ماشية بسرعة الضوء
بس
حاجه سهله ممكن تنرفزنى
و حاجه أسهل ممكن تخلينى أروق
بس رغم كده بحب موودى اللى بيتغير
بحس انى بعمل عملية فلترة شخصية
وقت فراغك بتعمل فيه اية؟
و الله أنا شايفه ان الحياة ما هى الا وقت فراغ
يعنى فى ناس بتشتغل فى وقت فراغها
ناس تانى بقى بتعمل حاجه مختلفه
فأأقدر أقول ان فى وقت فراغى
اللى انا مش فيه فى الصيدلية
بستثمره
يا فى القرايه
يا فى الكتابه
يا فى الموسيقى سواء سماع أو عزف
ياما بتفرج ع التليفزيون
اخرج مع اصحابى
اروح سينما
كده يعنى
و ممكن اقعد ع النت
باختصار الاجابة
بظروفها
الاكلة المفضلة؟
مكرونة بالباشاميل
ممكن فراخ بانيه
أو رز بالكبد و الأوانص
مش مكلفه أهو
ايه الشطارة دى
الصفات اللي خدتها من بابا؟
مممممممممم
يعنى الصراحه الجامده
الكرامة فى الشغل أو عموما
لما بزعل ببقى وحشة
" بس مش مع اى حد
و مش من أول مرة تحديدا
بعد ما الموقف يتكرر"
العند
الصفات اللي خدتها من ماما؟
الرومانسيه
العصبية
الصوت العالى
انى أسامح بسرعة
اكتر 6 حاجات بتكرهها؟
اشمعنى 6 يعنى
عموما اكتر حاجات بكرهها
الكذب "
وده طبعا من صفات المنافق او الخاين
يعنى مش هكرر الخيانة و كده "
ان حد يتحشر فى اللى ملوش فيه
الإصرار على الجهل بالشئ
ان حد يسألنى سؤال
و هو متوقع اجابة معينه مش عايز يسمع غيرها
الغباء
و خصوصا لو حد عنده فرصة يفكر
الناس الحافظة
اللى ماشية وراء دماغ اللى قبليها من غير تفكير
مبحبش الناس اللى بتستسلم لأى نوع من القيود
مبحبش اللى بيضحك على نفسه و مصدق
مبحبش الناس اللى الاجابه المنطقيه على الأسئله
هى انتى بنت
بيتهيألى كده عديت 6
اكتر 6 حاجات بتحبها؟
برضه 6
القراءة
الكتابة
أصحابى طبعا
علاقتى بقرايبى
دماغى الصراحة
مش بحب دماغى نفسها
بس بحب انى عندى استعداد أفكر
البحر
الموسيقى
السينما طبعا
الشغل بالنسبة لك؟
استقلال مادى
و خبرة حياتية
مينفعش أستغنى عنهم
اية الكومبيوتر والانترنت بالنسبة لك؟
وسيلة
و حياة مش مختلفه بس مختلفه
لا بجد يعنى طريقة تعارف مختلفه
يعنى انا ليا اصحاب من بلاد كتير عشت فيها
و اصحاب مدرسة
واصحاب جامعه
و اصحاب من برنامج فى الراديو
و اصحاب فى مجال الكتابه
هكذا النت
اقدر أقول النت
عالم بيقربنى من الحاجات اللى بحبها
*
*
عايزيني امرر التاج دلوقتي لحد
البنات
نورا
ياسمين اللى هى صاحبة بلوج إنسانة
حفصوتشى
منال

الولاد
utopian
المهاجر المصرى
مصرى
طبعا اللى هياخده
هيبعته لحد بعده
 
posted by Yasmine Adel Fouad at 4:01 AM | Permalink |
مصــر المهــروســة
WELCOME
EGYPT

مواطن
عنده موبايل

الشعب
أثناء تأدية وظيفته




نفر جيزة
مين هيركب

الشعب
و هو بيبلبط


الشعب
مروّح
قبل الزحمة




ريس بلدنا
احنا برضه لينا عنين جوه
محدش أحسن من حد

 
posted by Yasmine Adel Fouad at 2:00 AM | Permalink |
Monday, January 22, 2007
افـــرد جنــاحــاتــك و طيـــر


االنهاردة صحيت من النوم
حاسة ان لونى أخضر
و امبارح كان أزرق فاتح
فواضح ان فى حاجه حلوة
مش عارفه حاسة إنى متفائلة
و جرعة الامل بتزيد
حسيت إن حقكم عليا
أشدكم معايا
للهدوء النفسى اللى انا فيه
و اللى مش عارفه سره إيه
و مش هاممنى أعرف سره
أد ما يهمنى أعيش اللحظة
*
*
لقيت أغنية لوجيه عزيز
بتزن على دماغى
أغنيه
بتتلون مع موودى
يعنى لو مخنوقه
بتخلينى أقفل شرنقتى عليا
و لو سعيدة
بتخلينى عندى جناحات
أطير بيهم
مكان ما ياخدنى الشوق
الأغنيه أهى
*
*
إن مقدرتش تضحك
ما تدمعش
و لا تبكيش
و إن مفضلش معاك غير قلبك
أوعى تخاف
مش هتموت
هتعيش
و إن سألوك الناس عن ضى
جوة عيونك ما بيلمعش
ما تخبيش
قولهم العيب مش فيا
ده العيب فى الضى
و أنا مش عاشق ضلمة
و لا زعلت الضى
مسير الضى لوحده هيلمع
و مسير الضحك لوحده هيطلع
مبيجرحش
و لا يئذيش
*
*
معرفش الأغنيه حزينة و للا ايه
بس أنا شايفاها مديانى حماس
و بتقولى كله بيهون يابت
العيب مش فيا ده العيب فى الضى
و بكرة النور هيبقى أكبر
تقدروا تعتبروا البوست الغريبه دى
دعوة للتفاؤل
*
*
و على هامش الموضوع
اللى عنده أغانى وجيه عزيز
عيرة
أو
سلطة
أو
بص و اتفرج معايا
يبعتهوملى
ينوبه ثواب بقى
*
*
يارب كلكم مبسوطين
و يارب اللحظة تطول
ياااااااااااااه
مفيش أجمل من السعادة
اللى من غير سبب
تحسها حقيقية اوى
تحس ان السعادة هى اللى مختاراك
مش انت اللى اتقطع نفسك
علشان تشم ريحتها
*
*
لكم منى احلى سلام
و معلش للناش اللى النيولوك
مش عاجبها
استحملونى
 
posted by Yasmine Adel Fouad at 1:13 AM | Permalink |
Sunday, January 21, 2007
Something Personal


أنا مش بتاعة حد
+
i am gonna be no one but me
عارفة إن المشوار طويل
و مش سهل
عارفة إن المعارك كتير
بس برضة عارفة إنى قوية
و إن عندى إصرار و إرادة
عارفة إن شخصيتى قوية
و إنى عمرى ما بسكت عن حقى
و صوت دماغى عالى
و مينفعش حد يخرسه
بس فى 3 مشاكل
الأولى
إنى يلزمنى الكثير من الصبر
عمرى ما كنت صبورة
و على رأى الست
الصبر عايز صبر لوحده
المشكلة الثانية
إنى مش بعرف أحسن اختيار وقت المواجهة
و ده راجع لأنى مش صبورة
و مش بعرف أستنى
أما المشكلة الثالثة
فهى أحيانا تدافع المعارك
حتى لو كانت هايفة
بيخللى الواحد معندوش وقت يعيد حساباته
و يفكر تانى يمكن يكون غلطان
لإنه مش عارف يفوق
غير إن أحياناً الرفض بيولد العند
عارفه إن الموضوع مش كبير للدرجة دلوقتى
لكن الأكيد إن كل مدى المعارك بتكون أكبر
بس ساعات طول المعركة
بيخللى الواحد فى الآخر ما يحسش بحلاوة الخطوة الجديدة
عموما لإن صوتى صدعنى
حسيت إنى محتاجة رأى محايد
سواء الرأى ده كان فى حل للمشكلات الثلاته
أو لعرض معارك مماثلة
الموضوع مش سهل
ده مشوار حياة
لكن النهاية
might worth all the fighting
يعنى مينفعش أجازف و اتهاون
.
.
.
.
بقلب نصف ممهد
و عمر يزعمون - كذباً - أنه ملكه
يجلس العصفور الأزرق
بين قضبان من ذهب
و أخرى من صفيح
يوارى طيفه
كى لا تلتقطه كاميرات المراقبة
خوفاً أن يثبت سجنه
فيتحتم عليه تصديقه
ببقايا نزف
من عمر لآخر
يتغلب على سجنه الصغير
و بينما هو يحتسى كأس الوصول
تفاجئه حدود جديدة
تعيد مراسم الاختناق
فيختلس النظر للمرآة
سبيله الوحيد لرؤية نفسه
كى يتأكد أن روحه لم تتغير
يتأكد من صلاحية جناحيه
من أجل اليوم الموعود
يرسم ملامح خطوته القادمة
يتلو على نفسه طقوس بدوية
يستحم بماء مقدسة
ثم يغمض عينيه
و يشدو بآيات الذكر الحكيم
لينام
.
.
صحيح
رأيكم إيه فى الأغنية الجديدة
دى كاميليا جبران
 
posted by Yasmine Adel Fouad at 3:04 AM | Permalink |
Friday, January 19, 2007
وجهــة نظـــر
الحلاج
:
لكى يُرفع الخوف عنى
خوف المنون
و خوف الحياة
و خوف القدر
لكى أطمئن سألت الشيوخ
فقيل : تقرب إلى الله
. صلّ ليرفع عنك الضلال
صلّ لتسعد
و كنت نسيت الصلاة
فصليت لله
رب المنون ورب الحياة ورب القدر
و كان هؤاء المخافة يصفر فى أعظمى
و يئز كريح الفلا
و أنا ساجد راكع أتعبد
فأدركت أنى أعبد خوفى لا الله
كنت به مشركاً لا موحداً
و كان إلهى خوفى
و صليت أطمع فى جنته
ليختال فى مقلتى خيال القصور ذوات القباب
و أسمع وسوسة الحلى .. همس حرير الثياب
إنى أبيع صلاتى إلى الله
فلو أتقنت صنعة الصلوات لزاد الثمن
و كنت به مشركاً لا موحداً
و كان إلهى الطمع
و حير قلبى السؤال
تُرى قدّر الشرك للكائنات ؟
و إلا فكيف أصلى له وحده
و اخلى فؤادى مما عداه
لكى أنزع الخوف عن خاطرى
لكى أطمئن
.
.
" مأساة الحلاج "
صلاح عبد الصبور
 
posted by Yasmine Adel Fouad at 10:22 AM | Permalink |
Thursday, January 18, 2007
لــونك إيــه ؟

عمرك فكرت تسأل نفسك لونك إيه ؟
ماهو أكيد ليك لون
و الأكيد أكتر
إن لونك من يوم للتانى بيفرق
*
*
يوم تلاقى نفسه بهتان
يوم بتبرق
يوم مزهزه
و يوم تعبان
و أكيد مش انت بس اللى ليك لون
كل حاجه تانيه ليها لون
*
*
يومك
حياتك
بكرة بتاعك
و هكذا
*
*
وصلت لنتيجة مريحة من فترة
ان الحياة لونها رمادى
حبة بيفتح
و يبقى أبيض
و حبة بيتهبب
و يبقى إسود
ماهى حتى الحياة زى الوردة
حبة بتفتح و حبة بتقفل
*
*
زيى كده
حبة فوق و حبة تحت
بدأت أشوف الرمادى بعين مختلفة
و انه لون محايد مابيغشش
بس مالوش أمان فى نفس الوقت
المهم كل حاجه ليها لونها
*
*
إنت بقى ياللى معدى من هنا
لونك النهاردة إيه ؟
ما هو لازم الواحد يكون ناصح
و يعرف لونه إيه من أول اليوم
و يمشى معاه
و يستغل الفرص
*
*
علشان اللون الفرايحى مش بييجى كتير
و اللون الحزاينى برضه ليه إغراءاته
و ساعات بيسحب فى دوامة
بس قبل ما تحب لونك
فكر كويس
*
*
ما تفرحش بالأبيض أوى
لإنه خدعة الألوان
وما تكرهش الأسود
لإنه سيدهم
هو لون اللحظات الخاصة
*
*
بس فى الآخر
كل واحد يختلى بروحه
و يشوف شايف نفسه لونه إيه
و زى ما بتعيش يومك
عيش لونك
و شوف الفرق

 
posted by Yasmine Adel Fouad at 8:21 AM | Permalink |